Habacuc 2 - Chuj San Sebastian Bible

¹ 'Icha wal yajch junc win stan̈mal chon̈b' 'a yopiso, 'ixta 'oj wutc in maclni wab'i' tas 'oj yal Jehová 'ayin, yic tznachj 'el wu'uj tas 'oj yutc spacn tas 'ix wal 'a 'a, xin chi.

'Ix yac' Jehová spac spaxti Habacuc

² 'Ix yaln Jehová 'ayn 'ixtic: A tas 'oj in ch'ox 'aych tic, wach' tzotj a tz'ib'n can 'a jun pachc lum tz'acb'il lu'um, sec a mach 'oj 'awtnoc, wach' 'oj yutc yi'n b'ey jun tzo'n̈ paxti tic.

³ Wach'xam a tas wan in ch'oxn 'aych tic, 'ayt sjaw stiempoal yuji, palta yowlal 'oj ujoc. Tan̈wj ela', wach'xam 'oj 'ec' tiempo, palta 'oj 'el'chn̈ej.

⁴ Tz'ib'j can paxi, chajtlto a eb' maysch'olnil sb'eyb'al, caw wal tzb'an̈ sb'a eb', palta ax eb' tojl snab'en, pitznn̈ej eb', yujto tzin ya'ch eb' 'a sc'ojol, xchi Dios.

A 'aj 'oj c'ochcn eb' 'ixtm 'anma'

⁵ A eb' 'anma tz'u'w 'an̈, caw wal tzb'an̈ sb'a eb' yuj te 'an̈ cha. Matz 'och wan eb' sayn 'ec' tas tznib'ej. Lajn wal eb' 'icha lum jul 'aj tzmucx eb' 'anma tzchami, may tz'aj sb'ut'j lum jul chi yuj eb' tzcham cha. 'Ixta pax eb' caldeo tzlaj macnc 'ec' eb' lum nacion̈ yico'oc.

⁶ Palta a smasnil eb' 'anma 'a jun tzo'n̈ nacion̈ tz'ijx 'ec' cha, 'oj b'uchwjoc eb' 'a eb' caldeo tz'i'n 'ec' lum lum cha, ax laj yalnc eb' 'ixtic: ¡'Oltacx wal ax tic! Caw tzex 'och ricoal yuj tas man̈ eyico'oc. ¿B'a'n̈ wal tzex 'och wan eyecn syam sb'a smasnil tas tze chaj yuj eyixtm 'anma'il? 'oj schic eb'.

⁷ A wal yic may tas tze na'a, ax sc'och eb' 'ay e b'oc 'a 'a, 'oj yi' chan̈ sb'a eb' ex xib'toc, man̈x 'a xon jac tas 'oj ya'cn eb' 'ayex.

⁸ 'Ix laj eyijcan 'ec' tastc 'ay 'a eb' 'anma 'a jun tzo'n̈ nacion̈, palta a eb' xcant cani, 'oj yi'cc eb' tas 'ay 'ayex. 'Ixta wal 'oj eyaj yuj eb', yujto til wal eb' milb'il eyu'uj, ma'ix 'o'ch e c'ojl 'a eb' 'anma cajn 'a jun tzo'n̈ nacion̈ cha, yet' 'a eb' chon̈b' 'ay 'a yol smacb'en eb'.

⁹ 'Oltac ex, yujto 'ix cob' eyac' b'ut'joc yol eyatut yuj tas xlaj eyelc'oc, sec tztac' e coln e b'a 'a tas 'ay smay e nani.

¹⁰ 'Ixta wal xeyutj eyi'n cot q'uixwelal 'a eyib'n̈ yet' e chon̈ab'. Mun ax 'ix eyij cot chaml 'a eyib'an̈, yujto til wal jun tzo'n̈ nacion̈ xlaj e satli.

¹¹ A eb' xbon chan̈ jun tzo'n̈ muro yet' eb' xbon q'ue spatzb'il eyatut, 'oj 'awjoc chan̈ eb' yuj yaln sb'a yuj smunljel cha.

¹² 'Oltacx wali, xcob' laj e b'o e chon̈b' yuj smasnil tas xlaj eyac' ganar 'a spatc maysch'olnil. Ex 'och ricoal yuj e milm cham 'anma'il.

¹³ A smasnil jun tzo'n̈ e munljel 'aj 'ix c'unb' eb' nacion̈ 'emnc eyuj cha, caw nab'an̈ej. A c'ac' 'oj satnc 'el smasnil tas sb'ojnac eb' cha. 'Ixta 'ix yutj Jehová snani, atn jun tztac' yuj smasnil.

¹⁴ Tz'acn 'oj yutc yojcan 'el smasnil 'anma stzictznil Jehová, 'icha wal tz'aj sb'ut'j 'el a mar yuj a a'.

¹⁵ 'Oltac wal eb' tz'a'n 'u'wc 'an̈ junc yit 'anma'il masnto tzq'ue 'a sjolm yuj eb' yuj yiln eb' sq'uixwelal. 'Ixta pax ex ax tic, 'oltacx wali, yujto a yet' yowl e c'ojol, 'ix eyi'n 'el sq'uixwel jun tzo'n̈ nacion̈ cajn 'a e tz'ey. Toxn̈ej xwotz'm 'ec' eb' eyuj 'icha 'u'm 'an̈.

¹⁶ Ax ticnec, 'ix c'och sc'ul eyico', man̈x 'oj eyijx cha'an̈, palta to 'oj 'ilxoc e q'uixwelal. A Jehová 'oj 'a'nc eyac' e q'uixwloc 'icha junc 'u'm 'an̈. 'Oj eyab' syal yu'uj, 'icha wal yailal 'ix eya'ch 'a yib'n̈ jun tzo'n̈ nacion̈ cha. Yuj cha, a e b'an̈quinal, q'uixweltac 'oj 'ajcn yu'uj.

¹⁷ Ax tic e ch'acjnac 'el eb' te niwc te 'a Líbano, ax ticnec wan eyab'n syal yuj jun cha. Til wal no noc' xlaj e mil ta', ax ticnec, a no 'oj eya'n 'och 'a xiwc'ojlal. 'Ixta wal 'oj eyaji, yujto til wal 'anma xlaj e mil chamoc, ma'ix 'o'ch xon e c'ojl 'a eb' 'anma 'a yolyib'n̈q'uinal yet' 'a schon̈b' eb'.

¹⁸ May yopiso jun tzo'n̈ comn dios tzb'o eb' 'anma'. A jun tzo'n̈ cha, ton̈j tzex yac' satoc. Matz tac' spaxtini, palta ¿tas yuj a eb' tzb'oni, caw tzya'ch eb' yipc sc'ojol?

¹⁹ 'Oltacx wal ax cob' tzeyal 'ixtc 'a junc yechl to b'ob'il 'a te te': Pitzl a wayan̈, xe chi cob' 'a te'. Q'uen̈ wan lin̈an, colwjan̈ quet'oc, xe chi cob' 'a junc q'uen q'uen matz paxtini. A jun tzo'n̈ cha, toc tztac' sch'oxn junc tas 'ayex. Wach'xam cob' caw tzictzni yilx yuj oro mto yuj plata, palta may tas tztac' yu'uj, yujto may spixan.

²⁰ Palta an Jehová in, 'ayn 'ec' 'a yol watut to cojn in 'ay wico'. Yuj cha, smasnil tas 'ay 'a sat lum tic, sictac cab' tz'aj 'a wojltac, xchi Dios.