A Ch'an̈ Carta D'a Eb' Hebreo 7 - Chuj San Sebastian Bible

A Jesús ya'mal 'och qui ti 'a Dios,*r* 'icha Melquisedec

¹ A win Melquisedec, sreyl chon̈b' Salem win 'a pecti'. Ya'mal 'och pax sti eb' 'anma win 'a Dios, atn jun caw niwn yel'chi. A 'a jun 'el, xit'nc Abraham yac' owl yet' jun tzo'n̈ eb' rey, yic yajx ganar eb' yu'uj. Ax yic spaxta, ax win Melquisedec xit' c'umnoc 'a yol b'e. Sc'anjnac win swach'c'ojlal Dios 'a yib'an̈.

² Ax Abraham cha, jantcn̈ej tas xit' yac' ganar 'a jun owl cha, c'uxn xya'cn sdiesmoal 'a winac. A Melquisedec, tzyal 'el'chi, rey caw tojol. An̈jtona', sreyl pax chon̈b' Salem. A Salem, tzyal 'el'chi, junc'ojlal. Yuj cha, tzcuchn pax win Melquisedec cha, rey yic junc'ojlal.

³ Man̈ checloc mach smam snun, yet' smam yicham. Yic yalji, yet' yic schami, may tas tzyal yu'uj. Yuj cha, sch'oxnb'il Yunnal Dios yaj winac, atn jun tz'a'n 'och qui tic 'a Dios 'a smasnil tiempo.

⁴ Al ticnec, nachj cab' 'el eyu'uj, chajtlto caw niwn yel'ch win Melquisedec cha. Yujto a qui mam quichm Abraham, jantcn̈ej tas xit' yac' ganar, 'ix ya'cn sdiesmoal 'a winac.

⁵ Tzyal 'a ley yic Moisés, to a eb' ya'mal 'och sti eb' quit chon̈b'ec 'a Dios, atn eb' yin̈tl Leví, 'ay yopiso eb' sc'ann 'el sdiesmoal smasnil tas 'a eb' quit chon̈b'ec. Wach'xam yin̈tl Abraham eb' yet' eb', yowlal xyac' eb'.

⁶ Ax win Melquisedec cha, wach'xam man̈ yin̈tloc Leví, palta schajnac sdiesmo Abraham, atn jun 'aj ya'jnac Dios sti'. Sc'anjnac can win swach'c'ojlal Dios 'a yib'n̈ Abraham cha.

⁷ Cojquec, a mach tzc'ann swach'c'ojlal Dios 'a yib'n̈ junc xo mach, wal yel, yel xo niwn yel'ch 'a yib'n̈ jun 'aj tzc'an cot swach'c'ojlal Dios cha.

⁸ A ticnec, a eb' tzchan sdiesmo eb' quit chon̈ab', 'anman̈ej eb', chamlb'an̈ej yaj eb'. Palta tzyal 'a Ch'an̈ U'un̈, chajtlto a win Melquisedec, win schajnac sdiesmo Abraham cha, 'icha to pitzn to winac.

⁹ A win Leví, chajnac sdiesmo eb' quit chon̈b'ec pecti'. Palta tztac' calnec, to a 'a'jnac sdiesmo 'a win Melquisedec, yic ya'n Abraham yico'.

¹⁰ Yujto a yic xit' sc'umnoc win Melquisedec Abraham, mantzac 'alj Leví. Palta 'ayt 'och 'a sniwnal Abraham cha, yujto smam yicham.

¹¹ A eb' ya'mal 'och sti eb' quit israelal 'a Dios, yin̈tl can Leví eb', yin̈tl pax Aarón eb'. Yuj eb', 'ac'b'il can ley yic Moisés 'a eb' yit israelal. Tzcob' ya'lc eb' sb'on snab'en eb' yit chon̈b' cha, palta matz tac' yuj eb'. Yuj cha, yowlal xjaw junx tz'a'n 'och qui tic 'a Dios. A jun cha, 'ix schaj yopiso 'icha schaj win Melquisedec yico', man̈ 'ichaoc schaj eb' yin̈tl Aarón.

¹² A yic x'och sjel eb' ya'mal 'och qui tic 'a Dios, yowlal xjelmj pax ley yic Moisés.

¹³ A jun wan yalx tic, atn Cajlilec. A Cajlilec tic, lajn 'icha win Melquisedec, yujto man̈ yin̈tloc Leví. Chuc jun c'aj xo eb' israel 'ay yin̈til. A 'a jun c'aj eb' cha, may junc eb' ya'mal 'och qui tic 'a Dios.

¹⁴ Cojquec, chajtlto a Cajlilec, yin̈tl can Judá. Ax Moisés, may tas yaljnac, toto 'ay junc eb' yin̈tl Judá chi tztac' yoch ya'malc 'och qui tic 'a Dios.

¹⁵ Caw tznachj 'el jun tzo'n̈ tic cujec, yujto a junx ya'mal 'och qui tic 'a Dios xjawi, lajn 'icha win Melquisedec, atn Cajlilec.

¹⁶ Man̈ yujoc ley yic Moisés, x'ajx yopiso ya'n 'och qui tic 'a Dios. Palta x'och yopiso, yujto may b'a'n̈ 'oj lajwc 'ec' sq'uinal.

¹⁷ Yujto yaljnac Dios 'ixtc 'a 'a: Ach tic, tzach 'ochcn ya'malc 'och sti eb' 'anma 'ayn 'a smasnil tiempo, 'icha ya'jnac Melquisedec 'a pecti', xchi.

¹⁸ Yuj cha, a jun ley 'a yic yalan̈, lajwnac yopiso, yujto may spoder, nab'an̈ej xoj 'ayq'ui.

¹⁹ May junc tas xb'o 'el'ch yuj jun ley cha. Palta 'ay junx yel xo caw wach', 'ix 'ochx can sjeloc, atn jun 'aych yipc qui c'ojlec. Yuj wal jun cha, tztac' qui nitznec 'och qui b'a 'a stz'ey Dios.

²⁰ A yic sb'on can Dios jun tzo'n̈ tic, slocn can sb'i.

²¹ A eb' ya'mal 'och sti eb' quit chon̈b'ec 'a Dios, yic yoch yopiso eb', ma'ix sloc Dios sb'i. Palta a yic ya'n yopiso Jesús, yic tzya'n 'och qui tic 'a 'a, atta sloc sb'i. Yujto tz'ib'b'il can 'ixtc 'a Ch'an̈ U'un̈: A Cajlil mun slocjnac sb'i yic yalni, yuj cha, may wal b'a'n̈ 'oj sjel snab'en, alb'il can yuj 'ixtic: Ach tic, tzach 'ochcn ya'malc 'och sti eb' 'anma 'ayn 'a smasnil tiempo, 'icha ya'jnac Melquisedec 'a pecti', xchi Dios 'a Ch'an̈ U'un̈.

²² A junx strato xyac'a, 'ec'b'al swach'l 'a yib'n̈ jun ya'jnac 'a b'ab'el. Ax Jesús, a tz'a'n 'el'choc jun tic.

²³ A eb' ya'mal 'och sti eb' quit chon̈b'ec 'a Dios, caw niwn eb' 'e'nc 'a jun 'opiso cha. May junc eb' tztac' smunlj 'a smasnil tiempo, yujto tzlaj cham eb'.

²⁴ Palta ax Jesús, man̈x b'a'n̈ 'oj chamoc. Yuj cha, smasnil tiempo 'ay yopiso ya'n 'och qui tic 'a Dios.

²⁵ Yuj cha, a mach tz'ijx 'och yico'oc Dios yu'uj, a tztac' ya'n scolnb'il eb' 'a jun 'ejmn̈ej. Yujto pitzn 'a jun 'ejmn̈ej, yic tzc'ann niwnc'ojlal 'a Dios cujec.

²⁶ Yuj cha, atn jun sat ya'mal 'och qui tic 'a Dios, caw 'ay yopiso 'ayn̈ec. Caw wach'n̈ej. May jac maysch'olnilal 'aych 'a 'a. May pax jac smul. Caw man̈ lajnoc sb'eyb'al 'icha eb' 'ajmul. Yel xo niwn yel'ch 'a yib'n̈ jantcn̈ej tas 'ay 'a satcha'an̈.

²⁷ Man̈ lajnoc 'icha eb' sat ya'mal 'och sti eb' quit chon̈b'ec 'a Dios. Yujto a eb' cha, yowlal tzyac' eb' jun tzo'n̈ xajmb'al 'a junjn c'u. Tzb'ab'l 'a'j eb' yuj smul, tzya'n pax eb' yuj smul eb' yit 'anma'il. Ax Jesús, jun 'ejmn̈ej ya'jnac xajmb'al-l sb'a yuj qui mulec, yic ya'n cham sb'a.

²⁸ Yuj ley yic Moisés, a eb' 'ochnc sat ya'malc 'och sti eb' quit chon̈b'ec 'a Dios, 'anman̈ej eb'. Palta a yic slajw yopiso jun ley cha, mun slocjnac Dios sb'i, yic ya'n yopiso junx sat ya'mal 'och qui ti 'a 'a, atn Yunnal. Yaljnac Dios yu'uj, chajtlto tz'acn 'a smasnil.