Ez 9 - Chuj San Sebastian Bible

Chaml 'a eb' tzb'on maysch'olnil

¹ Xlajw cha, 'ix jaw jun 'aw 'a in chiquin, 'ix yaln 'ayn 'ixtic: Cot cab' eb' tz'a'n lajwc 'el jun chon̈b' tic, yamb'ilx syamc'ab' eb' yu'uj, yic tzmilwj eb', xchi.

² 'Ix wilni, 'ay wacwn̈ winc x'oxt 'a yol sti spuertail chon̈b' 'a stojlal norte, yet' eb' syamc'ab' tzyac' milwjoc. Ax 'a scal eb' cha, ata 'aych jun winc nab'a lino spichul, t'un̈n 'och stz'ib'lab' 'a snan̈al. 'Ix 'oxt eb', axta x'aj lin̈n eb' 'a stz'ey yet'l xajmb'al nab'a bronce.

³ Ax stzictznil qui Diosalec an̈ israel on̈c tic, 'ix q'ue wan 'a yib'n̈ 'aj 'ayc' yechl eb' querubín, axta 'ix 'och wan 'a yib'n̈ sjolm spuertail yatut Dios. 'Ix yawtn Jehová win lino spichl cha, atn win t'un̈n 'och stz'ib'lab' chi 'a snan̈al,

⁴ 'ix yaln 'ixtc 'a winac: 'Ixc 'a yol chon̈b' Jerusalén tic, tza'n can 'och yechl eb' 'anma 'a snan̈l sat, eb' to tzcus yuj smul x'och 'a scal eb' 'anma cha, xchi 'a winac.

^5-6 Xlajw cha, xyaln pax 'ixtc 'a jun tzo'n̈ xo ewin cha: 'Ochn̈ec tza'n yuj win tic. Tzex 'at 'a yol chon̈b' tic, tze miln can eb' 'ichmtac winac, eb' quelmtac, eb' 'ix cob'stac, eb' 'ix 'ix yet' eb' 'unin. Man̈ 'o'ch e c'ojl 'a eb'. Palta ax eb' 'aych yechl wu'uj, man̈ e mil cham eb' cha. Tze chaj 'el yich e miln eb' 'ay 'a in cajnub' tic, xchi. 'Ix 'el yich smilx eb' 'ichmtac winc chi 'a sti 'elt yatut Dios.

⁷ Xlajw cha, xyaln pax 'a eb' 'ixtic: 'At 'a'c juwc can 'el jun watut cha, ax 'a yamq'uil cha, ata tze tuscn 'och eb' chamnc 'anma chi ta', xchi. Xlajw cha, 'ix 'el paxt eb', syamn 'och eb' smiln eb' 'anma chi 'a yol chon̈b' cha.

⁸ A yic wan smilwj eb' cha, ax xwilni in ch'ocxoj lin̈n in can 'a yojltac Jehová, yuj cha, in 'em n̈ojnjoc 'a sat lu'um, 'ix 'el waw, xwaln 'ixtic: Mamin Jehová, ¿tom 'oj a wach' satc 'el jaywn̈ xo eb' wit israelal tic yuj yowl a c'ojl 'a yib'n̈ Jerusalén tic? xin chi 'a 'a.

⁹ 'Ix yaln 'ixtc 'ayin: A eb' israel yet' eb' 'aj Judá, yel xo wal niwn smul eb' 'a in sat, caw wal tzniwtj scham eb' 'anma 'a jun tzo'n̈ chon̈b' tic yuj jantcn̈ej maysch'olnil, yujto a snan eb' 'anma tic, to an Jehová in tic, matz wil tas tzb'o eb'.

¹⁰ 'Ixta wal 'oj wutc eb', man̈x 'a in niwnc'ojlal 'a yib'n̈ eb' 'anma tic yuj stu b'eyb'al. Yuj smul eb' cha, ax sjaw wal yailal 'a yib'n̈ eb', xchi.

¹¹ Xlajw cha, xjapx win lino spichl cha, win t'un̈n 'och stz'ib'lab' chi 'a snan̈al, 'ix yaln win 'ixtic: A ticnec, 'ix b'o 'icha wal tas xac' in b'o', xchi winac.