Gn 50 - Chuj San Sebastian Bible

¹ Ax José 'ix 'och la'n̈joc 'a smam, caw x'oq'ui stz'ub'n can 'elt sti smam cha.

² Xlajw cha, xyaln José 'a eb' 'a'm remel tzmunlj 'a 'a, to tzya'ch eb' remel 'a sniwnal smam cha, atn win Israel, sec wach' matz c'a'i.

³ Chawinc c'u sucx 'och jun remel chi 'a sniwnal smam cha, yujto 'ixta sb'isl sc'ul tzyi'aj, yic tz'ajx 'och junc remel 'a sniwnal junc chamnc 'anma'. 'Ix cus ewin 'aj Egipto 'a 70 c'ul yuj schamlil win Jacob cha.

⁴ Yic xlajw 70 c'u cha, 'ixta b'i'an, x'at José paxtinc yet' ewin 'ay yopiso 'a sdespacho win rey faraón, xyaln 'a ewin 'ixtic: —Toto wach'n 'a e sat, 'o'ch cab' e c'ojl 'ayin, tzex 'at paxtinc 'a win rey wu'uj,

⁵ yujto a yic wan scham win in mam, 'ix yal 'ayin, to tzwac' in ti', chajtlto ata tzin muc in mam 'a jun yet'l eb' chamnc 'anma b'ob'il can yu'uj. A jun cha, ata 'ay 'a yol yic lum Canaán, yuj cha, tzin tew 'ayex, to tz'at in mucn in mam cha. Cojn tzlajw in mucn cani, tzin paxta, xchi win José.

⁶ Xyaln win rey 'a 'ixtic: —'Ixc 'at muc sniwnal a mam cha, 'icha wal xyutj yaln can 'ayach, xchi winac.

⁷ Xlajw cha, xcot José wul smuc sniwnal smam cha. Smasnil ewin 'ay yopiso tzmunlj 'a sdespacho win rey, yet' smasnil eb' 'ichmtac winc 'a yol yic Egipto cha, xcot eb' yet' win José.

⁸ 'Ix cot smasnil eb' yunnal win Jacob, yet' yunnal win José, yet' smasnil yunnal ewin yu'tac winac. Cojxn eb' cotc 'unn xcan yet' scajb'en noc' eb' 'a lum Gosén.

⁹ 'Ay pax eb' soldado xcot yet' scaruaje, 'ay pax eb' 'ay q'ue 'a yib'n̈ schej, yuj cha, til wal 'anma xcot yet' José cha.

¹⁰ A yic xjaw eb' 'a Goren-ha-atad, 'a stojlal 'aj tzq'uel c'u 'a a niwn a Jordán, ata 'ix stan̈wj eb' yac'wlil sniwnal win Jacob, ax José caw wal niwquil xcus yuj smam chi 'a uque c'ual.

¹¹ A yic xyiln eb' cananeo 'ayc' 'a jun lugar cha, tas tz'aj stan̈w 'ac'wl eb' 'aj Egipto cha, xyaln eb' 'ixtic: A eb' 'aj Egipto tic, caw wal ya tz'aj eb' stan̈w 'ac'wl yuj mach tzcham 'a eb', xchi eb'. Yuj cha, xyac' eb' sb'ic jun lugar chi Abel-misraim, ata 'ay 'a stojlal 'aj tzq'uel c'u 'a a niwn a Jordán.

¹² A smasnil tas 'ix yalcn win Jacob 'a ewin yunnal, 'ix syiclj eb' sb'oni.

¹³ 'Ix yij 'at ewin sniwnal win 'a yol yic Canaán, smucn ewin 'a yol q'uen oln q'uen 'a Macpela, atn q'uen manb'il can yuj Abraham 'a win Efrón hitita; a jun cha, x'och scampusanoc ewinac. A jun lum 'aj 'ay q'uen oln q'uen cha, ata 'ay 'a stojlal 'aj tzq'uel c'u 'a lum Mamre.

¹⁴ A yic xlajw smucn win José sniwnal smam cha, xmeltzj pax yet' smasnil eb' yu'tac yet' smasnil eb' 'aj Egipto ajun yet'oc.

Tzyac' José sniwnal sc'ojl eb' yu'tac

¹⁵ Yic xlajw xcham win Jacob, syamn 'och ewin yu'tac win José chi snani, xyaln ewin 'ixtic: A ticnec, tecn 'oj cot yowl win José tic 'ayn̈ec, tecn 'oj ya'x win spac 'icha cutjnaquec winac, xchi ewinac.

¹⁶ Yuj cha, xyaln 'at ewin sti 'ixtc 'a win José cha: A yic mantzac cham qui mamec, xyaln cani, to a tzaln 'aych 'ixtic:

¹⁷ Tzin tew 'ayach, to tzac' niwnc'ojlal 'a yib'n̈ ewin o'tac tic, yuj tas tu sb'o ewin 'ayach, xchi. 'Ixta xyutj win yaln cani, yuj cha, an̈ tic schecb' on̈ qui Diosal yet' qui mamc cha, tzcal 'ayach, to tzac' niwnc'ojlal 'ayn̈ on̈, yuj jun tu nab'enal xcac' 'ayach, xchi ewinac. Ax yic xyaln ewin checb' chi schecnb'il, x'oc' chan̈ José.

¹⁸ A yic xc'och ewin yu'tac 'a yojltac, x'em n̈ojnjoc eb' masnto x'emch snan̈l sat eb' 'a sat lu'um, xyaln ewin 'a 'ixtic: —An̈ tic on̈ wu'tac, a checb' caj on̈, xchi ewinac.

¹⁹ Palta 'ix yaln win José 'a eb' 'ixtic: —Man̈ ex xiwoc. An tic matz tac' wa'n 'och in b'a sjelc Dios.

²⁰ Ax tic, xe na e b'on jun tu nab'enal 'a in patic, palta ax Dios, xjeln jun tu nab'enal chi 'a wach'il, sec niwn 'anma tzcolchji, 'icha jun wan quilnec tic.

²¹ Yuj cha, man̈ ex xiw yuj jun cha; an 'oj wac' tas 'oj e c'ux yet' eyunnal, xchi José 'a eb' yu'tac cha. 'Ixta xyutj José ya'n sniwnal sc'ojl eb', yujto caw wach' xyutj paxtinc sb'a 'a eb' yet' schamc'ojlal.

Xchamlil José

^22-23 'Ix canto cajn José 'a Egipto yet' eb' yu'tac cha. 'Ix yil to eb' yixchicn win Efraín, atn yunnal, an̈jtona 'ixta pax eb' yunnal win Maquir, atn win yunnal win Manasés. 'Ix yil to sq'uib'cn eb' yixchicn cha. 110 ab'il sq'uinal yic xchami.

²⁴ 'Ay jun c'u, 'ix yal José 'ixtc 'a eb' yu'tac: Jab'xoj wal tiempo ax in chami, palta a Dios 'oj jawc colwjoc eyet'oc. A 'oj eyi'n 'el 'a jun chon̈b' tic, ax ex yi'n 'at 'a lum lum 'ix yaltj can 'a Abraham, 'a Isaac, yet' 'a Jacob, xchi José cha.

²⁵ Xlajw cha, xyaln 'a eb' yican cha, to tzyac' eb' sti 'a 'a; xyaln 'a eb' 'ixtic: Wal yel a Dios 'oj jawc colwjoc eyet'oc. A yic 'oj ujc jun cha, yic tzex 'at cha, tzeyij 'at in niwnal tic eyet'oc, xchi José.

²⁶ Yuj cha, 110 ab'il sq'uinl win José yic scham win 'a Egipto, 'ix 'ajx 'och remel 'a sniwnal winac sec matz c'a'i. Xlajw cha, x'ajx 'ejm win 'a yol scaxail 'a Egipto cha.