Gn 16 - Chuj San Sebastian Bible

'Ix Agar yet' win yune tzcuch Ismael

¹ A 'ix Sarai yistzil win Abram, man̈ 'unewumoc 'ix, palta 'ay jun 'ix ya'mal servil 'ix tzcuch Agar, 'aj Egipto 'ix.

² 'Ix yaln 'ix Sarai chi 'a win yichmil 'ixtic: —'In may wune tzyac' Jehová tic, yuj cha, tzin tew 'ayach, to tzach way yet' 'ix wa'mal servil tic. Toq'ue tz'alj junc yune 'ix, sec a tz'och wune'oc, xchi 'ix. Xchaj sc'ojl Abram tas 'ix yal Sarai cha.

³ A yic slajn̈il xo ab'il sjaw eb' 'a Canaán, xya'n 'och 'ix Sarai chi 'ix ya'mal servil chi 'a yol sc'ab' yichmil cha, yic tz'och 'ix schab'l 'istziloc winac.

⁴ Yuj cha, xway Abram yet' 'ix Agar cha, 'ix scuchn chan̈ 'ix yune'. Palta ax xyab'n 'ix to 'ayx 'unn chi 'a 'ix, yuj cha, man̈x 'a yel'ch 'ix Sarai 'a sat 'ix.

⁵ Yuj cha, xyaln 'ix Sarai 'a win Abram 'ixtic: —¡O'oj, yuj cha, tzin syajn 'el 'ix 'ix xwac' 'aych tic! Tic wal pax an 'ix wac' 'ix 'ayach. Ocxom wal 'oj 'aljoc yune 'ix cha, caw niwn yel'ch 'ix 'a wib'n̈ tzyutj snani. Sb'eyc'ojloc on̈ cab' Jehová et'oc, ach am 'ay a mul, mto a 'in, xchi 'ix Sarai.

⁶ Yuj cha, xta'w Abram 'ixtic: —A 'ix 'a'mal servil tic, yol a c'ab' 'ay 'ix. Ach tza na'a tas tzotj 'ix, xchi winac. Yuj cha, x'och 'ix Sarai 'ajc'ojlal 'a 'ix Agar, masnto x'at 'ix 'elc yuj 'ix.

⁷ Palta ax jun yángel Jehová schaj sb'a yet' 'ix Agar 'a cusltac lu'um, 'a sla'nil sti jun a a', 'a 'aj tz'atcn sb'el Shur.

⁸ 'Ix sc'anb'n 'a 'ix 'ixtic: —Agar, ach ya'mal servil Sarai, ¿'ajtil tzach coti? ¿'ajtil pax tzach 'ati? xchi 'a 'ix. —To tzin 'at 'elc yuj 'ix Sarai 'ix in patron̈, xchi 'ix.

⁹ Yuj cha, 'ix yaln jun yángel Jehová chi 'ixtc 'a 'ix: —Meltzjan̈ 'a 'ix a patron̈ cha, yiclum tzotj a b'a 'a 'ix, xchi.

¹⁰ 'Ix yaln pax jun yángel Jehová chi 'a 'ix 'ixtic: 'Oj wac' niwtjoc sb'isl en̈til, may mach 'oj stac' sb'isni.

¹¹ Totn et'x one jun, yuj cha, a yic 'oj 'aljoc jun one cha, 'oj ac' sb'ic Ismael, yujto xyil Jehová a cusc'ojlal.

¹² Yuj cha, caw jeln 'oj 'aj 'el'ch jun 'unn cha, 'icha junc no c'ultquil chej. 'Oj yac' win owl yet' eb' 'anma', ax ya'n pax eb' 'anma owl yet' winac. Palta 'oj niwtjoc eb' yin̈til, toxn̈ej to matz chaj sc'ojl eb' yu'tac win cha, xchi jun ángel cha.

¹³ Yujto xpaxtin Agar yet' Dios, yuj cha, xya'n can sb'ic Jehová 'ixtic: A Dios Wilmal. Wal yel xwil in Diosal tzin 'ilni, xchi 'ix.

¹⁴ Yuj cha, xya'n 'ix sb'ic jun 'uc'b'il a chi 'ixtic: Yuc'b'il a Dios Pitzan, tzin yiln paxi, xchi 'ix. 'Ixta scuchcn a 'uc'b'il a 'ay 'a snan̈l Cades yet' Bered.

¹⁵ 'Ix 'alj jun yune 'ix Agar yet' Abram, winc 'unin, 'ix ya'n win sb'ic Ismael.

¹⁶ Ax Abram 86 ab'il sq'uinal yic 'ix 'alj Ismael cha.