Habacuc 1 - Chuj San Sebastian Bible

Tzyal Habacuc yuj tas man̈ tojloc

¹ An Habacuc in tic, schecb' in Jehová, in paxtin yet'oc.

² 'Ix waln 'a 'ixtic: Mamin Jehová, ¿b'a'n̈ wal tza chaj ab' tas tzwala? Til wal yel waw cob' walnc in b'a 'ayach yic tzin c'ann a colwal. ¿Tom ma'oj a colwj quet' on̈? Til wal cob' yel waw waln 'aych yuj jantc maysch'olnil 'a qui cal tic on̈.

³ ¿Tas wal yuj tzac' wil tas tz'aj yixtx eb' 'anma', yet' pax maysch'olnilal? Tzanxn̈ej 'aj tzwil jun tzo'n̈ cha. 'Ayxn̈ej owl 'a smasnil lugar yet' tejb'ail.

⁴ Man̈x 'a ley, man̈xtzac b'oyaj eb' 'anma 'a swach'il. A eb' wach' sb'eyb'al, caw tzcan eb' 'a yaln̈ yuj eb' tu sb'eyb'al. Tzjelmtej 'och eb' tojlal 'a maysch'olnilal, xin chi.

Xyac' Dios spac spaxti Habacuc

⁵ Xyaln Dios 'ixtic: Tzcham wal eyiln jun tzo'n̈ nacion̈ oyn xo 'och 'ayx tic. A yic tzeyiln eb', sat cab' e c'ojl eyiln eb'. Yujto 'ayx 'ec' 'a in nab'en tas oj in b'o 'a e cal 'a jun tiempoal tic, palta ma'oj e cha eyab'i' yic 'oj alxoc 'ayex.

⁶ 'Oj wi' cot eb' caldeo wul yac' owl eyet'oc. A jun tzo'n̈ 'anma cha, jun 'ejmn̈ej caw matz 'o'ch xon jac sc'ojl eb'. Cojn owl tznib'j eb', c'uxn tz'ec' yoymtoc eb' yolyib'n̈q'uinal yuj smacn 'ec' eb' lum lum to man̈ yico'oc.

⁷ A jun tzo'n̈ 'anma cha, caw 'ay smay eb', tzxiw eb' 'anma yuj eb'. Caw tzyij chan̈ sb'a eb'. Mun a sley eb' 'a yol yico', a tzyac' eb' c'anlb'axoc.

⁸ Ax schej eb' tzc'ana, yel xo wal jeln sb'ey no 'a yib'n̈ no leopardo. Ax eb' soldado 'ay q'ue 'a yib'n̈ no', yel xo wal ow eb' 'a yib'n̈ no 'ocs tz'ec' 'a 'ac'wal. Caw man̈x yalnb'ilc sb'isl schej eb' cha, najtto 'ay e no', tz'at lemnjoc e no 'a owl cha, 'icha wal s'at lemnjoc no c'uc'um yic tzyamn no schib'ej.

⁹ C'uxn tzsatl eb' smasnil tas 'a 'aj tzlaj 'eq'ui. Caw tzniwtj chan̈ xiwc'ojlal yuj tas tzb'o eb'. Yel xo niwn sb'isl eb' 'anma tzyij 'at eb' 'icha presoal, lajn wal sb'isl eb' 'icha yarenail sti a mar.

¹⁰ Ton̈j tzb'uchwj eb' 'a eb' rey yet' 'a eb' 'anma to niwn yel'ch yalni. Ton̈j tzewj eb' yuj jun tzo'n̈ chon̈b' 'aych smuroal. Tzlaj yi' cot eb' lum lu'um yic tzb'on chan̈ eb' ste'nub'oc 'a spatc 'el muro cha. 'Ixta tz'aj yem junc chon̈b' chi yuj eb'.

¹¹ Cojnn̈ej tz'em junc chon̈b' chi yuj eb', tz'atx eb' 'a junc xo chon̈b' yac' owal. 'Icha wal yec' chacxuxm 'ic', 'ixta wal yec' eb'. Caw tz'och smul eb' 'ayin, yujto a yip eb', a chi tzya'ch eb' sdiosaloc, xchi Dios.

Scha aln pax Habacuc jun 'ejm xo

¹² Mamin Jehová, ¿tom man̈ toc 'aych 'ec' 'a jun 'ejmn̈ej jun? Ach in Diosal, cojxn̈ej ach ton Dios ach. Ma'oj on̈ a cha satl 'a jun 'ejmn̈ej on̈, qui Colmal aji. Ach 'ix ac' yip eb' caldeo yuj a'n 'och yailal 'a quib'n̈ yuj qui mul on̈.

¹³ Ach tic, caw wal matz chaj a c'ojl tas tu', matz a nib'j el jun tzo'n̈ qui maysch'olnilal an̈ 'anman̈ tic on̈. ¿Tas pax yuj ton̈j tzach 'och q'ueln 'a eb' 'anma maysch'olnil tic jun? 'In a eb' 'anma wach' to wal 'a yib'n̈ eb', 'a eb' wan satx 'el yuj eb'.

¹⁴ ¿Tas yuj 'icha no chay 'ay 'a yol a mar, 'ixta tzon̈ otj an̈ 'anman̈ tic on̈, 'icha xoj no noc' may syajlil?

¹⁵ A eb' caldeo tz'i'n 'ec' jun tzo'n̈ xo nacion̈, lajn eb' 'icha tzyac' eb' yamn chay. A eb' yamn chay cha, tzyij q'uet eb' no chay chi yet' slucub', mto yet' schim, caw wal tzalj eb', yic tzyiln eb' tz'aj q'uet b'uln no'.

¹⁶ Tzyac' eb' 'emmquilal 'a schim, yet' 'a slucb' cha. Tzya'n eb' xajmb'al, tzn̈usn eb' incienso yuj sch'oxn 'el eb' yemmquilal. Caw wal tzalj eb', yujto wach' swa eb' yuj syamc'ab' cha.

¹⁷ ¿Tom 'oj a'n̈j yamchjoc jun tzon̈ xo nacion̈ yuj eb' caldeo yet' yipal soldado eb', yic tzsatx 'el eb' yuj eb' 'a man̈x 'a niwnc'ojlal?