A Ch'an̈ Carta D'a Eb' Hebreo 8 - Chuj San Sebastian Bible

A jun yac' trato Dios ya'jnac

¹ Atn jun tic tzin nib'j tznachj 'el eyu'uj, chajtlto 'ixta yaj jun sat ya'mal 'och qui tic 'a Dios. A ticnec, wocn 'ejm 'a swach' c'ab' Dios 'a sdespacho 'a satcha'an̈.

² Wan ya'n 'och qui tic 'a 'a. 'Ayc' 'a yojl jun caw yel yatut Dios, atn jun mun b'ob'il yuj Cajlilec cha. Man̈ 'anmac b'ojnac.

³ Junjn eb' sat ya'mal 'och sti eb' quit chon̈b' 'a Dios, 'ay yopiso eb' ya'n jun tzo'n̈ ofrenda 'a 'a, yet' jun tzo'n̈ xajmb'al. Yuj cha, yowlal 'ay pax tas tzyac' Jesucristo 'a Dios.

⁴ Q'uinloc an̈ja 'ayc' 'a yolyib'n̈q'uinl tic ticnec. To 'ixta', may am yopiso ya'n 'och qui tic 'a Dios, yujto 'ay jun tzo'n̈ xo eb' 'ay yopiso 'ixta', tzyac' eb' jun tzo'n̈ ofrenda 'icha tzyal ley yic Moisés.

⁵ Palta a yopiso eb' cha, ton̈j ch'oxnb'il yaj yuj tas 'ay 'a satcha'an̈. 'Icha to yen̈ln̈ej yaji. Cojquec, to ton̈j ch'oxnb'il yaji, yujto a yic mantzac sb'o Moisés jun scajnub' Dios, yaln Dios 'ixtc 'a 'a: Tzcham wal elni, 'icha wal tzwutj in ch'oxn yechl 'aych 'a sjolm lum witz tic, 'ixta wal tzotj a b'oni, xchi 'a 'a.

⁶ Palta a jun tz'a'n 'och qui tic 'a Dios ticnec, yel xo wal 'ec'b'al swach'l yopiso 'a yib'n̈ yopiso eb' cha. Yujto a tz'a'n 'el'choc jun strato Dios ya'jnac 'ayn̈ec. A jun strato cha, yel xo wach' 'a yib'n̈ jun 'a b'ab'el, yujto a jun tzo'n̈ tas ya'jnac Dios sti yu'uj, yel xo caw wach'.

⁷ Q'uinloc may junc tas tzyac' palta 'a jun sb'ab'l trato cha. Toto 'ixta', man̈x yowlalc 'ix yac' junx schab'l trato tic.

⁸ Palta yiljnac Dios, chajtlto caw maysch'olnil yutjnac sb'a eb' 'anma cha. Yuj cha, tzyal 'ixtc 'a Ch'an̈ U'un̈: A Cajlil, tzyal 'ixtic: 'Oj jawc jun c'ual, 'oj in b'o junc xo in 'ac' trato yet' eb' yin̈tl Israel, yet' pax eb' yin̈tl Judá.

⁹ A wal jun in trato cha, caw man̈ lajnoc 'icha jun in b'ojnac yet' eb' smam yichm eb', yic wi'n 'elt eb' 'a Egipto. 'Icha to in quetz sc'ab' eb', yic wi'n 'elt eb'. Palta a eb' cha, ma'ix syiclj eb' jun in trato cha, yuj cha, wactn can eb' sch'ocoj.

¹⁰ A 'a yic 'oj lajwc jun tiempoal cha, 'ayt junx in trato 'oj wac' 'a eb' yin̈tl Israel. 'Ixtc 'oj wutoc: 'Oj wa'ch jun tzo'n̈ in checnb'il chi 'a snab'en eb'. 'Icha to 'oj in tz'ib'c can 'a spixn eb'. An 'oj woch sDiosalc eb', ax yoch pax eb' in chon̈b'oc.

¹¹ Man̈x yowlalc 'ayt junc mach 'oj alnc 'a junc xo yit chon̈ab', mto 'a junc yican, sec tzin yojquej 'eli. Yujto c'uxn 'oj in yojcoc 'el xon eb' ta'. wach'xam eb' 'unin, wach'xam eb' caw 'ichm 'anma xo, c'uxn 'oj in yojcoc 'el eb'.

¹² 'Oj wac' niwnc'ojlal smul eb'. Man̈x 'a b'a'n̈ 'oj in na cot smul eb' cha, xchi Cajlil 'a Ch'an̈.

¹³ Yic yaln Dios yuj jun yac' trato tic, sch'oxo, to 'ichm xo jun sb'ab'l trato. Q'uinloc 'ay junc tas tz'ichmax ticnec, tzlajw yopiso. Toto 'ixta', jab'xoj ax swach' satli.