Gn 46 - Chuj San Sebastian Bible

C'ochnc Jacob yet' eb' yunnal 'a Egipto

¹ Xlajw cha, 'ix 'at Jacob yet' smasnil tas 'ay 'a 'a. A yic xc'och 'a Beerseba, xya'n xajmb'al 'a Dios atn sDiosal yet' smam.

² A 'a yic jun 'ac'wl cha, waychil xpaxtin Dios yet'oc, xyaln 'ixtic: Jacob, xchi. Xta'w win 'a 'a: —Waj 'a tic Mamin, xchi.

³ Xyaln Dios 'a 'ixtic: —An ton tic a Diosal in, sDiosal in pax a mam, man̈ ach xiw a 'at 'a Egipto, yujto ata 'oj wa'ch eb' en̈tl niwc chon̈b'al.

⁴ 'Oj in 'at et' 'a Egipto cha, 'oj woch yet' eb' en̈til yic 'oj meltzjoc pax cot eb' a slugar tic jun 'ejm xo. Ax yic 'oj a chami, a wal onnal José a 'oj 'ilnc a chami, xchi Dios 'a win Jacob cha.

⁵ Xlajw cha, xya'n q'ue ewin yunnal Israel chi smam 'a yojl te caruaje xya' cot win rey cha. 'Ix q'ue pax eb' 'unin yet' eb' 'ix yistzil ewin chi 'a yojl te'. Xlajw cha, x'elx ewin 'a Beerseba.

⁶ X'at Jacob yet' smasnil eb' yin̈tl 'a Egipto yet' smasnil tas 'ay 'a 'a; xyi'n 'at eb' scalnelu, swacax, yet' smasnil tastc 'ay 'a eb' 'a Canaán cha.

⁷ Xyij 'at Jacob smasnil eb' yunnal, eb' yisil yet' eb' yixchiquin, 'ix 'at eb' yet' 'a Egipto.

^8-15 Eb' yune 'ix Lea yet' Jacob 'aljnac 'a lum Padan-aram, atn eb' tic: Rubén, Simeón, Leví, Judá, Isacar, Zabulón yet' 'ix Dina. 33 sb'isl eb' 'a smasnil, eb' winac yet' eb' 'ix 'ix. Eb' yunnal win Rubén: atn Hanoc, Falú, Hezrón, yet' win Carmi. Eb' yunnal Simeón: atn Jemuel, Jamín, Ohad, Jaquín, Zohar, yet' win Saúl, win yune 'ix 'aj Canaán. Eb' yunnal Leví: atn Gersón, Coat yet' win Merari. Eb' yunnal Judá: atn Er, Onán, Sela, Fares yet' win Zara. (Palta a win Er yet' win Onán chamnc xo ewinac yic x'elt eb' tic 'a Canaán.) Eb' yunnal win Fares cha: atn Hezrón yet' win Hamul. Eb' yunnal win Isacar: atn Tola, Fúa, Job yet' win Simrón. Eb' yunnal win Zabulón: atn Sered, Elón yet' win Jahleel.

^16-18 Eb' yune 'ix Zilpa yet' win Jacob, atn 'ix ya'mal servil 'ix Lea 'ac'b'il yuj Labán, atn eb' tic: Gad yet' Aser. Waclajn̈wan sb'isl eb' 'a smasnil. Eb' yunnal win Gad: atn Zifión, Hagui, Ezbón, Suni, Eri, Arodi yet' Areli. Eb' yunnal Aser: atn Imna, Isúa, Isúi, Bería, yet' jun yanb' eb' Sera sb'i. Eb' yunnal win Bería: atn Heber yet' win Malquiel.

^19-22 Eb' yune' 'ix Raquel yet' win Jacob, atn José yet' Benjamín. Chan̈lan̈wan̈ sb'ey eb' yet' yunnal. Eb' yunnal win José yet' 'ix Asenat, atn Manasés yet' win Efraín. A eb' tic, ata 'aljnac eb' 'a Egipto. A 'ix Asenat cha, yisl jun win tzcuch Potifera, ya'mal 'och sti eb' 'anma 'a sdiosal 'a jun chon̈b' tzcuch On. Eb' yunnal Benjamín: atn Bela, Bequer, Asbel, Gera, Naamán, Ehi, Ros, Mupim, Hupim yet' Ard.

^23-25 Eb' yune 'ix Bilha yet' win Jacob, 'ix ya'mal servil 'ix Raquel 'ac'b'il yuj Labán, atn Dan yet' Neftalí. Ucwn̈ eb' 'a smasnil yet' yunnal. Win yunnal Dan, cojn win Husim. Eb' yunnal win Neftalí: atn Jahzeel, Guni, Jezer, yet' Silem.

²⁶ 'Ay 66 eb' yin̈tl win Jacob 'a smasnil, atn eb' tic ajun yet'oc yic xc'och win 'a Egipto; atn wal jun tzo'n̈ yin̈tl win tic, chuc pax yaj eb' 'ix yalb' winac.

²⁷ Chuc pax yaj José yet' chawn̈ eb' yunnal 'aljnac 'a Egipto cha, yuj cha, 70 sb'isl win Jacob yet' eb' yunnal yet' eb' yixchiquin yic 'ayx 'ec' win 'a Egipto cha.

²⁸ Sb'ab'l checn 'at Jacob win Judá yic tz'at yalnc yab' José, sec tz'at scha 'a Gosén. Ax yic xc'och win 'a Gosén cha,

²⁹ xyaln José to tz'ajx lista scaruaje yic tzwul schanc smam. A yic xjaw 'a yojltac smam cha, x'och la'n̈joc 'a 'a, caw najt hora xyac' yoc' 'ejm 'a squelb' smam cha.

³⁰ Xyaln Israel 'a José 'ixtic: —A ticnec tox ach wilchi, tic wal pitzn ach to, tic wach' a c'ojol, tztac' xo in cham ticnec, xchi winac.

³¹ Xlajw cha, xyaln José 'a eb' yu'tac yet' 'a smasnil eb' yunnal Jacob cha: —Tic tzin 'at wal 'a win rey, ax waln 'a win 'ixtic: Smasnil eb' wu'tac, yet' eb' yin̈tl in mam 'ay 'a Canaán, tox xjaw eb' wet'oc.

³² Ajun smasnil scalnelu, swacax, yet' smasnil tas 'ay 'a 'a, yujto a smunljel eb', atn 'ilj calnelu, yet' 'ilj wacax, 'ixta 'oj wutc waln 'a win eyu'uj.

³³ Yuj cha, ax yic 'oj eyawtx yuj win rey cha, ax sc'anb'n 'ayex, tastc e munljel, toto xchi,

³⁴ tzeyalni, chajtlto 'ilm ex calnelu, 'ilm ex pax wacax. Cojn no calnelu tic tzqui caj 'icha eb' qui mam quichm on̈, xe chi 'a winac, sec wach' 'oj e can 'a lum Gosén tic, yujto a ewin 'aj Egipto tic, 'ay yowlal yuj eb', toto junn̈j tz'aj eb' yet' eb' cajm calnelu, xchi José cha.