Gn 36 - Chuj San Sebastian Bible

Eb' yin̈tl win Esaú

¹ Atn eb' tic yin̈tl Esaú, mto Edom.

² A Esaú xyij sb'a yet' eb' 'ix 'aj Canaán: 'ix Ada, yisl win Elón win hitita, yet' 'ix Aholibama yisl win Aná, yixchicn win Zibeón, win heveo.

³ 'Ix yi'n pax win 'ix Basemat, yisl Ismael, yanb' win Nebaiot.

⁴ 'Ix 'alj yune 'ix Ada yet' Esaú cha, atn Elifaz; ax pax 'ix Basemat, x'alj jun yune', atn Reuel.

⁵ Ax pax 'ix Aholibama x'alj pax eb' yune', atn Jeús, Jaalam yet' Coré. Atn eb' yunnal Esaú tic x'alj 'a lum Canaán, 'a yic cajnto 'ec' ta'.

⁶ Xlajw cha, xyi'n 'at Esaú eb' yistzil, eb' yunnal, eb' yisil yet' pax smasnil eb' cajn 'ec' yet'oc, x'at eb' 'a junx lugar, yic tz'el 'a stz'ey Jacob cha. Xyi'n 'at smasnil scajb'en noc', yet' smasnil tas 'ay 'a 'a, yic 'ayc' 'a Canaán.

⁷ Yujto til wal tas 'ay 'a eb' schawn̈il, yuj cha, man̈xtzac stac' to junxn̈ej tz'aj eb', yujto man̈xtzac yab' lum lum 'aj wach' swa scajb'en noc' eb'.

⁸ Yuj cha, 'ix 'at Esaú 'at scaj lum jolmctac witz yic Seir.

⁹ Atn eb' yin̈tl Esaú tic, ewin smam 'ichm eb' edomita, ewin 'e'nc cajn 'a lum jolmctac witz yic Seir.

¹⁰ Atn sb'i eb' yunnal Esaú tic: Elifaz yune 'ix Ada, Reuel, yune 'ix Basemat.

¹¹ Ax eb' yunnal Elifaz atn pax eb' tic: Temán, Omar, Zefo, Gatam yet' Cenaz.

¹² 'Ay jun 'ix schab'l 'istzil win Elifaz tzcuch Timna; x'alj jun yune', 'ix xya'n sb'ic Amalec. Atn eb' tic yixchicn 'ix Ada, 'ix yistzil Esaú.

¹³ Eb' yunnal Reuel: atn Nahat, Zera, Sama yet' Miza; atn eb' yixchicn 'ix Basemat, atn junx 'ix yistzil win Esaú.

¹⁴ Aholibama sb'i junx 'ix yistzil Esaú cha, ax eb' yune 'ix atn eb' tic: Jeús, Jaalam yet' Coré. A Aholibama tic, yisl win Aná, yixchicn win Zibeón.

¹⁵ Eb' x'och yopiso 'a scal eb' yin̈tl Esaú, atn eb' tic: Eb' x'elt 'a scal yin̈tl Elifaz win sb'ab'l 'unnal Esaú, atn Temán, Omar, Zefo, Cenaz,

¹⁶ Coré, Gatam yet' Amalec. Atn eb' tic x'och yopiso 'a scal eb' yin̈tl Elifaz 'a yol yic Edom. Smasnil jun tzo'n̈ eb' tic, yixchicn 'ix Ada eb'.

¹⁷ Ax eb' yunnal Reuel cha, eb' x'och yajlil, atn eb' tic: Nahat, Zara, Sama yet' Miza, atn jun tzo'n̈ eb' tic x'och pax yajlil 'a scal eb' yin̈tl win Reuel 'a yol yic Edom; smasnil jun tzo'n̈ eb' tic, yixchicn 'ix Basemat, 'ix yistzil Esaú.

¹⁸ Ax pax 'a eb' yune 'ix Aholibama cha, eb' x'och yopiso 'a scal eb', atn Jeús, Jaalam yet' Coré.

¹⁹ Smasnil jun tzo'n̈ eb' 'anma tic, yin̈tln̈ej win Esaú, mto win Edom sb'i, x'och eb' yajlil 'a scal eb' yin̈tl cha.

²⁰ Eb' yunnal win Seir win horeo, eb' cajn 'a jun lugar cha, atn eb' tic: Lotán, Sobal, Zibeón, Aná,

²¹ Disón, Ezer yet' Disán. Atn eb' tic yajl chon̈b' x'aj 'a scal eb' horeo, 'a scal eb' yin̈tl Seir 'a yol yic Edom.

²² Ax eb' yunnal Lotán, atn eb' tic: Hori yet' Hemam, Timna 'ix yanb' Lotán.

²³ Eb' yunnal Sobal: atn Alván, Manahat, Ebal, Zefo, yet' Onam.

²⁴ Ewin yunnal Zibeón, atn Aja, yet' Aná, a win Aná cha, atn win x'ilchj a c'a'la yuj 'a lum cusltac lu'um, 'a yic tztan̈wni wa e no sb'uru smam.

²⁵ Ax win Aná, 'ay jun yunnal, atn win Disón yet' jun yisl Aholibama sb'i.

²⁶ Eb' yunnal Disón: atn Hemdán, Esbán, Itrán yet' Querán.

²⁷ Eb' yunnal Ezer, atn Bilhan, Zaaván yet' Acán.

²⁸ Eb' yunnal Disán, atn Uz yet' Arán.

^29-30 Eb' ya'jnac yajlil 'a scal eb' horeo 'a yol yic Seir, atn Lotán, Sobal, Zibeón, Aná, Disón, Ezer, yet' Disán.

³¹ Atn eb' tic xyac' yajlil 'a chon̈b' Edom yic mant 'a sreyl eb' israel.

³² A win Bela yunnal Beor, xyac' win reyl 'a Edom, Dinaba sb'i schon̈ab'.

³³ A yic xcham win Bela, ax win Jobab x'ochx can yajlil, win yunnal Zera, Bosra sb'i schon̈b' winac.

³⁴ A yic xcham Jobab, ax win Husam x'ochx can yajlil, a pax ta cajn 'a yol yic Temán.

³⁵ A yic xcham Husam, ax win Hadad yunnal Bedad x'ochx can yajlil, atn win x'a'n ganar eb' Madián 'a owl 'a yol yic Moab, Avit sb'i schon̈ab'.

³⁶ A yic xcham Hadad, ax win Samla x'ochx can yajlil, Masreca sb'i schon̈ab'.

³⁷ A yic xcham Samla, ax Saúl x'ochx can yajlil; 'aj chon̈b' Rehobot. A jun chon̈b' cha, ata 'ay 'a stz'ey sti a Éufrates.

³⁸ A yic xcham Saúl, ax win Baal-hanán yunnal Acbor x'ochx can yajlil.

³⁹ A yic xcham Baal-hanán, ax win Hadad x'ochx can yajlil, Pau sb'i schon̈ab'. Ax 'ix yistzil Hadad cha, Mehetabel sb'i 'ix, yune 'ix Matred, yixchicn Mezaab 'ix.

^40-43 Atn sb'i eb' x'ochcn syajloc chon̈b' tic 'a eb' yin̈tl Esaú yuj eb' yican: Timna, Alva, Jetet, Aholibama, Ela, Pinón, Cenaz, Temán, Mibzar, Magdiel, yet' Iram; a pax sb'i eb' x'och sb'ic junjn lugar 'aj xlaj 'ec' cajn eb'. A Esaú a pax tzcuch Edom, atn smam 'ichm eb' edomita.