Gn 18 - Chuj San Sebastian Bible

Xyac' Dios sti ya'n yunnal Abraham

¹ Xlajw cha, sch'oxn sb'a Jehová 'a win Abraham 'a sla'nil 'aj 'ay te ma'ach', 'a yol yic win Mamre. Yic am chimc'ual, wocn 'elt Abraham 'a sti smantiado,

² ax xyilni lin̈n 'ec' 'oxwn̈ winc 'a yojltac 'ati. A yic 'ix yiln cha, yajn̈j wal cha, 'ix 'at win 'at scha eb' muc'uc. Xlajw cha, x'em n̈ojnjoc win 'a sat lum 'a yojltac eb'.

³ 'Ix yaln Abraham 'a eb' 'ixtic: —Ex wajlil, tzin tew 'ayex mant ex 'atoc.

⁴ Tan̈wjec, tic tzin 'at wala', sec tz'ijx cot jac eya'al, yic tze b'icn 'el eyoc, 'iljan̈c 'a yich te te tic b'ela.

⁵ Ya' sb'a a 'a in tz'ey tic tzex 'eq'ui, tic tzin 'at wic' jac tas tze c'uxu, yic wach' 'oj 'ochx eyip, ax e 'atxi, xchi 'a eb'. —'Ixc 'an, xchi eb' 'a 'a.

⁶ Xlajw cha, x'och Abraham mu'c 'a yol smantiado, 'ix yaln 'a 'ix Sara 'ixtic: —¡C'olep! 'ij cot 'oxe'oc 'echtab'il 'ixm harina caw wach', tza b'on jaye'oc 'ixm wal ton̈j tzb'olx 'a stzac'ac', xchi.

⁷ Xlajw cha, 'ix 'at Abraham mu'c 'a 'aj 'ay no swacax, x'at yi'n cot jun no quelm wacx caw wal b'aq'uech, xya'n win no 'a jun win schecab' yic tzb'on win muc'uc, yic tzchix no'.

⁸ 'Ix yi'n cot pax win mantequilla, lech yet' pax no schib'jal wacx 'ix sb'o cha. 'Ix ya'n wa win eb' winc chi 'a yich te te cha, 'ayc'n̈ej Abraham chi yet' ewinac, yic xwa eb' cha.

⁹ Ax yic xlajw swa eb' cha, 'ix sc'anb'n eb' 'ixtc 'a Abraham: —¿'Ajtil 'ay 'ix estzil Sara? xchi eb' 'a 'a. —'Aych 'ix 'a yol qui mantiado tic on̈, xchi winac.

¹⁰ Xlajw cha, xta'w jun 'a scal eb' 'oxwn̈ chi 'ixtic: —Yab'n 'ixtc wal junab', 'oj in jaw pax jun 'ejm xo wul ach wila', 'oj 'aljoc yune 'ix estzil cha, winc 'unn jun 'unn cha, xchi 'a Abraham. Ax 'ix Sara cha, ton̈j tz'ab'xni 'ix 'a tas tzalx cha, ata 'ayc' 'ix 'a spatc 'och Abraham 'a yol 'och sti smantiado eb'.

¹¹ A Abraham yet' 'ix Sara cha, caw wal 'ichm 'anma xo eb', 'ayxtax tiempo scan sch'oxn sb'a a a 'a 'ix.

¹² Yuj cha, ton̈j stzewj 'ix 'a yol sc'ojol, yic xyab'n 'ix yalx jun cha, 'ix snan 'ix 'ixtic: ¿Tasto wal 'oj wutc in nib'n jun tic, 'in chichm inx 'ix, yet' 'ichm winc xo win wichmil tic? xchi 'ix.

¹³ Yuj cha, xyaln Jehová 'ixtc 'a Abraham: —¿Tas yuj ton̈j tzewj 'ix Sara tic? ¿Am snan 'ix, yujto chichm 'ixx 'ix, man̈xtzac stac' yiln 'ix satc junc 'unin?

¹⁴ ¿Tecn 'ay tas matz tac' wuj am e nani? Yab'n 'ixtc junab', 'oj in jaw jun 'ejm xo wul ach wila'. 'Oj 'aljoc jun swinc 'unn 'ix Sara tic, xchi 'a Abraham cha.

¹⁵ A yic xyab'n 'ix Sara jun cha, caw xiw 'ix, 'ix yaln 'ixtic: —Toc wal 'ayn tzin tzewji, xchi 'ix, yuj cha, xta'w Jehová 'ixtc 'a 'ix: —Wojtac to ach tzewji, xchi 'a 'ix.

Tztew Abraham 'a Dios*r* yuj chon̈b' Sodoma

¹⁶ Xlajw cha, 'ix 'atx eb' winc cha, a 'a sb'el Sodoma 'aj 'ix 'at eb'. 'Ix 'at Abraham yet' eb' jab'xo, yic tzyaln can sb'a 'a eb'.

¹⁷ Yuj cha, snan Jehová 'ixtic: Smoj waln yab' Abraham tic tas jab'xoj in b'oni,

¹⁸ yujto a 'oj 'och smamc jun niwquil chon̈b' to caw 'ay yip. Tox 'ix wac' in ti 'a 'a; to yu'uj ax schan smasnil chon̈b' 'a yolyib'n̈q'uinl tic in yaxilal.

¹⁹ An 'ix in sic' 'elta yic tzyaln smasnil in checnb'il 'a eb' yunnal yet' 'a smasnil eb' yin̈til, sec 'oj syiclc eb'. Ax sb'eylb'an eb' smasnil tas wach' yet' tas tojol, sec wach' tz'el'ch smasnil tas waljnac can yet' in ti 'a eb', xchi Dios 'a snab'en.

²⁰ Xlajw cha, 'ix yaln Jehová 'a Abraham 'ixtic: —A smasnil eb' 'anma 'a Sodoma yet' 'a Gomorra, caw wal tu yalx speclal eb'. Yel xo wal caw xniwtj smaysch'olnilal eb'.

²¹ A ticnec, tic tzin 'at wila', toto caw yel tzniwtj smaysch'olnilal eb' 'icha tz'aj yalx 'ayn cha, 'ixta 'oj wutc wojcan 'eli, toto caw yel, xchi Dios.

²² A chawn̈ eb' winc x'ec' paxtinc yet' Abraham cha, tojl xoj x'at eb' 'a Sodoma, ax pax Abraham, 'ix cancn paxtinc yet' Jehová.

²³ 'Ix snitzn 'o'ch sb'a jab'x 'a stz'ey Dios, 'ix sc'anb'n 'a 'ixtic: —¿Tom 'oj a satl eb' 'anma may smul yet' eb' 'ay smul?

²⁴ Q'uinloc 'ay 50 'anma may smul 'a yol schon̈b' cha, ¿tom 'oj a satl jun chon̈b' cha? ¿Ma'oj 'ac' am niwnc'ojlal eb' yuj eb' 50 may smul cha?

²⁵ Ma'oj stac' a b'on 'ixta', yic tza satn 'el eb' may smul yet' eb' 'ay smul, 'icha to lajn xoj eb' tzyal cha. Man̈ a b'o 'ixta'. Caw Yajl ach 'a yolyib'n̈q'uinl tic. Toc wal 'oj a b'o tas man̈ tojloc, xchi Abraham 'a Dios.

²⁶ Yuj cha, xta'w Jehová 'ixtc 'a winac: —Toto 'ay 50 'anma wach' sb'eyb'al 'a yol chon̈b' Sodoma, yuj eb' 50 cha, 'oj wac' niwnc'ojlal 'a smasnil 'anma cajn 'a jun chon̈b' cha, xchi.

²⁷ 'Ix yaln pax Abraham 'ixtic: —'Ac' niwnc'ojlal 'ayin, to tzin paxtin to jacx et'oc, ach tic Yajl ach, an tic 'anmann̈ej, may jac wel'chi.

²⁸ Q'uinloc 'ayt own̈oc 'anma matz tz'acw 'a 50 'a eb' wach' sb'eyb'al, ¿tom yuj wal own̈ xo cha, tza satn 'el jun chon̈b' cha? xchi winac. 'Ix ta'w Dios 'ixtc 'a 'a: —Toto 'ay 45 'anma caw wach' sb'eyb'al, matz in satl jun chon̈b' cha, xchi.

²⁹ 'Ix yaln pax Abraham jun 'ejm xo: —Q'uinloc cojxn 40 'anma wach' sb'eyb'al 'ay 'a jun chon̈b' cha, xchi winac. —Yujn̈ej eb' 40 cha, ma'oj in satl jun chon̈b' cha, xchi Dios.

³⁰ 'Ix yaln pax Abraham: —Ach Wajlil, tzin tew 'ayach, comnoc matz cot owl 'ayin, yujto tzin tew 'och 'ayach, q'uinloc cojxn 30 eb' 'anma wach' sb'eyb'al tz'ilchj o'oj, xchi 'a Dios. 'Ix ta'w pax Dios, xyaln 'ixtic: —Yuj 30 'anma may smul cha, 'oj wac' niwnc'ojlal 'a yib'n̈ jun chon̈b' cha, xchi.

³¹ 'Ix 'och tecn Abraham yaln 'ixtc 'a Dios: —Mamin ach Wajlil, tzin tew 'och wal 'ayach, ¿tas wal tzotej, toto cojxn junc'l 'anma may smul? xchi. 'Ix ta'w pax Dios, xyalni: —Yuj junc'l 'anma wach' sb'eyb'al cha, ma'oj in satl jun chon̈b' cha, xchi.

³² 'Ix yaln Abraham jun 'ejm xo: —'Ac' wal niwnc'ojlal 'ayn Mamin, ach Wajlil matz cot cab' owl 'ayin, cojxn jun 'ejm tic tzin tew 'ayach. ¿Tas tzotej toto cojxn lajn̈wan̈ 'anma wach' sb'eyb'al tz'ilchj o'oj? xchi. 'Ix yaln pax Dios 'a 'a: —Toto 'ay lajn̈wan̈ 'anma wach' sb'eyb'al, matz in satl jun chon̈b' cha, xchi Dios.

³³ Ax yic xlajw spaxtin eb' cha, 'ix 'at Jehová. Ax Abraham 'ix meltzj can pax 'a smantiado.