Gn 38 - Chuj San Sebastian Bible

Win Judá yet' 'ix Tamar

¹ A yic jun tiempoal cha, spojn 'el sb'a win Judá 'a scal eb' yu'tac, xc'och cajn win 'a stz'ey jun win tzcuch Hira, 'aj chon̈b' Adulam winac.

² Ata xyilch win jun 'ix yisl jun win 'aj Canaán tzcuch Súa, xyi'n sb'a win yet' 'ix.

³ Scuchn chan̈ 'ix yune'; 'ix 'alj jun yune 'ix, xya'n sb'ic Er.

⁴ Xlajw cha, scuchn chan̈ 'ix junx yune', 'ix 'alj junx yune 'ix cha, xya'n 'ix sb'ic Onán.

⁵ X'alj to junx yune 'ix yic 'ayc' win Judá 'a Quezib. Xya'n 'ix sb'ic win 'unn chi Sela.

⁶ A yic x'och win Er quelmal, win sb'ab'l 'unnal Judá, sayn Judá chi yistzil winac, xyi'n win 'ix tzcuch Tamar.

⁷ Caw tu sb'o win Er 'a sat Jehová, yuj cha, 'ix yi'n 'ec' Jehová sq'uinl winac.

⁸ Yuj cha, xyaln Judá 'a win Onán 'ixtic: —'Ij a b'a yet' 'unx yistzil win o'tac 'ix cham tic, sec tza yiclj pax qui leyal, to yowlal tzej a b'a yet' 'unx a mu tic, sec ach 'oj ac' junc 'unn 'icha to yunnal win o'tac chi tz'aji, xchi winac.

⁹ A win Onán, yojc xo winac to a jun 'unn tzb'ab'l 'alji, man̈ yico'oc win yet' 'ix smu cha, yuj cha, yic tzway win 'a junjn 'ejm yet' 'ix, ax 'a sat lum tzya'cn 'ejm win yin̈til, sec matz pitzw chan̈ 'unn 'a 'ix snan winac, sec wach' may yin̈tl win yu'tac win chi tz'elcni.

¹⁰ Xcot yowl Jehová yuj tas tzb'o win Onán, yuj cha, 'ix yi'n pax 'ec' sq'uinl winac.

¹¹ Xlajw cha, xyaln win Judá 'a 'ix yalb' chi 'ixtic: —A ticnec, wach' tzach paxx can yet' a mam a nun; may junc xo winc tztac' e'ni. At yic 'oj c'och sq'uinl ni wunnal Sela, atta 'oj ec' a b'a yet' na, xchi cob' Judá. Yujto sna Judá lemb'il tzcham pax win Sela, 'icha x'aj eb' yu'tac chi schami. 'Ixta x'aj 'ix Tamar spaxcn 'a yatut smam cha.

¹² Pectix wal cha, xcham 'ix yistzil pax win Judá, 'ix yisl win Súa. A yic xlajw yec' scusc'ojlal winac, x'at win 'a chon̈b' Timnat, 'a 'aj 'ay ewin tzjoxn scalnelu winac. Tza'n 'och jun win swach'c'ojl win yu'uj, atn win tzcuch Hira 'aj chon̈b' Adulam.

¹³ A yic xyab'n 'ix Tamar speclal, to x'at win yalb' 'ix 'a Timnat, 'at yil win sjoxx scalnelu,

¹⁴ yuj cha, yajn̈ej xyi'n 'el 'ix spichl tzya'ch yuj chamnc yichmil cha. Xya'n 'och 'ix jun te pichl wach', xya'n q'ue 'ix jun nip 'a sjolom, smacn 'ix sat yet' te', sec may mach tz'iln 'och 'ix. X'at 'em wocn 'ix 'a sti 'el chon̈b' Enaim, 'a 'aj tzc'och sb'el chon̈b' Timnat. 'Ixta xyutj sb'a 'ix yujto a win Sela tox stz'acw yab'lil winac, palta mantzac yij sb'a win yet' 'ix.

¹⁵ Ax yic xyiln 'at Judá 'ix, snan 'ixtic: 'Ajmul 'ix am jun cha, xchi, yujto macn sat 'ix.

¹⁶ Xlajw cha, x'elcn win Judá 'a yol b'e, x'at win 'at yilcn 'ix. Ma'ix nachj 'el yu'uj toto a 'ix yalb' win cha, xyaln win 'a 'ix 'ixtic: —¿Matz yal am 'a c'ojl tzin way et'oc? xchi winac. —¿Tas tzac' 'ayin, yic tzach way wet' cha? xchi 'ix.

¹⁷ —Tzwa' cot junc a yune chiwo, xchi win 'a 'ix. —Tztac' am jun, palta yowlal 'ay junc tas tza'cn 'ayin, sec ax yic tzjaw no yune chiwo cha, tzwa'n pax meltzjoc 'ayach, xchi 'ix.

^18-19 —¿Tas pax tza nib'j tzwa'cn 'ayach? xchi win Judá 'a 'ix. —'A'cn a seyo yet' sch'an̈il yet' te a c'och et' cha, xchi 'ix. Ax Judá, xya'n can jun tzo'n̈ chi 'a 'ix, xlajw cha, xway win yet' 'ix. Xlajwn̈ej cha, 'ix pax 'ix, xyi'n pax 'el 'ix te pichl 'aych yuj cha. Xya'n pax 'och 'ix te spichl tzya'ch xoni, te tzch'oxn 'eli to chamnc yichmil 'ix. Ax x'aji, xpitzw chan̈ 'unn 'a 'ix.

²⁰ Ax win Judá, 'ix ya' cot win no chiwo 'a win swach'c'ojl 'aj Adulam, ax win tz'a'n no 'a 'ix, sec tzya'x meltzjoc 'ix jun tzo'n̈ tas 'aycn 'a cha, palta ax 'ix 'aji, man̈xtoc 'ix 'ilchj 'ix yuj winac.

²¹ Yuj cha, sc'anb'n 'ec' win 'ix 'a eb' 'aj lugar chi 'ixtic: —¿'Ajtil 'ay jun 'ix 'ajmul 'ix 'a tic, jun 'ix tz'em wocn 'a sti b'e 'a Enaim tic? xchi winac. —A 'a tic may junc 'ix 'ajmul 'ix, xchi ewinac.

²² Xlajw cha, xmeltzj pax win 'a win Judá cha, xyaln win 'a win 'ixtic: Ma'ix 'ilchj 'ix wu'uj; xyal ewin 'ayc' 'a jun lugar cha, to may junc 'ix 'ajmul 'ix chi 'ayc' ta', xchi winac.

²³ Xta'w win Judá chi 'ixtic: —Can cab' 'ix yet' jun tzo'n̈ chi 'an, sec wach' may junc mach tzaln tu paxti 'ayon̈. 'Ix in yiclj wa'n 'at no yune chiwo tic, palta ma'ix 'ilchj 'ix o'oj, xchi winac.

²⁴ 'Oxe xo am 'ujal, x'at alxoc 'ixtc 'a win Judá cha: —A 'ix alb' Tamar, 'ay am junc winc sc'umj 'ix, yuj cha, to yet'x 'ix yune ticnec, xchi eb' 'a winac. —'Ijec 'el 'ix 'a sti 'el chon̈ab', tzlajw cha, tze n̈usntz'a 'ix, xchi winac.

²⁵ Ax yic wan yi'n 'elt ewin 'ix, 'ix ya'n 'at 'ix sti 'a win yalb' cha, xyaln 'ix 'ixtic: A win 'ay yic jun tzo'n̈ tic, atn win 'ay yic jun 'unn 'aych 'ayn tic. B'eyc'ojlej 'eli mach 'ay yic jun seyo yet' sch'an̈l tic, yet' jun c'occh tic, xchi 'ix 'a winac.

²⁶ Ax yic xyiln 'och win Judá, to yic win smasnil jun tzo'n̈ cha, xyaln win 'ixtic: A 'ix 'ix tic wach' tas sb'o 'ix, an tu xin b'o'o, an 'ix 'och in mul, yujto ma'ix wac' yi' sb'a 'ix yet' ni wunnal Sela, xchi winac. Yuj cha, ma'ix 'ajx tz'a 'ix, man̈x xon 'ajtil xway win yet' 'ix.

²⁷ Ax yic x'alj yune 'ix Tamar, tiyx eb' 'unn cha.

²⁸ A yic wan yalj eb' 'unn cha, x'el-l sc'ab' jun b'ab'l 'unin, ax 'ix wetz'wjum x'a'n 'och jab' chac ch'al 'a sjaj sc'ab' jun 'unn cha, xyaln 'ix: Atn jun xb'ab'lj tic, xchi 'ix.

²⁹ Wanto cha, xyi'n pax 'och jun 'unn chi sc'ab', ax junx yu'tac chi xb'ab'l 'alj pax 'a 'a, yuj cha, xya'n eb' sb'ic Fares. Xyaln 'ix 'a win 'unn chi 'ixtic: ¡Tas wal 'ix otj ecn 'ec' a b'a 'a yojltac ni o'tac cha! xchi 'ix.

³⁰ Xlajw cha, x'alj win 'unn chi 'aych chac ch'al 'a sjaj sc'ab' cha, Zara xyac' eb' sb'ioc.