Gn 45 - Chuj San Sebastian Bible

Schecltej 'el sb'a José 'a eb' yu'tac

¹ Ma'ix techj yuj José, yic matz 'oc' chan̈ 'a sat smasnil ewin tzmunlj 'a yol yatut cha, yuj cha, caw 'ip x'awj cha'an̈, xyaln 'ixtic: 'Eln̈ec e masnil 'a tic, xchi. Man̈x 'a junc ewin munljum chi 'ayc' yet' José yic xyaln 'a eb' yu'tac cha, to yu'tac sb'a yet' eb'.

² Caw 'ip x'oc' cha'an̈; yuj cha, smasnil eb' 'aj Egipto xyab' eb' jun 'ab'x cha, xc'och speclal jun chi 'a yol sdespacho win rey.

³ Xyaln José 'a eb' yu'tac chi 'ixtic: —An ton tic José 'in. ¿Yelm wali pitzn to qui mamc cha? xchi winac. Caw xiw chan̈ eb' yu'tac chi 'a yojltac; man̈xtzac stac' xon spacn ewin 'a win yuj xiwlal.

⁴ Xyaln win José chi 'ixtc 'a eb': —Tzwal 'ayx ticnec, nitzc cot e b'a 'a in tz'ey, xchi. Ax yic snitzn 'ochch sb'a eb', xyaln 'ixtc 'a eb': —An José in, wu'tac in b'a eyet'oc. An ton tic in e chon̈jnac cot 'a ewin ismaelita, ewin chon̈wjum 'a Egipto tic.

⁵ Palta man̈ tac e c'ojol, man̈ cot cab' pax eyowl 'ayx junjn ex, yujto chon̈b'iln cot eyuj 'a tic, yujto 'ixta snab'en Dios 'a wib'an̈, yuj cha, in b'ab'l cotcn eyu'uj, sec til wal eb' 'anma 'oj colchjoc 'el wu'uj.

⁶ Schab'l nant ab'il yel yich wejl 'a chon̈b' tic, o'eto ab'il 'oj yac'a', wach'xam 'ay tas cob' tz'awxi, palta may xon jac tas 'oj yac'a'.

⁷ A Dios a 'in checn b'ab'ljoc eyu'uj, sec wach' matz satl quin̈tlec 'a sat lum lum tic, sec tzex in col 'a jun niwquil wejl tic.

⁸ Yujto 'ixta 'ix yutj Dios in schecn cot can 'a jun lugar tic, man̈oc ex in eya'cn coti. A Dios in 'a'n 'och 'ajnab'enal 'a win rey, yic tzwa'n yajlil 'a smasnil tas 'a yatut, yet' 'a smasnil yol yic Egipto tic.

⁹ A ticnec, 'ixquec mu'c 'a qui mamc cha, tzeyaln 'a 'ixtic: 'Ixtc wal yaln ni onnal José: A Dios in 'a'n 'och yajlil 'a yol yic Egipto tic, yuj cha, cotn̈ wul in ela', man̈ a ma'q'ui.

¹⁰ Ata 'oj a can cajn 'a lum Gosén, sec wach' la'n cajn ach 'ec' 'a in tz'ey yet' smasnil eb' onnal, yet' eb' eachiquin, yet' pax a cajb'en noc', yet' smasnil tas 'ay 'ayach.

¹¹ A 'a tic 'oj wac' smasnil tas tza c'ux yet' smasnil eb' onnal, yet' smasnil mach 'ayc' et'oc, yujto o'eto ab'il 'oj yac' jun wejl tic, xchi na, xe chi 'a 'a.

¹² Testigo ni Benjamín tic yet' ex ax tic, to caw an tzwal jun paxti tic.

¹³ Alc wal 'a qui mamc cha, chajtlto caw niwn wel'ch 'a yol yic Egipto tic, yet' 'a smasnil tas xeyil 'a tic. 'Ixquec eyic' qui mamc chi muc'uc, xchi José 'a eb'.

¹⁴ 'Ix 'och la'n̈joc José 'a sjaj win Benjamín, atn jun yu'tac cha, syamn 'och yoq'ui. An̈jtona pax Benjamín cha, x'oc' chan̈ pax 'a yic la'n 'och 'a sjaj José cha.

¹⁵ 'Ix stz'ub'n 'elt José sti jun tzo'n̈ xo eb' yu'tac cha, 'ix 'oc' pax 'a yic la'n 'och 'a eb'. Xlajw cha, ste'wtzan sb'a ewin yu'tac chi spaxtin yet'oc.

¹⁶ Wal 'a yajn̈ej xc'och speclal 'a sdespacho win rey, chajtlto yu'tac José ewin xc'och cha. Caw stzalj win rey chi yet' eb' yit yajlil.

¹⁷ Xlajw cha, xyaln win 'a win José 'ixtic: —Al 'a ewin o'tac cha, ya' cab' 'och ewin yictz schej, tzmeltzj cab' ewin 'a Canaán cha.

¹⁸ Tzyi'n cot ewin a mam cha, yet' smasnil yunnal. A wal lum lum caw wal wach' 'a Egipto tic, a lum 'oj wac' 'a winac, a wal 'aj wach' tz'aj 'awb'en, ata wach' 'oj wa eb' yet' yunnal.

¹⁹ Al 'a ewinac to tzyij ewin scaruaje 'a tic, sec tztac' yi'n cot ewin yistzil, yunnal yet' pax a mam cha.

²⁰ Man̈ 'och eb' 'a 'ilc'ojlal yuj tas 'aj 'ayc' ticnec, yujto a tas caw wach' 'ay 'a Egipto tic, a 'oj wac' 'a eb', xchi win rey 'a José cha.

²¹ 'Ixta wal xyutj sb'a ewin yunnal win Israel cha, ax José, a x'a'n jun tzo'n̈ caruaje 'a ewinac, 'icha xyutj win rey yalni, xya'n pax win tas tzc'ux eb' 'a yol b'e.

²² 'Ix 'ajx cot junjn mojn̈ spichl ewin smasnil, yic tzjel-lab'an eb'. Ax pax 'a win Benjamín, 'oxe ciente q'uen tumn plata x'ajx 'a winac, x'ajx pax omojn̈ spichl winac.

²³ Xya'n cot win lajn̈wan̈ no b'uru 'a smam cha, caw 'al x'aj no yuj tas wach' 'ay 'a Egipto cha, xcot pax lajn̈wan̈ xo e no 'axna x'i'n cot 'ixm trigo, 'ixm pan, yet' tas tzc'uxxi yic tz'at smam 'a yol b'e.

²⁴ A yic xyaln can sb'a eb' yu'tac José chi 'a 'a, xyaln 'a eb' 'ixtic: —Man̈ eyac' owl 'a yol b'e, xchi 'a eb'. Xlajw cha, xpaxt ewinac.

²⁵ X'elt ewin 'a Egipto, 'ix japx eb' 'a lum Canaán 'a 'aj 'aycn smam eb' cha.

²⁶ A yic xjaw eb' 'a smam cha, xyaln ewin 'a 'a, chajtlto 'ayc' win José, yajl yaj win 'a smasnil yol yic Egipto. Caw sat sc'ojl win Jacob yab'ni, matz ya'ch 'a sc'ojol, 'a tas tzyal ewinac.

²⁷ At yic xyaln ewin smasnil tas xyal win José cha, yet' yic xyiln 'och win Jacob jun tzo'n̈ caruaje xjaw yuj ewinac, 'a 'aj tzyac' José 'ijxoc 'at smam cha, 'ixta x'aj stzalj pax chan̈ winac.

²⁸ Xlajw cha, xyaln win Israel chi 'ixtic: Colb'il cab' xwab'i chajtlto pitznto ni wunnal José, 'oj 'at wil ni wunnal cha, yic mantzac in chami, xchi winac.