Is 13 - Chuj San Sebastian Bible

A tas 'ix alx 'el 'a yib'n̈ Babilonia

¹ 'Aycto yaln can Dios 'a win Isaías, win yunnal Amoz, tas jun tzo'n̈ 'oj jawc 'a yib'n̈ chon̈b' Babilonia, yic yaln 'a win 'ixtic:

² A 'a sjolm jun witz may ste'al, ata tzeyac' chan̈ junc e bandera. Alx cab' yab' eb' soldado, to tz'och eb' 'a owal, 'ijec chan̈ e c'ab' yic tze ch'oxni 'ajtil tztac' yoch eb' soldado chi 'a yol sti spuertail yatut eb' yajl 'a Babilonia.

³ Tox xwac' alxc 'a eb' in soldado, atn eb' jeln 'a owal, a eb' xwac' si'xoc 'eli, 'oj tzaljoc eb', yic 'oj wa'n ya'ch eb' syailal eb' 'ajc'ojl yajch 'ayin, xchi Dios.

⁴ Ex 'aj Babilonia 'ab'c wal jun 'aw 'a eb' lum jolmctac witz cha. A wal tzcab'i to caw niwn 'anma yamn ta', atn eb' 'anma xcot 'a jun tzo'n̈ xo nacion̈. A Jehová tztac' yuj smasnil, a wan ya'n 'awtxoc slistail eb' soldado 'oj 'och 'a owl cha.

⁵ Atn eb' xlaj cot 'a jun tzo'n̈ nacion̈ 'a najat, 'a 'aj tzlajw c'och sti lum lum tic. 'Icha to syamc'ab' Jehová yaj eb' yuj 'a owal, sec a eb' tzsatn 'el smasnil tas 'ay 'a sat lum lum tic yuj yowl sc'ojol.

⁶ C'uyyoc cab' yel eyaw, yujto jab'xoj wal sc'och sc'ul sjaw yowl sc'ojl Jehová 'a eyib'an̈, atn jun tztac' yuj smasnil, a tz'a'n cot jun yailal cha.

⁷ Yuj cha, ax smasnil 'anma', 'oj sicb'oc 'ejm eb' yuj xiwc'ojlal.

⁸ Ton̈j 'oj sat sc'ojl eb'. A xiwlal, cusc'ojlal yet' yailal, a chi 'oj yic' yip 'a scal eb'. Caw 'oj yab' eb' syal jun tzo'n̈ chi 'icha tzyac' eb' 'ix 'ix tz'alj yune'. Toxn̈ej 'oj laj yil-lac 'och sb'a eb', ax schacb' chan̈ sat eb' soldado chi yuj q'uixwc'ojlal.

⁹ A ticnec wan sc'och sc'ul sjaw yowl sc'ojl Jehová, caw wal 'ay smay jun cha, lajn 'icha junc c'ac' tzn̈ilchji. 'Oj can lum lum tic 'a cusltacl yu'uj, 'oj lajwc 'el eb' 'anma maysch'olnil sb'eyb'al cajn ta'.

¹⁰ Ax smasnil c'anal 'a satcha'an̈, man̈x 'oj yac' sacq'uinlal 'a yib'n̈ lum lum tic, cojn yic tzq'uel c'u, ax yochx can musan, 'ixta pax 'uj, man̈x 'oj yac' sacq'uinlal 'a 'ac'wal.

¹¹ Yuj cha, ax yaln Jehová 'ixtic: A ticnec, 'oj wa'ch yailal 'a yib'n̈ eb' 'anma 'a yolyib'n̈q'uinl tic yuj maysch'olnil tzlaj sb'o. 'Oj wac' sat 'ejm sb'an̈quinal eb' tzlaj yi' chan̈ sb'a, yet' eb' may yel'ch yit 'anmal 'a sat.

¹² Teb'il xoj 'oj 'ilchjoc eb' 'anma 'a yib'n̈ q'uen oro wach' tzcot 'a Ofir.

¹³ An Jehová in tztac' wuj smasnil, 'oj in tzicb'tan̈c satcha'an̈, ax lum lu'um, 'oj 'ib'xoc lum 'a yet'l yuj yowl in c'ojol. Caw wal 'oj niwtjoc scot wowl 'a jun c'u cha.

¹⁴ Ax eb' chuc chon̈b'al cajn 'a Babilonia cha, lajn 'oj yutc sb'a eb' 'icha no c'ultquil chej tzpechxi, mto 'icha no calnelu man̈x 'a yilmal, tzpuccn 'at no'. 'Ixta 'oj yutc sb'a eb'. Junjn mach 'oj paxcn 'a schon̈ab', mto 'a slum 'aj 'ay.

¹⁵ Tzann̈j eb' 'oj yac' yamchjoc sb'a, 'oj milxoc cham yet' espada.

¹⁶ Q'ueln 'och wal eb', ax sma'x cham yunnal eb' 'a sat lu'um. 'Oj 'ijxoc 'elt yol yatut eb' smasnil, ax yixtx can yistzil eb'.

¹⁷ 'Oj wi' cot eb' 'aj Media, ax sjaw eb' 'a scal eb'. A jun tzo'n̈ 'anma cha, may tz'och q'uen plata yet' q'uen oro yuj eb'.

¹⁸ 'Oj julxoc cham eb' quelmtac 'unn yet' sjul-lab' eb' cha. May sniwnc'ojlal eb' 'a yib'n̈ eb' tz'ulc 'unn tzat 'alji, matz 'o'ch xon pax sc'ojl eb' 'a eb' cotc 'unin.

¹⁹ A chon̈b' Babilonia cha, cojxn yel wach' yilx 'a yib'n̈ jun tzo'n̈ xo nacion̈. A 'aych yi'nb'ilc chan̈ sb'i eb' cajn chi ta', palta lajn 'oj 'ajcn 'icha wutjnac can Sodoma yet' Gomorra yic in satn 'eli.

²⁰ Man̈x 'a b'a'n̈ 'oj cajxoc pax jun chon̈b' cha, man̈x 'a eb' 'anma 'oj c'ochx scaja'. 'Ixta pax eb' 'aj Arabia, man̈x b'a'n̈ 'oj 'ec' scaj eb' yet' scajb'en noc', man̈x xon b'a'n̈ 'oj 'ec' eb' 'ilm calnelu 'iljoc yet' scalnelu ta'.

²¹ Axn̈ej no calte'al noc' 'oj cajnoc. 'Oj b'ut'joc 'el yol n̈a chi yuj no tucul, no avestruz yet' no calte'al chiwo, 'oj laj b'atjoc chan̈ e no yec' ta'.

²² Axn̈ej no wax 'oj laj 'el yaw 'a yol scuartel eb' soldado, ax sdespacho eb' niwc yajal, a e no 'ocs 'oj laj cajnoc. Wan sc'och sc'ul satl chon̈b' Babilonia; man̈x niwnoc tiempo 'ayq'ui, xchi Dios.