A Ch'an̈ Carta D'a Eb' Hebreo 2 - Chuj San Sebastian Bible

Matz tac' tzquijec 'el qui nab'en*r* 'a qui colnb'il

¹ Yuj cha, yowlal caw tzca'c 'och qui nab'en 'a jun tzo'n̈ cuynb'il xlaj cab'ec. Toto ma'ay, 'ay smay jab'jnal 'oj qui wach' juwc 'eli.

² A spaxti Dios yaljnac can eb' ángel pecti', niwn yel'chi. 'Ay eb' quit israelal x'och smul 'a 'a, yujto ma'ix syiclj eb' tas tzyala. Yuj cha, caw x'ajx syailal eb'.

³ Toto 'ixta x'aj eb' cha, ¿tast wal 'oj cutquec qui coln qui b'a an̈ec tic, toto tzquijec 'el qui nab'en 'a jun qui colnb'il caw niwn yel'ch tic? Caw a Cajlilec, a b'ab'l aljnac yab'xil qui colnb'ilec tic. Ax eb' 'ab'jnac, sch'oxjnac 'el eb' chajtlto caw niwn yel'ch jun 'ab'x tic, xyaln pax eb' 'ayn̈ec.

⁴ An̈jtona Dios, ya'jnac testigoal sb'a yuj jun 'ab'x tic. Sch'oxjnac jun tzo'n̈ milagro, yet' jun tzo'n̈ tas tzsat qui c'ojlec quilni, sec chequel to caw niwn yel'ch jun 'ab'x tic. An̈jtona pax Yespíritu, tzyac' pax testigoal sb'a, yujto tzyac' copiso junjn on̈ec, a tzyala, tas tznib'j tzyac'a.

Lajn x'aj Jesucristo quet'ec

⁵ Wan waln yuj junx yolyib'n̈q'uinl tot 'oj jawoc. A jun cha, man̈oc 'a yol sc'ab' eb' ángel 'oj yac' Dios.

⁶ Yujto a 'a Ch'an̈ U'un̈, 'ay 'aj tzyal 'ixtic: Mamin, ¿tas quel'ch an̈ 'anman̈ tic on̈, yuj cha, tzon̈ a nan coti, tzach 'och 'il cuj on̈?

⁷ 'Ay jab' stiempoal ma'on̈ tza'wni 'a eb' ángel on̈, 'ixta 'on̈ otj on̈ a b'oni. 'Ix aln cani to tzon̈ b'inax on̈. 'Ay cab' pax quel'ch on̈.

⁸ Smasnil tas b'ob'il oj tic, 'ix a'cn smasnil 'a yol qui c'ab' on̈, xchi 'a Ch'an̈. Yuj cha, a yic xya'n Dios smasnil tas 'a yol qui c'ab'ec, man̈x junc tas ma'ix ya'cni. Cojxn to a ticnec, mantzac quilc smasnil tas 'ix 'ajx 'och 'a yol qui c'ab'c cha.

⁹ Palta tzquilc nab'n tas 'ajnc Jesús. Yuj qui Mam Dios, 'ay jun tiempoal, ma'ix tza'wni 'a eb' ángel yic wul ya'nc 'och sb'a 'anma'il. Yuj wal swach'c'ojlal Dios, x'el 'a sc'ojol, xcham Jesús cujec qui masnil. Al ticnec, caw niwn swach'il, niwn yel'chi, yujto xyab' syal schami.

¹⁰ B'ob'il smasnil tas yuj Dios, sec chequel to niwn yel'chi. Tznib'ej, to a smasnil eb' yunnal, 'oj tz'acwc swach'l eb' 'icha swach'il. Yuj wal cha, yowlal xyab' Jesucristo qui Colmal syail. 'Ixta x'aj stz'acw 'el'ch yuj Dios.

¹¹ An̈ec on̈ 'ochc yico'oc Dios, junn̈j qui Mamc yet' jun on̈ 'i'nec 'och yico'oc. Yuj cha, a Yunnal Dios tic, matz q'uixw on̈ yalnec yu'tacoc, mto yanb'oc.

¹² 'Ixtc yaj yaln 'a Smam 'a Ch'an̈ U'un̈: 'Oj wal-l ab'xil 'a scal eb' wit chon̈ab', a yic 'ay syamnil eb' yic tzyaln sb'a eb' 'ayach, 'oj ach in b'itnoc 'a scal eb', xchi.

¹³ Yaljnac pax 'ixtic: A Dios yipc'ojlal yaj wu'uj, xchi. An̈jtona', yaln pax 'ixtic: 'Ayn 'ec' 'a tic yet' eb' wunnal xyac' Dios, xchi 'a Ch'an̈.

¹⁴ A eb' tz'och yunnalc Dios yet'oc, chamlb'a yaj sniwnal eb'. Yuj cha, ax Jesús, yowlal 'ix 'och pax sniwnal chamlb'ail, 'icha sniwnal eb' cha. Yuj cha, a yic xchami, 'ix ya'n lajwc yopiso jun win 'aych syajlilc chamel, atn win diablo.

¹⁵ A 'a yic yalan̈, 'icha to preso cajec, yujto caw on̈ xiwc qui cham ta'. Palta a Jesús, a coljnacn̈ec 'el 'a jun xiwlal cha.

¹⁶ Wal yel, man̈ yujoc scoln eb' ángel swulq'ui, palta cujec an̈ yin̈tl on̈ Abraham tic.

¹⁷ Yuj cha, yowlal caw lajn x'aj 'icha an̈ 'anman̈n̈ec tic, sec tztac' yo'ch sc'ojl 'ayn̈ec, tojl tzyutj ya'n 'och qui ti 'a Dios. 'Ix ya'n cham sb'a xajmb'alil, yic tzyi'n 'el qui mulec.

¹⁸ Caw xyab' syail, yic 'ix 'ajx prowal. Yuj cha, a ticnec tztac' yoch quet'ec, yic tzon̈ 'ajxec prowal jun xo.