Gl 4 - Chuj San Sebastian Bible

¹ Tzin nib'j tzwalb't junx tic 'ayex. Q'uinloc 'ay junc 'unn ticnec, 'oj yico'oc can jantcn̈ej tas 'ay 'a smam. Wach'xam 'oj yico'oc can smasnil, palta a 'a yic yune to, caw lajn yaj 'icha junc moso man̈ yico'oc sb'a,

² yujto 'ay mach tz'a'n cuenta. 'Ac'b'ilt mandar masnto tzjaw jun c'ual tzyaln smam, to mun tzyique'ej sb'a.

³ An̈jtona', 'ixta on̈ec. A 'a yic yalan̈, 'icha to 'unn on̈ec, yujto on̈ 'ajxec mandar yuj jun b'eyb'al yic yolyib'n̈q'uinl tic.

⁴ Palta a yic xc'och stiempoal, ya'n cot Dios Yunnal, wul 'aljnac 'el 'a jun 'ix 'icha tzon̈ 'aj calj an̈ 'anman̈ec tic. Wul ya'jnac 'och sb'a israelal. 'Ajxnac mandar yuj jun ley yic Moisés.

⁵ 'Ixta 'ajnc swulq'ui, yic on̈ wul scolnec 'el 'a yol sc'ab' jun ley cha, sec tzon̈ yijec 'och Dios yunnaloc.

⁶ A Dios, ya'jnac cot Yespíritu Yunnal 'a qui pixn junjn on̈ec, sec chequel, to yunnaln̈ec xo. Ax Yespíritu cha, a yic tz'awji: Mamin, Mamin, xchi.

⁷ Yuj cha, man̈xtoc 'ayn̈ec 'och mosoal ticnec, yujto yunnaln̈ec xo Dios. Yuj Cristo, ax ya'n jun yic 'ayon̈, yujto yunnaln̈ec xo.

Cusnc Pablo yuj eb' creyente

⁸ A 'a yic yalan̈, mant eyojcoc Dios. Eya'jnac servil jun tzo'n̈ cob' eyaljnac e diosaloc, palta man̈ diosoc eb'.

⁹ Al ticnec eyojc xo Dios. Yel xo wach' tzcala, a Dios tox ex 'ojcan 'eli. Yuj cha, ¿tas yuj tzex meltzj pax 'a jun tzo'n̈ b'eyb'al caw may yel'chi? ¿Tas yuj tze nib'j tzeya'x servil jun tzo'n̈ cha?

¹⁰ 'In 'ay jun tzo'n̈ c'u caw niwn yel'ch 'ayex, yet' 'a yic tz'ec' junjn 'uj. 'Ay pax yel'ch jun tzo'n̈ tiempoal 'ayex, yet' jun tzo'n̈ ab'il.

¹¹ Caw tzin xiwi, toq'ue nab'an̈ej 'ec' munljnacn 'a e cal ta'.

¹² Ex wu'tac, ex wanab', tzin tew 'at 'ayex, caw lajn tzeyutj e nab'en wet'oc. Yujto an tic, lajn wutjnac in nab'en eyet'oc, yic mantzac eya'ch jun ley chi yipc e c'ojol. A yic wec' 'ayx ta', wach'n̈j eyutjnac e b'a 'ayin.

¹³ Eyojtac, a yic in b'ab'l 'ec' 'ayx ta', yuj wal jun yab'il 'ochnc 'ayin, waln 'el wach' 'ab'x 'a e cal.

¹⁴ 'Ac'b'ilx prowal yuj jun in yailal cha, palta ma'in e patquilj can 'el yu'uj. May tas eyal paxi, to may wel'ch 'a e sat. 'Icha tzcutj qui chan junc yángel Dios tzjawi, 'ixta eyutjnacn in e chani. 'Icha Jesucristo, 'ixta in 'a e sat in c'ochi.

¹⁵ Palta ¿tasm x'aj jun e tzaljc'ojlal chi ticnec? Wal yel tzwalb't 'ayex, caw niwn e tzaljc'ojlal wet' ta'. Wach'xam yol e sat, lista eyaj eyi'n 'el ta, yic tzeya'n 'ayin.

¹⁶ Al ticnec, ¿tom tzin 'och 'ajc'ojlal 'ayex, yujto tzwalb't jun tzo'n̈ tas caw yel 'ayex?

¹⁷ 'Ay eb' caw tzex cob' chamc'ojlanoc, palta man̈oc 'a swach'il. Yujto ton̈j tznib'j eb' tzeyij 'el e nab'en 'ayn̈ on̈, ax eya'n 'och e nab'en 'a eb'.

¹⁸ Wach' toni, toto 'ay mach 'aj tzca'c 'och qui nab'en, palta toto 'a swach'il. Comnoc 'ixta tzeyutj e b'a 'ayn 'a smasnil tiempo, man̈ cojnoc 'a yic 'ayn 'ec' eyet' ta'.

¹⁹ Ax xo, 'icha to caw wunnal ex. Caw niwn tzwab' syal eyu'uj, 'icha junc 'ix caw tzyab' syail, yic tz'alj yune'. An̈ja 'ixta 'oj wab' syal eyu'uj, masnto 'oj wach' lajnb'oc e nab'en yet' Cristo.

²⁰ Octom wal 'ayn 'ec' eyet' ta ticnec, sec man̈ 'ichc tic tzwutj waln 'ayex, yujto caw tzin 'och 'il eyu'uj.

A 'ix Agar yet' 'ix Sara

²¹ 'Ay ex, a jun ley yic Moisés tze nib'j tzex 'a'n mandar. Palta ¿tom matz e na coti, tas tzyal 'a jun ley cha?

²² Yujto a tzaln yuj Abraham, chajtlto 'ay chawn̈ yunnal. 'Ay jun 'aljnac 'a jun 'ix 'aych ya'malc servil, Agar sb'i 'ix. 'Ay pax jun 'aljnac 'a yistzil Abraham cha, Isaac sb'i winac. A yistzil Abraham cha, mun yic sb'a yet'oc, may junc xo mach ya'jnac servil.

²³ A jun 'aljnac 'a jun 'ix 'aych ya'malc servil cha, ton̈j 'aljnac, 'icha tz'aj yalj junjn 'anma'. Palta ax junx 'aljnac 'a jun mun yic sb'a yet' yichmil cha, yuj spoder Dios yalji, yujto ya'jnac Dios sti yu'uj.

²⁴ A jun yab'xil eb' tic, ch'oxnb'il yaji. A chawn̈ 'ix tic, tzyal 'el'chi, atn chab' strato Dios. A 'ix Agar, tzyal 'el'chi, atn jun trato chab'il 'a lum witz Sinaí. A eb' yic xo jun trato cha, 'icha to yune 'ix Agar eb', yujto 'aych eb' ya'malc servil 'icha 'e'nc 'ix.

²⁵ A 'ix Agar cha, tzyal 'el'chi, atn lum witz Sinaí 'ay 'a yol yic Arabia. A ticnec, a Jerusalén 'icha to yicto witz Sinaí, yujto a eb' 'ay 'a jun chon̈b' cha, caw 'aych eb' ya'malc servil ley.

²⁶ Palta ax junx Jerusalén 'ay 'a satcha'an̈, a 'ayn̈ec yico'. Yuj cha, mun quiquec qui b'a, matz on̈ 'ajxec mandar yuj jun ley cha.

²⁷ A 'a Ch'an̈ U'un̈, ata tzyal Dios 'ixtc yuj chon̈b' Jerusalén: Ach 'ix, wach'xam toxn may one', palta tzaljan̈. Man̈ ojcoc xon syal tz'aj yalj 'unin, palta q'ue cab' 'aw a tzalji. Yujto a junc 'ix 'ix 'actb'il can yuj yichmil, yel xo niwn yune 'oj 'aljoc 'a yib'n̈ 'ix tz'i'n yichmil 'ix cha, xchi 'a Ch'an̈.

²⁸ Ex wu'tac, ex wanab', lajn on̈c 'icha Isaac. Yujto ya'jnac can Dios sti', on̈ 'ochc yunnaloc.

²⁹ Palta a 'a pecti cha, a win ton̈j 'aljnac, 'icha tz'aj yalj junjn 'anma', ya'jnac 'och yailal 'a yib'n̈ jun 'aljnac yuj spoder Yespíritu Dios. 'Icha yutjnac sb'a win cha, 'ixta tzon̈ yutjec eb' tz'ajx mandar yuj ley ticnec.

³⁰ Palta tzyal 'ixtc 'a Ch'an̈ U'un̈: A jun 'ix 'aych 'a'j servil yet' yune', pechx cab' 'eli. Yujto a jun yune 'ix cha, may xon jac yaln yic yet' yune jun 'ix mun yic sb'a yet' yichmil. Toxn may xon jac tas 'oj 'ajx can 'a 'a, xchi 'a Ch'an̈.

³¹ Yuj cha, ex wu'tac, ex wanab', man̈ on̈ lajnoc 'icha jun yune 'ix 'aych 'a'j servil cha. Palta lajn on̈c 'icha jun yune 'ix mun yic sb'a yet' yichmil cha.