Is 15 - Chuj San Sebastian Bible

A tas 'ix alx 'el 'a yib'n̈ Moab

¹ A jun tzo'n̈ paxti tic 'ix alx can 'el 'a yib'n̈ eb' 'aj Moab: A 'a jun 'ac'wl 'aj 'oj satl chon̈b' Ar yet' jun 'ac'wl 'aj 'oj satl chon̈b' Kir 'a yol yic Moab, a yic cha, 'icha wal to a Moab chi tzsatli; caw 'oj can 'a sictaquil.

² Ax eb' 'anma 'aj Dibón, 'oj q'ue'choc eb' 'o'c 'a jun n̈a 'aj tzyam sb'a 'a lum jolm tzalan. Caw 'oj cus sc'ojl eb' 'aj Moab yuj tas 'oj 'aj satl chon̈b' Nebo yet' Medeba. Smasnil eb' winac, 'oj sjoxl eb' xil sjolom yet' xil sti yuj sch'oxn 'el eb' scusc'ojlal.

³ A spichl eb' n̈achtac sat 'oj laj ya'chi, ax laj yec' eb' 'a yol caye yet'oc. 'Oj q'ue eb' 'anma chi 'a span̈nil yib'n̈ yatut, ax laj yoc' eb'. 'Oj laj 'oc' eb' 'a plas, toxn̈ej 'oj si'si'nc eb' yoq'ui.

⁴ A eb' 'aj Hesbón yet' eb' 'aj Eleale, 'oj 'el yaw eb' sc'ann scolwal junc xo mach yet'oc; 'oj c'och yel yaw eb' 'a chon̈b' Jahaza. Ax eb' soldado yic Moab, 'oj 'el yaw eb', ax yel yip eb' yuj xiwc'ojlal.

⁵ Caw wal tzcus in c'ojl yuj eb' 'aj Moab; a eb' 'anma 'a jun chon̈b' cha, 'oj 'at eb' 'eloc. Atta 'oj c'och eb' scol sb'a 'a Zoar, masnto 'oj c'och eb' 'a Eglat-Selisiya. 'Oj q'ue'choc eb' 'o'c 'a lum tzaln Luhit; yet' 'aj tz'ec' sb'el Horonaim. Caw wal ji'jmtac yoc' eb' yab'n syal tas tzjaw 'a yib'n̈ cha.

⁶ 'Oj tup chan̈ eb' a a 'a yol yic Nimrim, ax stacj chan̈ smasnil te c'ultac. Man̈x 'a xon junc te c'ultc yax xil 'oj canoc.

⁷ Yuj cha, ax smolb'tzan eb' 'anma chi smasnil tas 'ay 'a 'a, ax yi'n 'at eb' 'a sc'axpil 'ec' lum ch'oln 'aj 'ay te sauce.

⁸ 'Oj 'ab'xoc yel yaw eb' 'anma chi 'a smasnil 'aj tzlajw c'och smon̈jonal Moab. 'Oj c'och yel yaw eb' yuj syailal chi 'a chon̈b' Eglaim, masnto 'oj c'och yab'x 'a Beer-elim.

⁹ Ax eb' a a 'a yic Dimón, 'oj chacb'oc 'el a yuj schic'l eb' 'anma', palta 'ayt pax jun tzo'n̈ xo yailal 'oj ya' cot Dios 'a yib'n̈ eb'. 'Oj jawc e no león, ax schin 'ejm e no eb' 'anma 'oj cob' 'atcn 'elc 'a Moab, yet' eb' 'oj can to 'a jun lugar cha.