Gn 6 - Chuj San Sebastian Bible

A smaysch'olnilal eb' 'anma'

¹ A yic xq'uib' sb'isl eb' 'anma 'a sat lum lum tic, 'ay yisl eb' x'alji.

² Ax yic xyiln 'och ewin yunnal Dios eb' 'ix yisl ewin 'anma cha, to caw wal wach' yilx eb' 'ix, 'ix syamn 'och ewin si'lan yistzil 'a scal eb' 'ix.

³ Yuj cha, xyaln Jehová 'ixtic: Man̈x 'oj in tench wann̈ej eb' 'anma tic 'a smaysch'olnilal, yujto chamlb'a 'anman̈ej eb', cojxn̈ej 120 ab'il tz'ec' 'anma 'a yolyib'n̈q'uinl tic, ax satl eb', xchi.

⁴ A 'a yic jun tiempoal cha, xyij sb'a eb' yunnal Dios yet' eb' 'ix yisl ewin 'anma cha, ax yunnal eb' x'alji, 'ix 'ajx sb'ic eb' Nefilim. Atn wal ta 'ix checlj chan̈ eb' 'anma to caw wal 'ay yip, b'inab'il eb' 'a yic pecti cha.

⁵ Ax xyiln Jehová, to yelc'ojlal tzb'o eb' 'anma maysch'olnil 'a sat lum lum tic, caw cojxn 'a maysch'olnil 'aych snab'en eb'.

⁶ Yuj cha, xyaln 'ixtic: Octom wal ma'ix in b'o jun tzo'n̈ 'anma tic, caw wal ya tzwab' yuj eb'.

⁷ Caw wal tztac in c'ojl yuj eb' 'anma xin b'o tic. Yuj cha, 'oj in satl eb' 'a sat lum lum tic, yet' no cajb'en noc', no calte'al noc', no tzjuc sb'a 'a sat lu'um, yet' pax no ch'ic, xchi.

⁸ Cojxn wal Noé wach' snab'en 'a sat Jehová.

Sb'ojnac win Noé jun te barco

⁹ Atn yab'xil win Noé tic: A Noé, caw wal wach' xyutj sb'a 'a sat Dios, cojxn win wach' snab'en 'a scal eb' 'anma 'a yic jun tiempoal cha, 'ix sb'eylb'ej 'icha tznib'j Dios.

¹⁰ 'Oxwn̈ yunnal win x'alji, atn win Sem, win Cam yet' win Jafet.

¹¹ A 'a sat Dios, man̈x yalnb'ilc maysch'olnilal tzb'o eb' 'anma 'a yolyib'n̈q'uinl tic, comn xoj tzlaj meltzj 'och eb' 'a yit 'anma'il.

¹² 'Ix yiln Dios to smasnil 'anma 'ix juw 'eli, cojxn maysch'olnil tzlaj sb'o eb'.

¹³ Yuj cha, xyaln Dios 'ixtc 'a win Noé: Tox 'ix in na ticnec, to 'oj in satl smasnil eb' 'anma', yuj eb', tzlaj niwtj maysch'olnil 'a yolyib'n̈q'uinl tic.

¹⁴ A ticnec b'o junc te barco niwquil tz'aji, a te te 'ay stzatjil tza'ch 'a 'a; cuartotac tz'aj yojol, caw wach' tzotej. Tza'ch tzatj 'a 'aj tzchaj sb'a te', tza'ch 'a spatquil, yet' 'a yojol, sec wach' matz 'och a a 'a yojol.

¹⁵ 'Ixtc 'oj otc a b'on te': 135 metro tzotj spac'b'il, nan̈l yoxlschawinc metro tzotj sat, nan̈l schan̈lajn̈il metro tzotj ste'il.

¹⁶ 'Oxc'aj tz'ajb't 'a cha'an̈, ax 'a yib'n̈ cha, ata tzcan junc swentnual, nan̈l metro tz'aji, yet' junc smac 'a jun pac'oc.

¹⁷ Wal yel 'oj wa' cot jun niwquil owl yaxn̈ab' 'oj 'a'n b'ut'joc 'el sat lum lum tic, ax satl smasnil tas pitzn 'a sat lu'um.

¹⁸ Palta tzin b'ocn jun in trato et'oc. A 'a yojl te barco cha, ata 'oj 'och eb' onnal yet' yistzil, yet' 'ix estzil ach tic.

¹⁹ Ax yoch pax no noc' eyet' 'a yojl te barco cha, jun no smam jun no snun, a tzyal yin̈tl no 'ay 'a yolyib'n̈q'uinl tic, sec wach' pitzn yin̈tl junjn c'aj e no', 'icha eyaj ax tic.

²⁰ Chatcwan̈il tz'aj yoch yin̈tl junjn c'aj e no', tz'och no ch'ic, no cajb'en noc', no calte'al noc', yet' no tzjuc sb'a 'a sat lu'um, sec wach' matz satl e no'.

²¹ Tza molb'tzan can 'och smasnil tas tzc'uxxi, yic wach' 'ay tas tza c'uxu, yet' tas tzc'ux e no noc' cha, xchi Dios.

²² Yuj cha, syiclni Noé sb'on smasnil tas xyal Dios 'a 'a.