Gn 17 - Chuj San Sebastian Bible

A circuncisión yechl strato Dios

¹ A Abram 99 ab'il sq'uinal, yic sch'oxn sb'a Jehová 'a 'a, xyaln 'a 'ixtic: —An ton Dios in, tztac' wuj smasnil, wach' tzotj a b'a 'a in sat.

² 'Oj wac' jun in trato et'oc, to niwn en̈tl 'oj 'eloc, xchi 'a 'a.

³ Yuj cha, x'em n̈ojn Abram 'a sat lu'um, ya' sb'a tzpaxtin Dios 'a 'a, 'ix syamn 'och Dios yaln 'ixtic:

⁴ —Yaj jun in trato tic 'oj wac' et'oc: To niwn nacion̈ 'oj och smam 'ichmoc.

⁵ Man̈x Abram 'oj a b'i'oc, palta Abraham 'oj a b'i'oc, yujto niwn nacion̈ 'oj ach wa'ch smam 'ichmoc.

⁶ Niwn 'oj 'ajl en̈tl wu'uj, 'oj 'och eb' nacion̈al. A 'a scal en̈tl cha, ata 'oj 'eltoc eb' rey.

⁷ A jun in trato tzwac' et' tic, yet' smasnil pax eb' en̈tl 'a smasnil tiempo, to a Diosal in, sDiosal in pax eb' en̈tl cha.

⁸ 'Oj wac' smasnil lum Canaán tic 'ayach, yet' 'a eb' en̈tl 'a jun 'ejmn̈ej, ax woch sDiosalc eb', xchi Dios 'a Abraham cha.

⁹ 'Ix yaln pax Dios 'a Abraham 'ixtic: —Palta ach xo tic, yiclj jun in trato tic yet' eb' en̈til, yowlal tzyiclj pax eb'.

¹⁰ Atn jun in trato tic tzwac' et'oc, yowlal tzyiclj smasnil eb' en̈til, smasnil winc 'unin, yowlal tz'ajx 'och yechl sniwnal.

¹¹ Yuj cha, 'ijx cab' 'el jac stz'umal sjolm swincal eb' winac, atn jun cha, yechl in trato tz'ajcn eyet'oc.

^12-13 Yucb'ixial yalj junjn winc 'unin, tz'ajx 'och jun yechl chi 'a eb' eyunnal yet' 'a yunnal eb' e checab'. An̈jtona yet' eb' e checb' manb'il 'a chuc chon̈b'al, tz'ajx 'och jun yechl chi 'a eb'. Junjn ex yowlal tz'ajx 'och jun yechl chi 'ayex, matz 'eq'ui, sec a jun in trato tzwac' eyet' cha, checl cab' 'a e niwnal 'a smasnil tiempo.

¹⁴ Tzann̈j wincal to may jun yechl chi 'aych 'a 'a, yowlal tzeyij 'el 'a e cal, yujto matz yiclj jun in trato 'ix wac' eyet'oc, xchi Dios.

¹⁵ Xyaln pax Dios 'a Abraham 'ixtic: —Ticnec yet' 'a ojltac b'aq'uin̈, man̈xtoc Sarai 'oj sb'ic 'ix estzil tic, palta Sara 'oj sb'ic can 'ix.

¹⁶ 'Oj wac' yaxilal 'a yib'n̈ 'ix, 'oj 'aljoc junc onnal yet' 'ix, niwn nacion̈ 'aj 'oj 'och 'ix nunb'ilal. Caw niwn eb' sreyl chon̈b' 'oj 'eltoc 'a scal yin̈tl 'ix, xchi Dios.

¹⁷ A yic xyab'n win Abraham jun cha, 'ix 'em n̈ojnjoc, masnto x'emch snan̈l sat 'a sat lu'um. 'Ix stzewji, syamn 'och snan 'ixtic: ¿Tom 'oj jawc to wal wunnal, jun ciente ab'il xo in q'uinal, ax 90 ab'il xo sq'uinl Sara? ¿Tom 'oj jawc to wal yune 'ix? xchi 'a snab'en.

¹⁸ Xlajw cha, xyaln win 'ixtc 'a Dios: —Octom wal tz'el 'a a c'ojol, tzac' stzatzl win Ismael tic. Comnoc wach' tz'el'ch can winac, xchi.

¹⁹ Yuj cha, xta'w Dios 'a Abraham 'ixtic: —Tox 'ix wal 'ayach, chajtlto 'oj jawc jun onnal yet' 'ix Sara. Isaac 'oj ac' sb'ioc, atn yet' win 'oj wac' jun in trato tic yet' 'a jun 'ejmn̈ej, yet' pax 'a eb' yin̈tl winac.

²⁰ Ax pax Ismael, tox 'ix wab' tas tzal yu'uj. 'Oj wac' 'in yaxil 'a yib'n̈ winac, yuj cha, niwn 'oj 'aj yunnal, 'oj niwtjoc chan̈ sb'isl yin̈til. A 'a scal yin̈tl win cha, ata 'oj 'eltoc lajchwan̈oc eb' niwc yajal. A yin̈tl cha, niwc nacion̈ 'oj 'aj 'el'chi.

²¹ A pax in trato 'ix wac' eyet'oc, 'oj 'el'choc yet' win Isaac, win onnal 'oj 'aljoc 'a 'ix Sara yab'n 'ixtc junab', xchi 'a Abraham.

²² A yic xlajw spaxtin Dios yet' Abraham, 'ix 'ati.

²³ Wal 'a jun c'u cha, 'ix ya'ch Abraham yechl win Ismael yet' 'a smasnil eb' schecab', eb' to 'aljnac 'a yatut, yet' smasnil eb' to manb'il yu'uj, yet' smasnil eb' winc cajn 'ec' yet' 'a yatut. 'Ix ya'ch yechl eb' smasnil, 'icha xyutj yaln Dios 'a 'a.

^24-25 A Abraham 99 ab'il sq'uinal, ax Ismael 'oxlajn̈e ab'il sq'uinal yic 'ix 'ajx 'och jun yechl chi 'a eb'.

²⁶ A 'a jun c'u cha, ata x'ajx 'och jun yechl chi 'a Abraham yet' 'a jun yunnal cha,

²⁷ yet' 'a smasnil eb' winc 'ayc' yet'oc, yet' 'a eb' schecb' 'aljnac 'a yatut, yet' pax 'a eb' manb'il yuj 'a junc xo chuc chon̈b'al.