Hageo 2 - Chuj San Sebastian Bible

Caw wach' x'ajx yatut Dios sb'o'i

¹ A yic 21 yoch yucl 'uj, yic jun ab'il cha, 'ix paxtin pax Jehová 'ayn an Hageo in tic, 'ix yaln 'ixtic:

² A ticnec, al 'ixtc 'a win Zorobabel, 'a win Josué yet' pax 'a smasnil eb' 'anma':

³ A eb' 'iljnac jun yatut Dios 'a yic yaln̈taxi, yet' swach'l yilxi, yal cab' eb' toto lajn wal yilx 'icha jun xe b'o tic. ¿Tom matz nachj 'el jac eyu'uj, to may jac yel'chi toto tzqui lajb'tzejec yet' jun cha?

⁴ Palta man̈ a chab'c'ojloc a b'a ach Zorobabel, ach Josué yet' ex chon̈ab'. Munljan̈ec, yujto an Jehová in, tztac' wuj smasnil, 'ayn 'ec' eyet'oc.

⁵ Man̈ ex xiwoc, yujto 'aychn̈ej Wespíritu eyet'oc, 'icha wutjnac wa'n can in ti', yic xwi'n 'elt eb' e mam eyichm 'a Egipto.

⁶ An Jehová in, an tzwala, to jab'xoj wal tiempo, ax wa'n 'ib'xoc satcha'an̈, yolyib'n̈q'uinl tic, a mar yet' lum lu'um.

⁷ 'Oj wac' 'ib'xoc chan̈ smasnil nacion̈, sec 'ixta 'oj yutc eb' yi'n cot smasnil sricoal, ax wul ya'nc eb' 'a watut tic. An tzwala, to 'oj b'ut'joc 'el yol watut tic yuj tas wach' yilxi.

⁸ An 'ay wic q'uen plata yet' pax q'uen oro.

⁹ A jun watut tic, yel xo wal 'oj b'inaxc 'a yib'n̈ jun 'e'nc 'a b'ab'el. A 'a tic, 'oj wac' junc'ojlal 'a eb' chon̈ab', xchi Dios.

A Dios tztench wan eb' schon̈ab'

¹⁰ A 'a yic 24 yoch sb'aln̈il 'uj 'a yic schab'l ab'il yoch win Darío reyal, ata xpaxtin pax Jehová 'ayn an Hageo in tic, schecb' in Dios, 'ix yaln 'ayn 'ixtic:

¹¹ C'anb'j 'ixtc 'a eb' ya'mal 'och sti eb' 'anma 'ayin, tas yaln in ley.

¹² Q'uinloc 'ay junc winc 'et'jnac jac chib'ej, pichb'il 'och yuj 'a yol spichul, q'uinloc wic yaj jac chib'j cha, yujto 'ix 'ajx xajmb'alil. Toto tztench sb'a sti spichl chi 'a 'ixm pan, mto 'a junc schib'l wal tajnac xo, mto 'a te yal uva, mto 'a aceite, mto 'a jun tzo'n̈ocx tas tzc'uxxi, ¿tom yuj cha, yic Dios tz'ajcn jun tzo'n̈ tas tzc'uxx cha? xa chi 'a eb'. Ax yaln eb' ya'mal 'och sti eb' 'anma cha, chajtlto ma'ay, xchi 'ayin.

¹³ Yuj cha, xin c'anb'n pax 'ixtc 'a eb': Q'uinloc 'ay junc mach tzyamn sniwnal junc chamnc 'anma', man̈ wach'c tz'ajcn yuj 'icha yaln ley, ax tz'aji tzyamn jun tzo'n̈ xwal tic, ¿tom man̈ wach'c tz'ajcn jun tzo'n̈ cha, mto ma'ay? xin chi 'a eb'. 'Ix ta'w eb' ya'mal 'och sti eb' 'anma cha: Yel toni, man̈ wach'c tz'ajcni, xchi eb'.

¹⁴ Xlajw cha, xwaln 'ixtc 'a eb': A Jehová a tzaln 'ixtic: 'Icha wal yaj jun tzo'n̈ cha, 'ixta wal yaj eb' 'anma tic. A smasnil tas tzb'o eb', yet' tas tzlaj cob' yac' eb' 'ayin, jun 'ejmn̈ej man̈ wach'oc.

¹⁵ A ticnec, nac coti tas eyaj 'a yic mantzac eyij 'el yich e b'on pax watut tic.

¹⁶ 'Iltec nab'an, a eb' cob' xmoln junc'loc 'almu yixm 'a yol yet'ul, ax yic xyi'n pax 'elt eb', cojxn lajn̈e 'almu x'el'chi. A eb' xmoln junc 50 ch'ub' yal uva 'a junc yet'l to niwn xon tzq'uet 'a yojol, ax x'aji, cojxn junc'l ch'ub' xq'uet 'a yojol.

¹⁷ An 'ixta xwutj wa'n sat 'ejm tas molb'il eyu'uj, an xwa'ch syab'il tas 'awb'il eyu'uj, xwa'n cot sacb'at 'a yib'an̈, palta man̈ yujoc cha, ex meltzj pax 'ayin.

¹⁸ A 'a yic 24 yoch sb'aln̈il 'uj yic jun ab'il tic, a 'a jun c'u tic xe ya'x can 'ejm yipnub'al yich watut.

¹⁹ Ax ticnec, 'oj eyil wal tas 'oj eyaj 'el'ch yet' e munljel 'a eyojltac. Wach'xam man̈x 'a 'ixm trigo molb'il 'a yet'ul, yet' te uva, te granado, yet' te olivo, mantzac yac' te sat, palta wal 'a jun c'u tic, yet' 'a yic 'oj b'ey tiempo, caw 'oj wa' cot yaxilal 'a eyib'an̈, xchi Dios.

Xyac' Dios sti 'a Zorobabel

²⁰ An̈jtona 'a yic jun c'u cha, 'ix paxtin pax Jehová 'ayin.

²¹ 'Ix yalni to a tzaln 'ixtc 'a win Zorobabel, win gobernador 'a chon̈b' Judá: An 'oj wac' 'ib'xoc satcha'an̈ yet' lum lum tic.

²² 'Oj wac' lajwc 'ejm yip smasnil jun tzo'n̈ nacion̈ 'ay 'a yolyib'n̈q'uinl tic, ax in juln 'ejm can yopiso eb' 'a sat lu'um. 'Oj wac' pil'chjoc smasnil caruaje yic owal, yet' jantcn̈ej eb' 'aych 'a yojol. 'Oj cham no chej yet' eb' soldado 'ay q'ue 'a yib'n̈ no', junjn eb' mun 'oj stzu' cham sb'a eb' yet' eb' ajun yet'oc.

²³ An Jehová in, tztac' wuj smasnil, an tzwal 'ayach: Ach in checb' Zorobabel, to a 'a yic jun c'ul cha, 'oj wa'ch opiso, ach 'oj och yajlilc in jeloc, yujto an ach in si'cn 'eli, xchi Jehová 'a win gobernador cha.