Gn 33 - Chuj San Sebastian Bible

X'och Jacob 'a wach'c'ojlal yet' Esaú

¹ Ax xyiln Jacob 'a najat to wan sc'och Esaú yet' chan̈e ciente eb' winac, yuj cha, spojn 'ec' eb' 'unn 'a scal eb' 'ix yistzil, atn Lea yet' Raquel, yet' pax eb' 'ix ya'mal servil eb' 'ix schawn̈il.

² A eb' 'ix ya'mal servil eb' 'ix chi xb'ab'lj yet' eb' 'unn cha, xlajw cha, xcot 'ix Lea yet' eb' yune', slajb' xoj xcot 'ix Raquel yet' José.

³ Yajn̈ej xb'ab'lj Jacob 'a yojltac eb' 'ix, uc 'ejm x'em n̈ojan masnto xjaw 'a yojltac jun yu'tac cha.

⁴ Ax Esaú xc'och 'a yojltac muc'uc, x'och la'n̈joc 'a sjaj stz'ub'n 'elt eb' sti jun jun, x'oc' chan̈ eb' schawn̈il.

⁵ Xlajw cha, xyiln 'och Esaú eb' 'ix 'ix yet' eb' 'unin, sc'anb'n 'ixtic: —Ax pax jun tzo'n̈ eb' tic, ¿mach 'ay yic eb'? xchi. —Wunnal eb' xyac' qui Mam Dios, xchi win Jacob.

⁶ 'Ixta to b'i'an, ax eb' 'ix 'a'm servil chi yet' yune', 'ix jaw eb' 'a stz'ey Esaú, syamn 'och eb' yem n̈ojan masnto 'a sat lu'um.

⁷ 'Ix jaw pax 'ix Lea yet' eb' yune', x'em pax n̈ojn eb', slajb' xoj xjaw 'ix Raquel yet' yune', atn win José, x'em pax n̈ojn eb'.

⁸ Sc'anb'n Esaú 'a win Jacob 'ixtic: —¿Tas tza nib'j tza b'o yet' jun tzo'n̈ no noc' xin chaj 'a yol b'e? xchi Esaú. —Ec yaj smasnil no noc' cha, sec wach' man̈x 'a tu nab'enal tza na 'a in patic, xchi.

⁹ —May wu'tac, til wal no wico'; can cab' no et'oc, xchi Esaú.

¹⁰ Palta ax win Jacob xyac' yip yaln 'a 'ixtic: —May wu'tac, toto wach'n 'a a sat, chaj smasnil jun tzo'n̈ siylab' tic tzwac' 'ayach, yujto a yic tzach wiln tic, 'icha wal to a qui Mam Dios tzwilchi, yujto wach' in otj in a chani.

¹¹ Tzin tew 'ayach, chaj jun tzo'n̈ siylab' xwij cot 'aych tic, yujto a Dios x'el 'a sc'ojl ya'n in ricoal, may jac tas tzyac' palta 'ayin, xchi. Syamn 'och Jacob wal stew 'och 'a Esaú, ax x'aji c'ojnc'ojnil schaj jun tzo'n̈ siylab' cha.

¹² Palta xyaln Esaú 'ixtic: —A ticnec coyec, an tzin b'ab'lj o'oj, xchi.

¹³ Xta'w Jacob 'ixtic: —Ach wu'tac, ojtac to a eb' 'unin c'un sc'unb' chan̈ eb'. Tzin na pax yuj no calnelu, yet' no wacx cotcto yune', q'uinloc tzin pech e no', toq'ue tzc'unb' chan̈ e no', 'ay smay scham smasnil e no 'a junn̈j c'u.

¹⁴ Yuj cha, caw wach' tzach b'ab'l 'at 'a wojltac; al in c'ojnc'ojnil 'oj in 'ati, a tzyal jantc sb'ey eb' 'unin, yet' no calnelu yet' no wacx tic. 'Ojx ach wil'ch 'a Seir, xchi Jacob.

¹⁵ —'Ixta cab' 'an, tztac' tzcan jaywn̈oc ewin in checb' tic colwjoc et'oc, xchi Esaú. Palta xyaln win Jacob 'ixtic: —Ma'ay, yuj wal dios 'ayach, may tas tza na wu'uj, xchi winac.

¹⁶ Ax 'a jun c'u cha, ata xmeltzj Esaú 'a Seir.

¹⁷ Ax win Jacob, ata xjawcn cajn win 'a jun lum 'a'lic. Ata sb'o chan̈ smantiado, sb'on pax chan̈ jun tzo'n̈ cotc pat, 'a 'ajtil tz'och scajb'en noc', yuj cha, xya'n sb'ic jun lugar chi Sucot.

¹⁸ A yic x'elt win Jacob 'a Padan-aram masnto xjaw 'a yol yic Canaán, may tas xyab' syail, axta xcan cajn 'a yojltac cot Siquem.

¹⁹ Jun ciente q'uen tumn xyac' win stojloc jun lum chi 'a ewin yunnal Hamor, win smam Siquem. Ata sb'o chan̈ scamplamento.

²⁰ Sb'on pax jun yet'l xajmb'al ta', xya'n sb'ic El-Elohe-Israel.