Gn 29 - Chuj San Sebastian Bible

'Ix c'och Jacob 'a Harán

¹ 'Ix 'atx Jacob masnto xc'och 'a slum ewin cajn 'a stojlal 'aj tzq'uel c'u.

² A yic xc'och 'a jun 'a'lic, xyiln 'at jun a 'uc'b'il a'. A 'a stz'ey a cha, ata 'ayc' 'oxe monto no calnelu, yujto ata tzyu'j e no a'. 'Ay jun niwquil q'uen 'ay q'ue smacloc sti a'.

³ A yic tzyamn sb'a masnil no calnelu ta', ax ewin 'ilm calnelu chi tz'i'n 'el q'uen smacl sti a a cha, tzya'n ewin yuc' e no a', tzlajw cha, tzmacn can pax ewin sti a'.

⁴ 'Ix sc'anb'n Jacob 'a ewin 'ilm calnelu chi 'ixtic: —¿'Ajtil 'ayx ex wit 'anma'il? xchi Jacob. —Ata 'ayn̈ 'a Harán on̈, xchi ewinac.

⁵ —¿Eyojc am win Labán, win yunnal can Nacor? xchi 'a ewinac. —N', cojc win on̈, xchi ewinac.

⁶ —¿Wach'm sc'ojl win tzeyila? xchi. —N', wach' sc'ojol. 'Ilt sjaw 'ix Raquel 'ix yisl winac, ax 'ix tzjaw yet' scalnelu cha, xchi ewinac.

⁷ Xyaln Jacob 'ixtc 'a eb': —Chan̈to c'u, ¿tas yuj man̈toc ton̈j tzeyac' yuc' e no a', tze tan̈wni swa e no jac xo? xchi 'a eb'.

⁸ Xyaln eb' 'ixtc 'a 'a: —Matz tac' 'ixta', yowlal tzqui tan̈wj syamn sb'a smasnil e no calnelu tic, 'ixta to b'i'an, ax qui'n 'el q'uen niwquil q'uen tic on̈, q'uen 'ay q'ue smacloc sti a 'uc'b'il a tic, sec tztac' ca'n yuc' masnil no calnelu tic a', xchi ewinac.

⁹ Ya' sb'a wanto spaxtin Jacob yet' ewinac, 'ix jaw 'ix Raquel yet' no scalnelu smam cha, yujto a 'ix tz'iln e no'.

¹⁰ Ax yic xyiln Jacob sjaw Raquel yet' no calnelu cha, yajn̈ej x'at yi'nc 'el win q'uen smacl sti a 'uc'b'il a cha, xya'n win yuc' e no calnelu chi a'.

¹¹ Yajn̈j wal cha, xya'n win stzatzl sc'ojl 'ix stz'ub'n 'elt win sti 'ix, xlajw cha, syamn 'och win yoq'ui.

¹² 'Ix yaln Jacob 'a Raquel cha, chajtlto yune 'ix Rebeca winac, 'ix yanb' win Labán, yuj cha, carela x'at 'ix, yic tz'at yalnc 'ix yab' smam cha.

¹³ Ax yic xyab'n Labán speclal Jacob, to yune yanb' winac, carela xcot win wul scha'. X'och la'n win 'a Jacob, stz'ub'n 'elt win sti', xyi'n 'at 'a yatut. Xlajw cha, syamn 'och Jacob yaln 'a Labán, tas x'aj s'at 'a yol b'e yet' 'a yatut.

¹⁴ Xyaln Labán 'a 'ixtic: Wal yel caw wal junn̈j to quin̈tl et'oc, xchi 'a winac. Yuj cha, xcancn Jacob yet' Labán jun 'ujal.

Munljnac Jacob yuj Raquel yet' Lea

¹⁵ Ax yic xlajw jun 'ujl cha, xyaln Labán 'ixtc 'a Jacob: —A ticnec, toxn̈ej 'ayt cuj qui b'a et'oc, palta ma'oj stac' ton̈j tzach munlj 'ayin, yic may jac tas 'oj ac' ganar. Al 'ayin jantc 'oj ach in tojo', xchi winac.

¹⁶ A Labán cha, 'ay chawn̈ yisil; 'ix b'ab'el Lea sb'i 'ix, ax 'ix schab'il Raquel sb'i 'ix.

¹⁷ A 'ix Lea cha, 'icha yilx xon eb' 'ix 'ix, 'ixta yilx 'ix, cojn yol sat 'ix caw wach' yilxi, palta ax pax 'ix Raquel, caw wach' yilx sniwnal 'ix smasnil.

¹⁸ Ax Jacob xcan snab'en win 'a 'ix Raquel, yuj cha, xyaln 'ixtic: —Tzin can ach wac' servil uque'oc ab'il yuj 'unx esl Raquel tic, xchi.

¹⁹ 'Ix ta'w Labán 'ixtc 'a Jacob: —Cann̈ can 'an, yel xo wal wach' a 'aych tzwac' 'unix, yic man̈oc 'a junc xo win chuc wincal 'aj tzwac' 'unix, xchi winac.

²⁰ 'Ixta x'aj smunlj win Jacob uque ab'il yuj 'ix Raquel, caw matz yab' win yec' tiempo cha, yujto caw tzchaml win yet' 'ix.

²¹ Ax yic stz'acw uque ab'il cha, xyaln Jacob 'a win Labán 'ixtic: —A ticnec, tox xlajw stiempoal qui trato ach wa'n servil, 'ac' 'unx wistl chi b'i'an, sec tzin nupn yet' 'unix, xchi winac.

²² Ax Labán, xyawtj cot smasnil eb' cajn 'a stz'ey, xya'n 'och win q'uin̈ yet' jun niwquil wa'el, yuj snupnel jun yisl cha.

²³ Ax yic xq'ue 'ac'wal, xyi'n cot win Labán 'ix yisl Lea 'a Jacob, xlajw cha, xway win yet' 'ix.

²⁴ Xya'n win Labán jun 'ix ya'mal servil 'ix Lea cha, Zilpa sb'i 'ix.

²⁵ Ax yic sacb'eli, xyiln cot sb'a win Jacob to a 'ix Lea xway yet'oc, yuj cha, x'at yalnc 'a win Labán 'ixtic: —¿Tas yuj 'ixtc in otej? Yuj 'unx Raquel in munlj 'ayach. ¿Tas yuj tzin extej? xchi.

²⁶ Xyaln Labán 'a win 'ixtic: —A qui b'eyb'al 'a tic, matz tac' to a eb' 'ix tza'n 'ix tzb'ab'l 'och yichmil 'a eb' 'ix b'ab'l 'ix.

²⁷ Yiclj can jun seman sq'uin̈l a nupnel yet' 'unx Lea tic, tzlajw cha, ax e'n pax 'unx Raquel, toto tzac' a ti a munlj pax 'ayn uque'ocx ab'il, xchi Labán.

²⁸ Xchan sc'ojl win Jacob jun paxti cha. Syiclni jun seman sq'uin̈l snupnel yet' 'ix Lea cha, slajw cha, xya'n pax win Labán 'ix Raquel chi yistloc winac.

²⁹ Xya'n pax Labán jun 'ix ya'mal servil 'ix Raquel cha, Bilha sb'i 'ix.

³⁰ Xlajw cha, xyi'n sb'a Jacob yet' 'ix Raquel, yel xo wal tzchamc'ojlej win 'ix 'a yib'n̈ 'ix Lea. Xmunljto pax win Jacob uque xo ab'il 'a Labán.

Eb' yunnal Jacob

³¹ Ax xyiln Jehová to tzchab'c'ojlej Jacob 'ix Lea, yuj cha, 'ix yalni, to tz'unewi 'ix, ax pax 'ix Raquel may yune 'ix.

³² Scuchn chan̈ 'ix Lea yune', ax yic x'alj jun swinc 'unn 'ix, xya'n eb' sb'ic Rubén, yujto xyal 'ix 'ixtic: A Jehová, a x'ilni to patcab'iln 'el yuj wichmil, ax ticnec 'oj in chamc'ojlax yu'uj, xchi 'ix.

³³ Scuchn chan̈ 'ix junx yune', ax yic x'alj junx yune 'ix cha, xya'n eb' sb'ic Simeón, xyaln 'ix 'ixtic: 'Ix yil Jehová to chab'c'ojlb'iln 'eli, yuj cha, xyac' junx wune tic, xchi 'ix.

³⁴ Scuchn pax chan̈ 'ix yune', ax yic x'alj junx yune 'ix cha, xya'n eb' sb'ic Leví, xyaln pax 'ix 'ixtic: A ticnec, junxn̈ej 'oj 'ajcn wichmil tic wet'oc, yujto 'ayx 'oxwn̈ wune yet'oc, xchi 'ix.

³⁵ Scuchn chan̈ 'ix yune jun 'ejm xo, ax yic x'alj junx yune 'ix cha, xya'n eb' sb'ic Judá, xyaln pax 'ix 'ixtic: A ticnec b'i'an, tzwij chan̈ sb'i Jehová, xchi 'ix Lea cha. Cojxn cha, 'ix 'och wan 'ix yunewi.