Gn 1 - Chuj San Sebastian Bible

'Ix 'el yich sb'o smasnil tas

¹ A 'a yic x'el yich sb'o smasnil, 'ix sb'o Dios satcha'an̈ yet' lum lu'um.

² A yic jun tiempoal cha, may stzol-l yaj lum lum tic sb'o'i, sictac yilxi, mayn 'ec' a 'a yib'n̈ lu'um, q'uic'q'uinl yilx smasnil. Ax Yespíritu Dios, a tz'ec' 'a yib'n̈ smasnil a a cha.

³ 'Ix yaln Dios 'ixtic: 'Ay cab' sacq'uinal, xchi. Yuj cha, 'ix jaw sacq'uinal.

⁴ Ax xyiln Dios to wach' sacq'uinl cha. 'Ix spojn 'el sacq'uinl chi 'a scal q'uic'q'uinal.

⁵ A sacq'uinl cha, xya'n Dios sb'ic c'ual, ax q'uic'q'uinal, xya'n sb'ic 'ac'wal. X'ec' jun 'ac'wal, yet' jun c'u, 'ixta x'aj yec' b'ab'l c'u.

⁶ Xlajw cha, xyaln pax Dios 'ixtic: 'Ay cab' junc tas jen̈n 'ec' 'a yolyib'n̈q'uinl tic, sec tzpoj sb'a a a yu'uj, xchi.

⁷ Yuj spaxti xyal cha 'ix b'o jun spojmb'il snan̈l a a cha, chamacn̈ x'ajcn 'el a', jun macn̈ a xcan 'a yaln̈ jun jen̈n 'ec' cha, junx macn̈ a xcan 'a yib'an̈. 'Ixta x'aji.

⁸ A jun tas jen̈n 'ec' 'a yib'n̈ yolyib'n̈q'uinl tic, satchan̈ sb'i yuj Dios. X'ec' junx 'ac'wal, yet' junx c'u, 'ixta x'aj yec' schab'l c'u.

⁹ Xlajw cha, 'ix yaln pax Dios 'ixtic: Syam cab' sb'a a a 'ay 'a yaln̈ satcha'an̈, sec junxn̈ej tz'ajcn a', yic tzcheclj can chan̈ lum lum taquin̈, xchi. 'Ixta x'aji.

¹⁰ Ax 'aj xcheclj can chan̈ jun tacn̈ cha, 'ix ya'n Dios sb'ic lu'um, ax a a 'ix syamcn sb'a cha, 'ix ya'n sb'ic mar. 'Ix yiln Dios to caw wach' x'aji.

¹¹ Xlajw cha, xyaln Dios 'ixtic: Pa' cab' smasnil junjn c'aj te te 'a sat lum lum tic: te 'itj tzyac' yin̈til, yet' te te tzyac' sat, a tzyal yin̈tl te', xchi. 'Ixta x'aji.

¹² 'Ix pac' smasnil junjn c'aj te 'a sat lum lum tic, smasnil te c'ultac, te 'itaj, yet' te te tzyac' sat, a tzyal yin̈til. 'Ix yiln Dios to caw wach' x'aj 'el'chi.

¹³ 'Ix 'ec' junx 'ac'wal, yet' junx c'u, 'ixta x'aj yec' yoxl c'u.

^14-15 Xyaln pax Dios 'ixtic: 'Ay cab' junc tz'a'n sacq'uinl 'a satcha'an̈, yic tzictajn 'emt sat lum lum tic, yuj spojn snan̈l c'ual, yet' 'ac'wal, yuj sch'oxn pax junjn c'u, yet' ab'il, yet' junjn tiempoal, xchi. 'Ixta x'aji.

¹⁶ Yuj spaxti xyal cha xb'o chab' niwc luz: a jun caw ow sc'aq'uil, tz'och yopiso 'a c'ual, ax jun jab' wal sacq'uinlal, tz'och yopiso 'a 'ac'wal. Xb'o pax smasnil c'anal.

¹⁷ 'Ix ya'n 'och Dios jun tzo'n̈ chi 'a satcha'an̈, yic tzya'n 'emt sacq'uinl 'a sat lum lum tic

¹⁸ 'a c'ual yet' 'a 'ac'wal, yic tzpojn pax snan̈l sacq'uinal yet' q'uic'q'uinal. 'Ix yiln Dios to caw wach' x'aj 'el'chi.

¹⁹ X'ec' junx 'ac'wal, yet' junx c'u, 'ixta x'aj yec' schan̈l c'u.

²⁰ Xyaln pax Dios 'ixtic: Yune'oc cab' sb'a smasnil no noc' 'a yoltc a a', yet' smasnil no ch'ic tz'ec' jen̈n̈oc 'a yib'n̈ lum lum tic, xchi. 'Ixta x'aji.

²¹ Yuj spaxti xyal cha, xb'o no niwc noc' 'ay 'a yojl a mar, yet' smasnil junjn c'aj no noc' 'ay 'a yoltc a a cha, yet' smasnil junjn c'aj no ch'ic. Caw wach' 'ix yil Dios.

²² 'Ix ya'n syaxilal 'a yib'n̈ smasnil no noc' cha, 'ix yaln 'ixtic: 'Unewoc cab' e no', b'ut'j cab' 'el yojl a mar yuj e no', 'ixta pax no ch'ic, b'ut'j cab' 'el yolyib'n̈q'uinl yuj e no', xchi.

²³ 'Ix 'ec' junx 'ac'wal, yet' junx c'u, 'ixta x'aj yec' yol c'ual.

²⁴ Xlajw cha, 'ix yaln pax Dios 'ixtic: Yune'oc cab' sb'a junjn c'aj no noc' 'a sat lum tic, no cajb'en noc', no calte'al noc', yet' pax no tzjuc sb'a 'a sat lu'um, xchi. 'Ixta x'aji.

²⁵ Yuj spaxti xyal cha 'ix b'o smasnil junjn c'aj no cajb'en noc', e no 'ay 'a sat lum lum tic, a tzyal yin̈tl e no', yet' junjn c'aj no tzjuc sb'a a sat lu'um. Caw wach' 'ix yil Dios.

²⁶ Xyaln pax Dios 'ixtic: A ticnec qui b'oc 'anma 'icha on̈c tic, sec wach' a tzyac' yajlil 'a yib'n̈ no chay 'ay 'a yojl a mar, 'a yib'n̈ smasnil no ch'ic, 'a yib'n̈ no cajb'en noc', 'a yib'n̈ no calte'al noc', yet' 'a yib'n̈ no tzjuc sb'a 'a sat lum lum tic, xchi.

²⁷ Xlajw cha, sb'on Dios 'anma', 'icha wal Dios cha, 'ixta xyutej, sb'o win winac, yet' 'ix 'ix.

²⁸ Xya'n Dios syaxilal 'a yib'n̈ eb', xyaln 'a eb' 'ixtic: 'Alj cab' eyunnal, q'uib' cab' e b'isul, b'ut'j cab' 'el sat lum lum tic eyu'uj. 'Oj eyac' yajlil 'a yolyib'n̈q'uinl tic, 'a yib'n̈ no chay 'ay 'a yojl a mar, 'a yib'n̈ no ch'ic tz'ec' jen̈n̈oc, yet' 'a yib'n̈ smasnil no noc' tz'ec' 'a sat lum tic, xchi.

²⁹ 'Ix yaln pax 'a eb' chawn̈ chi 'ixtic: An tzwac' junjn c'aj te te tic 'ayex, te 'itj 'ay yin̈til, yet' smasnil te te tzyac' sat. A te tze lo'o, yic tz'ec' tiempo eyu'uj.

³⁰ Smasnil no cajb'en noc', no calte'al noc', no tzjuc sb'a 'a sat lu'um, yet' no ch'ic, an tzwac' te c'ultc tzlo no' yet' te te' 'ay sat, xchi. 'Ixta x'aji.

³¹ Xyiln 'och Dios smasnil tas 'ix b'o'i, to caw wach' smasnil. 'Ix 'ec' junx 'ac'wal yet' junx c'u, 'ixta x'aj yec' swacl c'ual.