Gn 11 - Chuj San Sebastian Bible

A jun torre Babel sb'i

^1-2 A 'a yic pecti', junn̈j sti eb' 'anma tzyala. 'Ix 'el eb' 'a lum lum 'ay 'a stojlal 'aj tzq'uel c'u, ax x'aji, 'ix 'ilchj jun niwquil pan̈n yuj eb' 'a yol yic Sinar, ata 'ix can cajn eb'.

³ 'Ay jun c'ual, 'ix yal eb' 'ixtic: Qui b'oc lum ladrillo, tzlajw cha, tzqui mucnec 'elta, xchi eb'. Atn chi sc'anlb'ej eb', yujto may q'uen q'uen ta', ax jun asfalto 'icha tzataj, a 'ix ya'ch eb' spixloc.

⁴ Xlajw cha, xyaln pax ewin 'ixtic: Cotn̈ec, qui b'oc junc niwquil chon̈b' 'a tic. Tzlajw cha, tzqui b'onec junc niwquil torre, masnto tzq'ue'ch 'a satcha'an̈, yic wach' tzon̈ b'inaxec si'mb'il. Junxn̈ej tzon̈ 'ajc qui masnil, man̈xtzac on̈ sactzic 'a sat lum lum tic, xchi ewinac.

⁵ Ax Jehová, 'ix 'eml wul yil jun chon̈b' cha, yet' jun torre tzb'o eb' cha.

⁶ Yuj cha, xyaln Jehová 'ixtic: A eb' 'anma tic, junn̈j chon̈b'al yaj eb', junn̈j pax sti eb', ¿toc 'ay tas tztenn 'och wan eb' 'a jun munjel x'el yich sb'on eb' tic?

⁷ Ax ticnec, 'em coyc 'a scal eb', ca'c somchjoc 'el sti eb', yic wach' man̈xtoc 'oj yab'lac eb' sti', xchi.

⁸ 'Ixta 'ix 'aj sactzic can 'at eb' 'a sat lum lum tic yuj Jehová, 'ix yactn eb' sb'on jun chon̈b' cha.

⁹ Yuj cha, Babel 'ix scuchcn jun chon̈b' cha. A 'a jun lugar chi 'ix yac' Jehová somchjoc can sti eb' 'anma 'a sat lum tic, 'ix sactzic can 'at eb' 'a yolyib'n̈q'uinl tic yu'uj.

Eb' yin̈tl Sem

¹⁰ Atn yab'xil eb' yin̈tl win Sem tic: Jun ciente ab'il xo sq'uinl Sem 'a jun tiempoal cha, yic x'alj jun yunnal Arfaxad sb'i, 'a yic schab'l ab'il xo ye'cn owl yaxn̈ab'.

¹¹ Xlajw cha, o'e ciente ab'il to 'ix 'ec' Sem, 'ayt eb' yunnal yet' eb' yisl x'alji.

¹² A Arfaxad 35 ab'il sq'uinal yic 'ix 'alj jun yunnal Sala sb'i.

¹³ Xlajw cha, 403 ab'il to 'ix 'ec' Arfaxad, 'ayt eb' yunnal yet' eb' yisl x'alji.

¹⁴ A Sala 30 ab'il sq'uinal yic 'ix 'alj jun yunnal Heber sb'i.

¹⁵ Xlajw cha, 403 ab'il to 'ix 'ec' Sala, 'ayt eb' yunnal yet' eb' yisl x'alji.

¹⁶ A Heber 34 ab'il sq'uinal yic 'ix 'alj jun yunnal Peleg sb'i.

¹⁷ Xlajw cha, 430 ab'il to 'ix 'ec' Heber, 'ayt eb' yunnal yet' eb' yisl x'alji.

¹⁸ A Peleg 30 ab'il sq'uinal yic 'ix 'alj jun yunnal Reu sb'i.

¹⁹ Xlajw cha, 209 ab'il to 'ix 'ec' Peleg, 'ayt eb' yunnal yet' eb' yisl x'alji.

²⁰ A Reu 32 ab'il sq'uinal yic 'ix 'alj jun yunnal Serug sb'i.

²¹ Xlajw cha, 207 ab'il 'ix 'ec' Reu, 'ayt eb' yunnal yet' eb' yisl x'alji.

²² A Serug 30 ab'il sq'uinal yic 'ix 'alj jun yunnal Nacor sb'i.

²³ Xlajw cha, chab' ciente ab'il 'ix 'ec' Serug, 'ayt eb' yunnal yet' eb' yisl x'alji.

²⁴ A Nacor 29 ab'il sq'uinal yic 'ix 'alj jun yunnal Taré sb'i.

²⁵ Xlajw cha, 119 ab'il to 'ix 'ec' Nacor, 'ayt eb' yunnal yet' eb' yisl x'alji.

²⁶ Ax Taré 70 ab'il sq'uinal yic 'ix 'alj jun yunnal Abram sb'i, xlajw cha, x'alj Nacor, yet' pax Harán, atn eb' yunnal tic yoxwn̈il.

Eb' yin̈tl Taré

²⁷ A jun tic, yab'xil eb' yin̈tl Taré, atn win smam Abram, Nacor, yet' Harán. A Harán cha, atn smam Lot.

²⁸ 'Ix cham win Harán 'a chon̈b' Ur 'a yol yic Caldea 'a 'aj 'aljnac. A yic mantzac cham smam, 'ix chami.

²⁹ 'Ix yi'n sb'a Abram yet' Sarai. Ax Nacor 'ix yij sb'a yet' 'ix Milca, 'ix yisl Harán, snul'j sb'a 'ix yet' Isca.

³⁰ A 'ix Sarai cha, man̈ 'unewumoc 'ix.

³¹ Xlajw cha, 'ix 'el Taré 'a yol chon̈b' Ur 'a yol yic Caldea, yic tz'at 'a yol yic Canaán. 'Ix yi'n 'at jun yunnal yet'oc atn Abram, 'ix yi'n pax 'at Lot, atn win yixchiquin, win yunnal can win Harán, yet' 'ix yalb' winac, tzcuch Sarai. Xc'och eb' 'a chon̈b' Harán, ata 'ix can cajn eb' ta'.

³² Ata 'ix cham win Taré 'a lum Harán cha, 205 ab'il xyila, xlajw cha, xchami.