Gn 25 - Chuj San Sebastian Bible

Eb' yunnal Abraham yet' 'ix Cetura

¹ 'Ix yij Abraham junx 'ix 'ix yistziloc, atn 'ix Cetura sb'i.

² Atn eb' yunnal tic yet' 'ix, Zimram, Jocsán, Medán, Madián, Isbac yet' Súa.

³ A Jocsán atn smam Seba yet' Dedán. Ax eb' yin̈tl Dedán, atn eb' asureo, eb' letuseo yet' eb' leumeo.

⁴ A eb' yunnal Madián atn: Efa, Efer, Hanoc, Abida, yet' Elda. Smasnil jun tzo'n̈ eb' tic, yin̈tl 'ix Cetura eb'.

⁵ Smasnil tas 'ay 'a Abraham, 'ix ya'cn smacloc win Isaac.

⁶ Ax pax eb' yune jun tzo'n̈ xo eb' 'ix yistzil win Abraham cha, cojn siylab' xya'cn win 'a eb'. A yic pitznto winac, 'ix syamn 'och schecn can 'el ewin 'a stz'ey Isaac, 'ix checx can 'at eb' 'a lum lum 'ay 'a stojlal 'aj tzq'uel c'u.

Schamlil win Abraham

⁷ A Abraham 175 ab'il sq'uinal yic 'ix chami.

⁸ 'Ichm wincal x'i'ni yic xchami.

⁹ A eb' yunnal, atn Isaac yet' Ismael, 'ix 'at eb' smuc 'a yojl q'uen q'uen olb'il 'a Macpela, 'a yojltac 'at Mamre, atn 'a lum slum can win Efrón yunnal Zohar win hitita.

¹⁰ Atn lum manb'il can yuj Abraham chi 'a eb' hitita. Ata junn̈j xmucx can Abraham chi yet' 'ix Sara, atn 'ix yistzil winac.

¹¹ Ax yic tox xcham win Abraham cha, ax Dios x'a'n swach'c'ojlal 'a yib'n̈ Isaac. Ata xcancn cajn 'a stz'ey a 'uc'b'il a tzcuch Dios Pitzan A Tzin 'Ilni.

Eb' yin̈tl Ismael

¹² Atn eb' yunnal win Ismael tic, win yunnal can Abraham yet' 'ix Agar, 'ix 'aj Egipto ya'mal servil Sara.

^13-15 Atn stzol-l x'aj yalj eb' tic: Nebaiot, atn win b'ab'l winc cha; xlajw cha, x'alj Cedar, Adbeel, Mibsam, Misma, Duma, Massa, Hadar, Tema, Jetur, Nafis yet' Cedema.

¹⁶ Atn sb'i eb' lajchwan̈ yunnal Ismael tic. A sb'i ewin chi x'och sb'ic slu'um, lum 'aj xcan cajn junjn ewinac. Junjn eb', yajl x'ajcn eb' 'a junjn schon̈b' cha.

¹⁷ Ax Ismael 137 ab'il sq'uinal yic 'ix chami.

¹⁸ A smasnil eb' yin̈tl cha, 'ix c'ochcn cajn eb' 'a snan̈l lum Havila yet' Shur, 'a yojltac cot Egipto, 'a 'aj tz'at sb'el Asiria. Ata 'ix 'aj cajn eb', toxn̈ej matz yal sc'ojl eb' yican eb' cha, palta 'ix c'och cajn eb' ta'.

Yaljub'al Jacob yet' Esaú

¹⁹ Atn eb' yin̈tl Isaac tic, yunnal can win Abraham.

²⁰ A Isaac 40 ab'il sq'uinal, yic xyi'n sb'a win yet' 'ix Rebeca yisl Betuel, yanb' Labán win arameo, cajn 'a Padan-aram.

²¹ A 'ix Rebeca cha, may yune 'ix, ax Isaac xleslwi 'a Jehová yic tzya'n Dios yunnal eb'. Ata xyab' Jehová slesal, yuj cha, scuchn chan̈ 'ix Rebeca chi yune b'i'an.

²² Ax eb' 'unn cha, tiyx eb', caw tzyac' eb' owl 'a yol sc'ojl snun cha. Yuj cha, 'ix snan 'ix 'ixtic: Toto 'ixtc jun tic tzjaw 'a wib'an̈, ¿tasto wal yuj pitzn in? xchi 'ix. Yuj cha, x'at 'ix 'at yal syailal 'a Jehová.

²³ 'Ix ta'w 'ixtc 'a 'ix: Chab' chon̈b'al 'aych yin̈tl 'a yol a c'ojol. A chab' chon̈b'al cha, 'oj 'och eb' 'ajc'ojlal 'a jun jun. Jun caw 'ay yip 'a yib'n̈ junx cha. A win b'ab'el 'oj can win 'a yaln̈ schecnb'il win tza'n 'unin, xchi Dios.

²⁴ 'Ix c'och sc'ul yalj yune 'ix Rebeca cha, tiyx eb' 'unn chi x'alji.

²⁵ Win xb'ab'l 'alji, chac yilx winac, caw patztac sniwnal yet' xi'il, xya'n eb' sb'ic Esaú.

²⁶ Tza'n sjapx jun yu'tac cha, t'un̈n 'och 'a yich sq'uenl yoc Esaú, xya'n eb' sb'ic Jacob. 60 ab'il sq'uinl win Isaac yic x'alj eb' yune 'ix Rebeca cha.

Schon̈cn Esaú*r* smacl yic b'ab'l 'unnab'ilal

²⁷ 'Ix q'uib' chan̈ chawn̈ eb' 'unn cha. A win Esaú schaj sc'ojl win yec' b'eyc'oc 'a calte'. Caw jeln x'aj win 'a ma'j noc'. A pax win Jacob jun, cojn ta tzmunlj 'a scamplamento eb'.

²⁸ Caw wal 'ay schamc'ojlal Isaac 'a win Esaú cha, yujto caw tznib'j win Isaac tzchi no c'ultcal noc' tzjaw yuj winac. Ax pax 'ix Rebeca cha, caw wal tzalj 'ix yet' win Jacob.

²⁹ 'Ay jun c'ual, wan sb'on win Jacob tas tzc'uxu, yic xjaw win Esaú b'eyc'oc 'a b'esan, caw wal c'unb'nac winac.

³⁰ Yuj cha, xyaln win Esaú 'ixtc 'a win Jacob: —Tzin tew 'ayach, 'ac' in c'ux jac a tan chac yilx cha, caw tzin cham yuj wejel, xchi winac. (Yuj cha, Edom x'ajx can sb'ic winac.)

³¹ Palta xyaln Jacob 'ixtic: Toto tza ta'wj can a macl yic b'ab'l 'unnab'ilal 'ayin, toto 'ixta', tzwac' tas tza c'uxu, xchi Jacob cha.

³² Yuj cha, xyaln Esaú 'ixtic: —'Ilto, wan in cham yuj wejel, yilx jun in macl yic b'ab'l 'unnab'ilal cha ¿tas wal 'oj 'och wu'uj? xchi winac.

³³ 'Ix yaln pax Jacob: 'Ac' a ti 'ayn 'a yic jun rato tic, xchi Jacob cha. —Inye, xchi Esaú, 'ix ya'n sti yic tzch'oxn 'eli to tzta'wj can smacl yic sb'ab'l 'unnab'ilal 'a Jacob cha.

³⁴ Xlajw cha, xya'n Jacob wa'il, yet' jun 'uc'b' tan chi 'a Esaú, ax yic xlajw swa'i, 'ix q'ue wa'an, 'ix 'atxi, may xon jac tas tzna yuj smacl yic sb'ab'l 'unnab'ilal cha.