Hageo 1 - Chuj San Sebastian Bible

Tz'ajx b'o yatut Dios jun 'ejm xo

¹ A 'a yic b'ab'l c'u yoch swacl 'uj yic schab'l ab'il yoch win Darío reyal, ata in schec Jehová an Hageo in tic yic tz'at in paxtinc yet' win gobernador 'a Judá, atn Zorobabel, yunnal can Salatiel, yet' pax Josué win sat ya'mal 'och sti eb' 'anma 'a Dios, win yunnal can Josadac.

^2-3 A yic in c'och 'a eb', xwaln 'a eb' 'ixtic: A Jehová tztac' yuj smasnil, a tzaln 'ixtc 'ayex: Ax tic yet' eb' chon̈ab', a tzeyutj eyaln yet' eb' to 'ayt sc'och stiempoal sb'ox chan̈ watut jun 'ejm xo.

⁴ Palta ax xo tic, tze b'o eyatut man̈x jantcoc swach'l tz'aji, tze comn cajni, ya' sb'a ax watut lan̈chjnac can 'ejmi, ¿tom wach' 'ixta tze na'a?

⁵ An tzwal 'ayex, tzam e yil cot e b'a tas wan eyaji.

⁶ Caw niwn cob' tas tze yawej, palta jab' wal sat eyawb'en chi tze molo. Tzex wa cob'i', palta matz ex b'ut'ji. Tzeyu'j tas tzeyuq'uej, palta matz 'ec' e tacn̈ti'al. Tzeya'ch cob' e pichul, palta toxn matz ex q'uixnj yu'uj. A e tojl tze chaj yuj 'aj tzex munlji, matz eyil 'aj tzc'ochi, 'icha to oln e b'olsa 'aj tzeyac' 'ejmi.

⁷ An tzwal 'ayex: Tzcham wal e nan yuj tas xwal 'ayx tic.

⁸ 'Ixquec 'a lum calcte', tzeyi'n cot te te ta', yic tze b'on pax chan̈ watut jun 'ejm xo. 'Ixta to b'i'an, ax in can cajn ta 'a tzaljc'ojlal, ax eyi'n chan̈ in b'i ta'.

⁹ A tze na'a to niwn tas 'oj eyic' 'a e munljel, palta jab' wali. An Jehová in, an tzwala, a tas cob' tze mol 'a yol eyatut, 'icha to an tzwutz'j 'at yet' wic'. ¿Tas yuj 'ixta tzex wutj tze na'a? 'Ixta tzex 'aji, yujto lann̈chjnac 'ejm watut, ya' sb'a ax xo tic, cojn eyatut chi 'ayx 'och 'il e b'oni.

¹⁰ Yuj ton cha, man̈xtzac yac' n̈ab' 'a 'aj 'ayx tic, man̈x 'a pax sb'al lum lum tzyac'a'.

¹¹ An xwij 'och wan ya'n n̈ab' 'a yib'n̈ tas 'awb'il eyu'uj, yet' 'a eb' lum jolmctac witz yet' 'a yib'n̈ smasnil sb'al lum lu'um. Yuj cha, tztacj 'ixm trigo, te uva, te olivo. Man̈x 'a pax n̈ab' tz'em 'a eyib'an̈, yet' 'a yib'n̈ e cajb'en noc', yet' 'a yib'n̈ smasnil e munljel, xchi Dios, xin chi 'a eb' wit israelal.

Syiclj eb' 'anma tas xyal Dios

¹² Yuj cha, a win Zorobabel cha, yet' Josué yet' pax smasnil eb' 'anma paxn̈cta 'a Babilonia, a yic xyab'n eb' spaxti Jehová Dios 'ix wal cha, yuj cha, caw 'ix xiw eb', syiclni eb'.

¹³ 'Ix waln 'ixtc 'a eb': A Jehová, a tzaln 'ixtic: 'Aynn̈ej 'ec' eyet'oc, xchi Dios, xin chi 'a eb'.

^14-15 'Ixta xyutj Jehová ya'n snab'enoc win Zorobabel, gobernador 'a Judá, yet' win Josué, yet' 'a smasnil eb' 'anma'. A 'a yic 24 yoch swacl 'uj, yic schab'l ab'il yoch win Darío reyal, ata xqui yamx 'och qui b'on pax chan̈ yatut Jehová qui Diosalec tztac' yuj smasnil.