Is 11 - Chuj San Sebastian Bible

A yopiso jun Mesías

¹ 'Icha junc te yib'te tzwolni, 'ixta 'oj 'aj spitzw chan̈ jun yin̈tl Isaí.

² A jun cha, 'aychn̈ej Yespíritu Jehová yet'oc, 'oj yac' sjelnal, 'oj yac' wach' nab'enal 'a 'a, 'oj yac' tojlal, 'oj yac' yip, 'oj yac' spoder, 'oj ya'n yojcoc 'el tas tznib'j Jehová, ax syiclni.

³ Yiclum 'oj yutc sb'a 'a Jehová, ma'oj sb'eyc'ojloc eb' 'anma yujn̈ej tas yilxi, mto yuj tas tzyab' 'a spatc eb'.

⁴ 'Oj sb'oyaj eb' meb'a 'a stojlal, 'oj colwjc yet' eb' 'anma 'emmquilal yeq'ui. Cojn ton̈j 'oj yala', ax yochcn syailal eb' tu tzlaj yutc sb'a. Cojn ton̈j 'oj yala', ax scham eb' tzb'on maysch'olnil.

⁵ A tas tojol yet' tas yel, a chi 'oj niwtjoc yalx 'a spatic, 'icha to spichl 'oj 'ajch jun tzo'n̈ cha.

⁶ A 'a jun tiempoal cha, a no 'oques yet' no calnelu, 'oj 'och junc'ojlal 'a scal e no'. A no tigre yet' no chiwo, junn̈j 'aj 'oj mol 'iljoc e no'. An̈jtona no quelm wacax yet' no león, junn̈j 'aj 'oj mol q'uib' chan̈ e no'. Moln 'oj laj 'ec' e no', ax junc 'unin a 'oj tan̈wnoc wa e no'.

⁷ 'Oj swach'c'ojloc sb'a no nun wacx yet' no nun oso, ax smol tan̈wni e no yune'. 'Oj mol 'em cutn e no cotc chi swayi, ax no león, c'ultc 'oj slo no 'icha no wacax.

⁸ A eb' cotc 'unn wanto ya'lni sb'eyi, 'oj stac' stajn eb' yet' no chan 'a 'aj 'ay sjul, 'oj laj ya'ch eb' sc'ab' 'a yol sjul no chan cha, palta ma'oj chixc eb' yuj no'.

⁹ Xyaln Jehová 'ixtic: Man̈x 'a xon yailal 'oj jawc 'a tzaln Sión, atn jun sic'b'il 'el wu'uj, xchi. 'Icha wal tz'aj sb'ut'j 'el a mar, 'ixta wal tz'aj yolyib'n̈q'uinl tic sb'ut'j 'el yuj eb' 'anma tz'ojcan 'el Jehová.

¹⁰ A 'a jun tiempoal cha, 'oj sch'oxl sb'a jun yin̈tl Isaí cha. Til wal 'anma 'oj cot 'a jun tzo'n̈ xo nacion̈, ax sayn 'ec' eb' 'aj 'ayc' cha, caw niwn yel'ch 'a sat eb'.

Spaxnb'ilt eb' 'aycn 'at 'icha presoal

¹¹ A 'a jun tiempoal cha, ata 'oj sch'oxx Cajlil spoder 'a jun tzo'n̈ nacion̈ cha, ax smolb'tzan paxt eb' schon̈b' sactzicnac yajcn 'ati. 'Oj paxtc eb' 'aycn 'at 'a Asiria, 'a Egipto, 'a Patros, 'a Etiopía, 'a Elam, 'a Sinar, 'a Hamat yet' 'a jun tzo'n̈ xo chon̈b' 'ay 'a sti a mar.

¹² 'Oj q'ue junc bandera tzch'oxni, chajtlto a tzmolb'tzan paxt eb' israel 'aycn 'at 'icha presoal 'a jun tzo'n̈ xo nacion̈. An̈jtona eb' 'aj Judá 'oj smolb'tzoc paxt eb' 'aycn 'at 'a smasnil yolyib'n̈q'uinl tic.

¹³ 'Oj lajwc can 'ejm schichnc'ojlal eb' yic Efraín 'a eb' 'aj Judá. 'Ixta pax eb' 'aj Judá cha, man̈x 'a c'a'lc'ojlal 'a scal eb' 'aj Judá yet' eb' yic Efraín.

¹⁴ 'Oj yi' chan̈ sb'a eb' schac'ajil, ax 'at ya'nc eb' owl yet' eb' filisteo 'ay 'a stojlal 'aj tz'em c'u. 'Oj 'em eb' filisteo chi yuj eb'. Ax smol 'i'n 'ec' eb' smasnil tas 'ay 'a eb' 'anma 'ay 'a stojlal 'aj tzq'uel c'u. 'Oj c'och yi'n 'ec' eb' lum lum chi 'a chon̈b' Edom yet' lum chon̈b' Moab, ax ya'n eb' yajlil 'a yib'n̈ eb' 'aj Amón.

¹⁵ 'Oj yac' Jehová tup chan̈ jun sc'ab' a Chac mar. Ax ya'n cot jun niwquil 'ic' caw c'ac' 'a yib'n̈ 'a niwn a Éufrates. 'Oj tupcn chan̈ a', uque 'oj 'elcn a 'a yet'l cha. Wach' 'oj 'ec' 'anma 'a yojl a', man̈x yowlalc tzyij 'el eb' xan̈ab'.

¹⁶ Yuj cha, a yic 'oj meltzjoc paxt eb' schon̈b' Jehová 'a Asiria, caw lewn sb'e eb' 'aj 'oj cotoc, 'icha 'aj b'eyn̈c eb' israel yic yelt eb' 'a Egipto.