Gn 9 - Chuj San Sebastian Bible

A strato Dios yet' Noé

¹ 'Ix yaln can Dios wach' paxti 'a yib'n̈ Noé, yet' 'a eb' yunnal. 'Ix yaln 'a eb' 'ixtic: Niwtj cab' 'el eyunnal, 'a'c b'ut'joc sat lum lum tic.

² Smasnil no noc' 'ay 'a sat lum lum tic, no ch'ic, yet' no 'ay 'a yojl a mar, 'oj xiw e no 'ayex. A smasnil jun tzo'n̈ noc' tic, tzcan e no 'a yol e c'ab'.

³ A smasnil no noc', tztac' e chin e no', tztac' e lon smasnil te 'itaj, yujto an tzwac' 'ayex.

⁴ Palta 'ay jun tas ma'oj e chi', atn no chib'j 'ayt 'och schiq'uil, yujto a schic'l no cha, a 'aych sq'uinloc no'.

⁵ An 'oj wac' syailal eb' 'anma tzmiln cham yit 'anma'il, ax no noc' tzmiln cham 'anma', 'oj wac' ma'xoc cham pax no'.

⁶ A mach tzmiln cham yit 'anma'il, 'anma 'oj milnc chamoc, yujto ax 'anmax tic, 'icha in tic, 'ixta ex wutj ex in b'oni.

⁷ Ax xo tic, niwtj cab' eyunnal, b'ut'j cab' 'el yolyib'n̈q'uinl tic eyu'uj, xchi Dios.

⁸ 'Ix yaln pax Dios 'a Noé, yet' 'a eb' yunnal 'ixtic:

⁹ A ticnec, tic tzwa'cn jun in trato tic eyet'oc, yet' 'a smasnil eyin̈tl b'aq'uin̈,

¹⁰ yet' 'a smasnil no noc' 'ix 'elt eyet' 'a yojl te barco tic, no ch'ic, no cajb'en noc', no calte'al noc', yet' smasnil no noc' 'ay 'a yolyib'n̈q'uinl tic.

¹¹ A jun in trato 'oj wac' eyet' tic, man̈x 'oj in jela'. Man̈x 'oj in satl eb' 'anma', no noc' yet' a a', atn owl yaxn̈ab'. Man̈x 'oj jawc owl yaxn̈ab' 'oj satnc 'el smasnil lum lum tic jun 'ejm xo, 'icha jun x'ec' tic.

¹² Yajcn yechl in trato 'oj wa'cn eyet' tic, yet' 'a smasnil no noc' 'a smasnil tiempo.

¹³ Tic xwa'cn 'och jun chacpan 'a scal 'asun, atn jun chi yechl in trato yet' eb' 'ay 'a sat lum tic.

¹⁴ A yic tzwa'n 'och 'asun, ax jun chacpan cha, 'oj checljoc chan̈ 'a scal 'asun.

¹⁵ A yic cha, ax in nan cot in trato 'ix wa'cn eyet'oc, yet' pax 'a no noc'. Yuj cha, man̈x 'a owl yaxn̈ab' 'oj e satn 'eli.

¹⁶ A yic tzwiln jun chacpan 'a scal 'asn cha, tzin nan cot jun in trato 'ix wac' eyet' 'a yolyib'n̈q'uinl tic, yet' 'a smasnil no noc' 'a smasnil tiempo.

¹⁷ Atn yechl in trato tic 'ix in b'o eyet'oc, yet' 'a smasnil no noc' 'ay 'a sat lum tic, xchi Dios 'a Noé.

Win Noé yet' eb' yunnal

¹⁸ A win Sem, win Cam yet' win Jafet, atn eb' tic yunnal win Noé, eb' x'elt 'a yojl te barco yet'oc. A win Cam cha, smam win Canaán.

¹⁹ Atn 'a ewin 'oxwn̈ tic, xcot yin̈tl eb' 'anma sactzicnac yaj 'a sat lum lum tic.

²⁰ Xlajw cha, 'ix munlj pax win Noé 'a sat lum lum tic, syamn 'och win yawn te uva.

²¹ 'Ay jun c'ual, 'ix yu'n win yalil te uva cha, xq'ue te 'a sjolm winac, 'ix sat sc'ojl win yu'uj. Xyi'n 'el win spichul, 'ix 'e'cn t'ocn win 'a yol smantiado.

²² Ax yic xyiln win Cam, atn win smam win Canaán, to jitn 'el smam cha, 'ix tzetzni, 'ix 'at yalnc yab' eb' yu'tac chi schawn̈il.

²³ A yic xyab'n Sem yet' Jafet, 'ix yi'n 'at eb' jun te sábana, 'ix ya'n q'ue eb' 'a sjolm squelab', spatquil eb' 'ix b'eyi, 'ix c'och eb' 'a smam cha, 'ix slich'n 'at eb' 'a yib'an̈, chuc 'aj q'ueln 'at eb', sec matz yil eb' sniwnal smam cha.

²⁴ Ax yic 'ix 'el 'a sat Noé cha, 'ix yab'n win tas sb'o win Cam chi 'a 'a.

²⁵ Yuj cha, xyaln Noé chi 'ixtic: Maysch'olnil cab' tz'ajcn 'el'ch ni Canaán tic, mosoal xoj cab' tz'ajcn 'och ni 'a eb' yu'tac tic, man̈ yico'oc sb'a na, xchi winac.

²⁶ 'Ix yaln pax win 'ixtic: Ya' cab' Jehová in Diosal syaxilal 'a yib'n̈ ni Sem, ax ni Canaán tz'ochcn mosoal 'a na.

²⁷ Lewn cab' tz'ajcn slum ni Jafet yuj Dios; 'aj cab' cajn ni 'a yol schon̈b' ni Sem, ax ni Canaán tz'ochcn pax smosoal 'a na, xchi Noé.

²⁸ Xlajw yec' jun niwquil owl yaxn̈ab' cha, 350 ab'il to 'ix 'ec' Noé,

²⁹ yuj cha, 950 ab'il xyila, xlajw cha xchami.