Gn 10 - Chuj San Sebastian Bible

A eb' yin̈tl eb' yunnal Noé

¹ A jun tic yab'xil eb' yunnal Noé, atn sb'i eb' tic: Sem, Cam yet' Jafet. Yic 'ix lajw 'ec' niwquil owl yaxn̈ab', 'ix laj 'alj yunnal eb'.

² Atn sb'i eb' yunnal Jafet tic: Gomer, Magog, Madai, Javán, Tubal, Mesec, yet' Tiras.

³ Atn sb'i eb' yunnal Gomer tic: Askenaz, Rifat, yet' Togarma.

⁴ Atn sb'i eb' yunnal Javán tic: Elisa, Tarsis, Quitim, yet' Dodanim.

⁵ A eb' tic, yin̈tl Jafet eb' smasnil. Ata x'aj cajn eb' 'a stitc a mar, junjn c'aj eb' yet' slu'um, junjn c'aj eb' yet' sti'.

⁶ Atn sb'i eb' yunnal Cam tic: Cus, Mizraim, Fut yet' Canaán.

⁷ Ax eb' yunnal win Cus, atn Seba, Havila, Sabta, Raama yet' Sabteca. Eb' yunnal Raama, atn Seba, yet' Dedán.

⁸ A Cus, smam Nimrod, a Nimrod, a b'ab'l yajl x'aj 'a scal eb' chon̈ab'.

⁹ A Nimrod cha, jeln sma'w noc' 'a sat Jehová, yuj cha, 'ay jun paxti tzyal eb' 'anma 'ixtic: Lajn win 'icha Nimrod, win jeln sma'w noc' 'a sat Jehová, xchi eb'.

¹⁰ A eb' chon̈b' 'aj yajl yaj Nimrod, 'ix 'el yich yuj 'a Babilonia, 'a Erec, 'a Acad yet' 'a Calne. A 'a yol yic Sinar ata 'ay jun tzo'n̈ chon̈b' cha.

¹¹ Xlajw cha 'ix 'at 'a Asiria; ata 'ix sb'o chan̈e xo niwc chon̈ab': atn chon̈b' Nínive, Rehobot-ir, Cala,

¹² yet' chon̈b' Resén, jun 'aycn 'a snan̈l Nínive yet' Cala. A chan̈e chon̈b' tic, junxn̈ej chon̈b'al x'aji.

^13-14 A eb' yin̈tl Mizraim atn eb' ludeo, eb' anameo, eb' lehabita, eb' naftuhita, eb' patruseo, eb' casluhita yet' eb' caftorita. A 'a eb' tic, cotnc yin̈tl eb' filisteo.

^15-19 A win sb'ab'l 'unnal Canaán, atn Sidón. An̈jtona jun tzo'n̈xo eb' tic yin̈tl win Canaán chi eb': eb' hitita, eb' jebuseo, eb' amorreo, eb' gergeseo, eb' heveo, eb' araceo, eb' sineo, eb' arvadeo, eb' zemareo, yet' eb' hamateo. Jab'jnal 'ix pucb't eb'. Xlaj smacnc 'ec' eb' yico'oc jun tzo'n̈ lum lum tic, tzcot lum 'a smon̈jon Sidón, x'emch lum 'a stojlal Gerar, masnto tzc'och 'a Gaza. Tz'atx lum ta', masnto 'a yol yic Sodoma, Gomorra, Adma, yet' Zeboim, tzmeltzj pax lum ta', masnto tzc'och lum 'a chon̈b' Lasa.

²⁰ A eb' tic yin̈tl win Cam eb', junjn c'aj eb' yet' yin̈til, junjn c'aj eb' yet' slu'um, junjn c'aj eb' yet' sti'.

²¹ A Sem atn sb'ab'l 'u'tac Jafet, 'ay pax yunnal x'alji, smasnil eb' yin̈tl Heber, ata cotnc yin̈tl eb' 'a Sem.

²² Eb' yunnal Sem, atn Elam, Asur, Arfaxad, Lud yet' Aram.

²³ Eb' yunnal Aram, atn Uz, Hul, Geter, yet' Mas.

²⁴ A Arfaxad, atn smam Sala, ax Sala atn smam Heber.

²⁵ A Heber 'ay chawn̈ yunnal, Peleg sb'i jun winac. A 'a yol stiempoal win tic, ata 'ix pucx can 'at eb' 'anma 'a sat lum lum tic. Ax junx yu'tac cha, tzcuch Joctán.

²⁶ A Joctán cha, smam Almodad, Selef, Hazar-mavet, Jera,

²⁷ Adoram, Uzal, Dicla,

²⁸ Obal, Abimael, Seba,

²⁹ Ofir, Havila, yet' Jobab. Smasnil eb' tic yunnal win Joctán eb'.

³⁰ 'Ix can cajn eb' 'a lum lum tzcot 'a Mesa, masnto tzc'och lum 'a Sefar, atn 'a eb' lum jolmctac witz 'a stojlal 'aj tzq'uel c'u.

³¹ Atn eb' tic yunnal Sem, junjn c'aj eb' yet' yin̈til, junjn c'aj eb' yet' slu'um, junjn c'aj eb' yet' sti'.

³² Smasnil jun tzo'n̈ 'anma tic, yin̈tl eb' yunnal win Noé, junjn c'aj eb' yet' yin̈til. A yic xlajw can 'ec' jun owl yaxn̈ab' cha, 'ix sactzic can eb', 'ix 'och eb' chon̈b'al 'a yolyib'n̈q'uinl tic.