Gn 44 - Chuj San Sebastian Bible

Svaso win José

¹ Xlajw cha, xyaln José 'ixtc 'a win smayltoma cha: —'Ac' b'ut'joc scoxtl ewin yet' 'ixm trigo, a tzyal jantc tztechj yi'n ewinac, tza'n pax 'ejm q'uen tumn 'a yol sti scoxtl junjn ewinac.

² Tza'n 'ejm jun in vaso nab'a plata yet' q'uen tumn 'a yol sti scoxtl win slajb' 'unin, atn q'uen xyac' win mannc strigo, xchi winac. Syiclni win mayltoma chi tas xyal José.

³ Yic wal xjaw tzicnjoc yoc c'u 'a yic sq'uin̈b'ial, 'ix checx paxt ewin yet' sb'uru 'a schon̈ab'.

⁴ Jab' nant tz'elt eb' 'a sti 'elt chon̈b' cha, xyaln José 'a win smayltoma chi 'ixtic: —'Ixc 'a spatc jun tzo'n̈ winc chi muc'uc, a yic tzyamchj ewin o'oj, tzaln 'ixtc 'a eb': ¿Tas yuj a swach'c'ojlal in patron̈, tu tzeyutj e pacn can paxi? ¿Tas yuj xeyel'j cot jun svaso nab'a plata,

⁵ jun svaso 'aj tzyu'j yal uva, tzc'anlb'an pax 'a yic tznan 'el junc paxti'? Caw wal tu tas tze b'o ax tic, xa chi 'a eb', xchi José cha.

⁶ Ax yic xyamchj ewin yuj win mayltoma cha, xyaln win 'icha xyutj José yalni.

⁷ Xta'w ewin 'ixtc 'a winac: —¿Tas yuj 'ixta tzotj paxtinc a b'a 'ayn̈ on̈ mamin? ¿An̈ a checb' on̈ tic on̈, caw may 'aj tzqui b'o jun tzal cha?

⁸ 'Ilt nab'an, at 'a Canaán cajn on̈ on̈, ax yic on̈ cotx wul qui manx 'ixm trigo tic on̈, xqui'n paxt q'uen tumn 'ay 'ejm 'a yol sti qui coxtl on̈; ¿tom at wal jun oro mto plata yic win a patron̈ chi tzquel'j cot 'a yatut?

⁹ A junc mach 'aj tz'ilchj q'uet jun vaso cha, tztac' cab' schami, an̈ xo qui masnil tzon̈ 'atcn e checb'oc, xchi ewinac.

¹⁰ Yuj cha, 'ix yaln win mayltoma chi 'ixtic: —B'o cab' 'icha tzeyal cha, cojn win 'aj tz'ilchj q'uet jun vaso chi wu'uj, a win tz'ochcn in checb'oc; ax xo e masnil libre ex, xchi winac.

¹¹ Yajn̈ej, xyi'n 'ejm ewin scoxtl chi smasnil, sjiyn ewin sti scoxtl cha.

¹² Sayn win mayltoma yil smasnil scoxtl ewin cha, sayn win yil yic win b'ab'l winac, stzol-l s'at winac masnto xc'och win say yil yic win slajb' 'unin. Ax x'aji, ata xq'uet q'uen vaso chi 'a yol yic win slajb' 'unn cha, atn win Benjamín.

¹³ Yuj cha, syamn 'och ewin stzilnjat spichul, yic tzch'oxn 'el ewin scusc'ojlal. Xlajw cha, xya'n 'och pax ewin yictz sb'uru chi jun 'ejm xo, xmeltzj pax ewin 'a yol chon̈b' cha.

¹⁴ 'Ayt 'ec' José 'a yatut yic xc'ochx win Judá yet' eb' yu'tac cha, x'em n̈ojnjoc eb' 'a yojltac José masnto 'a sat lu'um.

¹⁵ Xyaln José 'a ewin 'ixtic: —¿Tas yuj 'ixta xeyutj e b'a? ¿Tom man̈ eyojcoc to a junc winc 'ay yopiso 'icha 'in tic, to tztac' snachj 'el junc tas yu'uj? xchi 'a eb'.

¹⁶ Xta'w win Judá 'ixtic: —¿Tasto wal tzcutj ta'wc qui b'a 'aych mamin? ¿Tasto wal tzcutj calni to wach'n̈ on̈? A Dios tox 'ix 'ilchj qui mul yuj on̈. A ticnec caj 'a ojltac on̈, tztac' tzon̈ 'ochcn a checb'oc yet' win 'aj x'ilchj q'uet a vaso cha, xchi winac.

¹⁷ Xyaln pax José 'ixtic: —Ma'ay, cojn win 'aj x'ilchj q'uet q'uen in vaso cha, cojn win tzcan in checb'oc. Ax xo tic, paxn̈ec 'a tzaljc'ojlal 'a e chon̈b' 'a 'aj 'aycn e mam, xchi.

Xtew 'och Judá yuj Benjamín

¹⁸ Xlajw cha, snitzn 'ochch sb'a Judá 'a stz'ey José, xyaln 'a 'ixtic: —Tzin tew 'och 'aych mamin, comnoc tzyal a c'ojol tzwal tas tzin nib'j tzwal 'ayach, yuj wal dios 'ayach, matz cot cab' owl 'ayin, 'icha wal to rey ach.

¹⁹ Mamin, ach wal xa c'anb'j 'ayn̈ a checb' on̈ tic, toto 'ayt 'ec' qui mam on̈, toto 'ayt junc xo cu'tac on̈.

²⁰ Yuj cha, xcaln 'ayach to 'ayt 'ec' qui mam on̈, cojn b'i'an to caw 'ichm winc xo; 'ayt pax junx win cu'tac on̈, slajb' 'unn winac, caw 'ichm winc xo win qui mam chi 'on̈, yic x'alj junx win cu'tac chi 'on̈. Al junx win junn̈j snun yet' winac, chamnc xo winac, yuj cha, caw tzalj qui mam yet' win on̈, yujto cojxn winac, xqui chi 'on̈.

²¹ Ach ton wal 'ix ala to tzquij cot winac, yic tzojcan 'eli.

²² Xcaln 'ayach, to matz nib'j qui mam on̈, to tz'el win 'a stz'ey; toto tz'el win 'a stz'ey, wal scham qui mam chi 'on̈.

²³ Ach xal 'ayn̈ 'ixtic: Toto matz eyij cot winac, man̈xtzac ex jaw 'ayin, 'in xa chi.

²⁴ Ax yic on̈ c'och 'a catut on̈, xcaln 'a qui mam on̈ yuj tas xal 'ayn̈ on̈.

²⁵ Ax qui mam on̈, ax 'ix aln pax 'ayn̈ on̈ to tzon̈ cot manj trigo 'a tic jun 'ejm xo.

²⁶ Palta on̈ ta'w 'a 'ixtic: Matz on̈ 'ati, toto matz 'at ni cu'tac slajb' 'unn tic quet' on̈. Toto matz 'at ni quet' on̈, matz tac' qui c'och 'a yojltac win yajl cha, xqui chi 'a on̈.

²⁷ Xyaln qui mam 'ixtc 'ayn̈ on̈: Eyojtac to chawn̈ wal eb' wunnal yet' 'ix wistzil chamnac,

²⁸ jun winac, jun 'ejmn̈ej satnc 'ejmi, man̈x 'a 'aj xwil xon sat winac, 'ay am wal junc no calte'al noc' xchin 'ejmi.

²⁹ Toto tzeyij 'at junx wunnal tic, q'uinloc 'ay pax tas tz'i'n na, eyuj wal b'i'an, tzin cham yuj cusc'ojlal, xchi 'ayn̈ on̈.

³⁰ Yuj cha, 'icha wal to stzatzl in mam yajch ni quelm tic; toto man̈xtzac pax ni ticnec quet' on̈,

³¹ to 'ixta', 'oj cham qui mam yuj cusc'ojlal on̈, yujto a ni quelm tic man̈x 'oj 'ilxoc ni yu'uj. An̈ wal tz'och qui mul 'a qui mam on̈, yic tzcham yuj cusc'ojlal.

³² An wal xwa'ch in b'a wiln ni 'a in mam cha, xwaln 'ixtc 'a 'a: Toto man̈x 'oj jawc ni wu'uj, caw wal tu tzin can 'a a sat 'a jun 'ejmn̈ej, xin chi 'a 'a.

³³ Yuj cha, tzin tew 'och 'ayach, toq'ue tztac'a, an tzin can sjelc ni wu'tac tic a checb'oc. Comnoc tza'l ni 'a libre tz'atx ni yet' eco wu'tac tic.

³⁴ ¿Tasto wal 'oj 'at wutc wiln in mam, toto man̈ocjun ni wet'oc? Caw matz yal in c'ojl tzwa'ch in mam 'a cusc'ojlal, xchi Judá.