A Ch'an̈ Carta D'a Eb' Hebreo 5 - Chuj San Sebastian Bible

¹ Junjn eb' sat ya'mal 'och sti eb' israel 'a Dios, sic'b'il 'el eb' 'a scal eb' yit 'anma'il. Tz'ajx yopiso eb' ya'n 'och sti eb' 'anma 'a Dios. Tzya'n pax eb' jun tzo'n̈ ofrenda yet' jun tzo'n̈ xajmb'al yuj smul eb' 'anma cha.

² A eb' cha, lajn eb' 'icha eb' yit 'anma'il, yujto may pax ste'nal eb' yet' eb'. Yuj cha, tztac' niwn tzyutj eb' sc'ojl 'a eb' mantzac nachj 'el yu'uj, yet' eb' tz'em 'a spaltail.

³ A eb' sat ya'mal 'och sti eb' israel 'a Dios cha, 'anman̈ej eb'. Yuj cha, yowlal tzyac' pax eb' xajmb'al yuj smul, 'icha tzyac' eb' yuj eb' yit 'anma'il.

⁴ May junc mach tztac' scomn 'a'n 'och sb'a 'a jun 'opiso cha. Cojn eb' 'awtb'il yuj Dios tztac' yajx yopiso, 'icha 'ajnc win Aarón yawtx yuj Dios pecti'.

⁵ An̈jtona', 'ixta pax Cristo. Ma'ix scomn 'a'j 'och sb'a sat ya'malc 'och qui tic 'a Dios. Yujto a Dios 'a'jnac yopiso, 'icha yaj yaln 'ixtc 'a 'a: A 'a jun c'u tic, 'ix wac' checljoc 'eli to Wunnal ach, xchi.

⁶ An̈jtona', 'ay pax 'aj tzyal 'ixtc 'a Ch'an̈ U'un̈: Ach tic, tzach 'ochcn ya'malc 'och sti eb' 'anma 'ayn 'a smasnil tiempo, 'icha ya'jnac Melquisedec 'a pecti', xchi Dios 'a 'a.

⁷ A yic yec' Cristo 'a yolyib'n̈q'uinl tic, leslwnac, sc'ann tas 'a Dios. Caw 'ip leslwnac, caw wal 'o'nac. Ax Dios a 'ay spoder scoln 'el 'a yol sc'ab' chamel. Yab'jnac Dios slesl Cristo, yujto 'emmquilal yutjnac sb'a 'a 'a.

⁸ Wach'xam Yunnal, palta yuj jun tzo'n̈ yailal yab'jnac, snachj 'el yu'uj, chajtl yutj syiclni.

⁹ Ax yic 'ix tz'acw 'el'chi, 'ix 'ajx yopiso ya'n colnb'il 'a jun 'ejmn̈ej, 'a smasnil 'anma tzchan 'ab'noc tas tzyala.

¹⁰ Yujto a Dios 'a'jnac yopiso ya'n 'och qui tic 'a 'a, 'icha ya'jnac win Melquisedec 'a pecti cha.

Caw 'ay smay, toto tzquijec*r* 'el qui nab'en 'a Dios

¹¹ Til to wal tas tzin nib'j tzwalb't 'ayx yuj jun tic, palta ya 'oj nachjc 'el eyu'uj, yujto wan e pitb' 'eli.

¹² 'In 'ayx stiempoal eya'n 'och 'a e c'ojol. Smoj to cuywjumx xo ticnec. Palta an̈j jun tzo'n̈ b'ab'l cuynb'il yic Dios, yowlal an̈ja tzat alx 'ayex. Mant 'a e te'nal, lajn ex 'icha junc tz'ulc 'unn tzat chuwi, mant 'a jac tas tzc'uxu.

¹³ A jun tzo'n̈ cuynb'il cha, 'icha lech, 'ixtan̈ej. Yuj cha, a eb' an̈ja tznib'j 'ab'noc jun tzo'n̈ cha, an̈ja lajn eb' 'icha junc tz'ulc 'unin. Ax jun tzo'n̈ cuynb'il tzalni, tas tzcutj qui tojlb'tzanec qui b'eyb'al, an̈ja mantzac nachj 'el yuj eb'.

¹⁴ Ax jun tzo'n̈ cuynb'il ya snachji, lajn 'icha tas tzc'ux eb' 'anma te'n xo. Yuj cha, a eb' tzcuyn jun tzo'n̈ cha, atn eb' te'n xo snab'en. C'aync xo eb' snan 'eli 'aj 'ay jun tzo'n̈ tas wach', 'aj 'ay pax jun tzo'n̈ tas maych'olnil.