Gl 1 - Chuj San Sebastian Bible

Tz'el yich scarta Pablo

¹ An Pablo in tic, schecb' in Jesucristo. Man̈oc junc 'anma 'ayn schecab'. An̈jtona', man̈oc junc 'anma 'a'jnac wopiso tic. Atn Jesucristo 'a'jnac wopiso yet' qui Mam Dios. A 'a'jnac pitzwc pax Jesucristo 'a scal eb' chamnac.

² A eb' creyente 'ayc' wet' 'a tic, tzya't eb' stzatzl e c'ojl ex 'ayx 'ec' 'a junjn iglesia 'a yol yic Galacia.

³ Tzin nib'ej, a qui Mam Dios yet' Cajlil Jesucristo, tzyac' swach'c'ojlal yet' sjunc'ojlal 'ayx ta'.

⁴ A Jesucristo wul ya'jnac cham sb'a, yic tzyi'n 'el qui mulec. 'Ixta 'on̈ yutjec on̈ scolnec 'el 'a yol sc'ab' maysch'olnil 'a yolyib'n̈q'uinl tic, yujto 'ixta x'el 'a sc'ojl Dios, atn qui Mamec.

⁵ Yuj cha, calc wach' paxti 'a Dios 'a smasnil tiempo. B'o cab' 'ixta'.

May junc xo wach' 'ab'x yic colnb'il

⁶ A Dios 'awtjnacn̈ec yuj swach'c'ojlal Cristo. Palta caw tzsat in c'ojl eyu'uj, yujto wan laj eyactn can Dios muc'uc. Ax ticnec, wan cob' eya'nc 'och e nab'en 'a junx chuc 'ab'xil yic colnb'il tzalx 'ayex.

⁷ Palta may junc xo 'ab'x yic colnb'il yel. 'Ay eb' tznib'j ton tzjeln 'el yab'xil Cristo, palta ton̈j tzwach' somchj 'el e nab'en yuj eb'.

⁸ Palta tox x'ec' calcn 'el wach' 'ab'x yic colnb'il 'ayx on̈. A ticnec, toto 'ay junc mach tz'ec' alnc 'el junc xo chuc cuynb'il 'ayex, wach'xam an tic, mto junc ángel tzcot 'a satchan̈ wul yala', 'ay cab' yowl sc'ojl Dios 'a yib'an̈.

⁹ 'Icha wutjnac waln 'ayx 'a jun 'el, 'ixta tzwutj waln 'at 'ayx ticnec. Toto 'ay junc mach tz'ec' alnc 'el junc xo cuynb'il man̈ lajnoc yet' jun e chajnac, 'ay cab' yowl sc'ojl Dios 'a yib'an̈.

¹⁰ A yic tzwaln 'at jun tzo'n̈ tic 'ayex, ¿tom tzin nib'j tzalj junc 'anma wet' e nani? Ma'ay, cojxn Dios tzin nib'j tzalj wet'oc. Matz in na jab'oc, toto tzalj junc 'anma wet'oc. Q'uinloc ton̈j tzin nib'j tzalj eb' wet'oc, to 'ixta', man̈ in ya'malc servil Cristo.

'Ochnc Pablo schecb'oc Cristo

¹¹ Ex wu'tac, ex wanab', tzin nib'j tzeyojquej 'el junx 'oj wal tic. A jun wach' 'ab'x tz'ec' wala', man̈ yico'oc 'anma'.

¹² Man̈oc 'a junc 'anma chab'il jun 'ab'x tic wu'uj. Man̈oc 'a junc 'anma cuyb'il wu'uj, yujto cojn Jesucristo 'a'jnac wojcoc 'eli.

¹³ Eyab'jnac xo, chajtl wutjnac in b'a 'a yic yalan̈, yic wa'n 'och in nab'en 'a scuynb'il eb' wit israelal. Caw niwn yailal 'ec' wa'jnac 'och 'a yib'n̈ yiglesia Dios. Wa'ljnac in satn 'el eb' smasnil.

¹⁴ A 'a scuynb'il eb' wit chon̈ab', yel xo wal jeln in 'a yib'n̈ eb' lajn sq'uinl wet'oc. Yujto yel xo wal wa'jnac 'och in nab'en 'a sb'eyb'al eb' qui mam quichm on̈.

¹⁵ Palta yictax mantzac in 'alji, sic'b'iln xon 'el yuj Dios. Yuj wal swach'c'ojlal, yawtjnacn 'och yico'oc. Ax yic 'ix jaw stiempoal 'icha tznib'ej,

¹⁶ 'ix ya'n wojcoc 'el Yunnal, sec wach' tz'ec' wal-l yab'xil colnb'il 'a e cal ax man̈ ex israeloc. A 'a yic xlajw in chan Cristo, may junc 'anma cuyjnac in.

¹⁷ Ma'in xit' in c'umc eb' b'ab'l 'ochnc schecb'oc Cristo 'a Jerusalén. Palta ton̈j 'atnc in mu'c 'a lugar Arabia. Lajw cha, we'x 'a Damasco.

¹⁸ Ma'in 'at mu'c 'a Jerusalén, masnto 'a yoxl ab'il, in 'ati. Ata paxtinnacn yet' Pedro. Cojn olajn̈e c'u 'ochnc in wan yet'oc.

¹⁹ Man̈x 'a junc xo eb' schecb' Cristo paxtinnacn yet'oc, cojn Jacobo, atn jun yu'tac Cajlil.

²⁰ A 'a sat Dios tzwaln 'at 'ayex, caw yel jun tzwal tic.

²¹ Xlajw wec' 'a Jerusalén, wec' pax 'a yol yic Siria yet' 'a Cilicia.

²² Ax eb' 'anma 'a jun tzo'n̈ yiglesia Cristo 'a yol yic Judea, mant in yojcoc eb' ta'.

²³ Ton̈j nant yab'jnac eb' wab'xil, yujto 'ay eb' aljnac 'ixtic: 'Ay jun 'a'jnac 'och yailal 'a quib'n̈ec 'a yic yalan̈, yujto snib'jnac ma'ix ca'c 'och qui c'ojl 'a Cristo. Ax ticnec, a tz'ec' alnc 'el yab'xil Cristo, xchi eb' wu'uj.

²⁴ Yuj cha, laj yalnc eb' wach' paxti 'a Dios wu'uj.