Ez 7 - Chuj San Sebastian Bible

La'n xo yaj slajb' c'ual

¹ 'Ix yaln pax Jehová 'ayn 'ixtic:

² Ach 'anma', an Jehová in, Yajl in, an tzwal 'ixtc 'a yib'n̈ chon̈b' Israel: A ticnec, wal sc'och sc'ul slajw 'el yolyib'n̈q'uinl tic, wal satl lum lum tic.

³ Ax israel ex tic, xc'och sc'ul e lajw 'eli, wal scot yowl in c'ojl 'a eyib'n̈ tic. 'Oj ex in b'eyc'ojloc yuj tas maysch'olnil tzlaj e b'o'. 'Oj wa'ch eyailal yuj e b'eyb'al yajb'entac.

⁴ Man̈x 'a in niwnc'ojlal 'a eyib'an̈. 'Oj wa'ch eyailal yuj e b'eyb'al maysch'olnil, yujto yajb'entac tas tzlaj e b'o'. 'Ixta to b'i'an, ax in eyojcan 'eli to an Jehová in tic to cojn in ton Dios in.

^5-6 An Jehová Yajl in, an tzwal 'ixtic: 'Ay wal jun maysch'olnil tzjaw 'a eyib'an̈. Xc'och sc'ul e chami, tic wal tzjaw eyailal.

⁷ Xc'och sc'ul e lajw 'el ax cajn ex 'a jun nacion̈ tic, caw jab'xoj sjaw sc'ul e chan e b'a yet' somc'ojlal. Man̈x 'a tzaljc'ojlal 'a lum jolmctac witz 'aj cajn ex.

⁸ A ticnec b'i'an, wal wa'n cot yowl in c'ojl 'a eyib'n̈ ax israel ex tic. 'Oj wac' 'el'choc yowl in c'ojl 'a eyib'n̈ 'icha tas tzin na'a. 'Oj ex in b'eyc'ojloc yuj tas maysch'olnil tzlaj e b'o', ax wa'n eyailal yuj e b'eyb'al yajb'entac.

⁹ Man̈x 'a in niwnc'ojlal 'a eyib'an̈. 'Oj wa'ch eyailal yuj e b'eyb'al maysch'olnil, yujto yajb'entac tas tzlaj e b'o'. 'Ixta to b'i'an, ax in eyojcan 'eli, to an Jehová in, an tzwa'ch eyailal.

¹⁰ A ticnec xc'och sc'ul slajw 'el e chon̈b' cha. A maysch'olnil a 'oj yac' yajlil 'a 'a, yujto tzyij chan̈ sb'a eb' 'anma cha.

¹¹ A maysch'olnil, caw wal xniwtj cha'an̈. Palta a eb' tzb'on maysch'olnil cha, man̈x 'a xon junc eb' 'oj canoc, man̈x 'a junc mach 'oj b'inaxc yuj tas 'ay 'a 'a.

¹² 'Ix jaw stiempoal, 'ix c'och sc'ual yic man̈x 'a stzaljc'ojlal eb' manm lu'um, yet' pax eb' tzchon̈wj cha, man̈xtzac cus eb', yujto an tzwac' syailal smasnil eb' 'anma'.

¹³ A mach tzchon̈l jac smacl cha, man̈x b'a'n̈ 'oj yi'x can 'eq'ui, yujto lajn 'oj cham win tzmanwj chi yet' win tzchon̈wj cha. May mach 'oj stac' yi'n 'ec' yowl in c'ojl 'a yib'n̈ eb' 'anma cha. A eb' maysch'olnil sb'eyb'al, may junc eb' 'oj stac' scoln sb'a.

¹⁴ 'Oj cob' 'utz'xoc q'uen trompeta yic tzya'n lista sb'a eb' winc s'at 'a owal, palta may junc mach 'oj ste'wtzoc sb'a s'at 'a owl cha, yujto an tzwa'ch syailal eb' 'anma chi smasnil yuj yowl in c'ojol.

¹⁵ A 'a sti 'el chon̈ab', owl 'ay ta', ax 'a yol chon̈ab', ata 'ay yab'il yet' wejel. A eb' 'anma 'aycn 'el 'a sti 'el chon̈ab', 'oj cham eb' yuj owal, ax eb' 'aycn 'a yol chon̈ab', a wejel yet' yab'il 'oj milnc eb'.

¹⁶ A eb' 'oj yac' ganar s'atcn 'elc 'a lum jolmctac witz 'icha no 'uch, 'oj c'acwc eb' yab'n syal yuj smul cha.

¹⁷ 'Oj 'el yip sc'ab' eb' smasnil, 'oj 'ib'xoc chan̈ yoc eb' yuj xiwlal,

¹⁸ ax ya'n 'och eb' sn̈achtac pichl yuj scusc'ojlal cha. 'Oj 'ib'xoc chan̈ sniwnal eb' yuj xiwlal, 'oj schacb' 'el sat eb' yuj q'uixwelal, ax sjoxn 'el eb' xil sjolm smasnil.

¹⁹ 'Oj sjul-l eb' q'uen plata mto q'uen oro 'a yol caye, man̈x 'a yel'ch 'oj yutc eb'. A q'uen plata cha, mto q'uen oro, ma'oj stac' scoln 'el q'uen junc mach 'a yol sc'ab' yowl in c'ojl an Jehová in. Ma'oj 'ec' swejl eb', ma'oj b'ut'joc pax sc'ojl eb' yuj q'ue'en, yujto a q'uen x'a'n 'ejm eb' 'anma chi 'a maysch'olnil.

²⁰ Yujto 'ay jun tzo'n̈ chi 'ay 'a eb', xlaj sb'an̈n sb'a eb' yet'oc, ax yet' jun tzo'n̈ chi sb'o eb' yechl jun tzo'n̈ comn dios yajb'entac. Yuj cha, 'icha xoj c'alem, 'ixta 'oj wutcan jun tzo'n̈ q'uen chi yil eb'.

²¹ 'Oj cot eb' 'anma yel xo tu 'a chuc chon̈b'al, ax wul sto'nc 'ec' eb' jun tzo'n̈ chi 'a eb'. A yic 'oj yi'noc 'ec' eb' chuc chon̈b'al jun tzo'n̈ chi 'a eb', man̈x 'a yel'ch 'oj yutc eb' jun tzo'n̈ cha.

²² 'Oj wi'l in sat 'a jun nacion̈ tic, ax eb' 'elc'm cha, man̈x 'a yel'ch 'oj yutc can eb' jun lugar to wicn̈ej yaji.

²³ 'Ac' b'o jaye'oc q'uen cadena, yujto a 'a jun nacion̈ tic, til wal eb' ma'm cham 'anma 'oj jalxoc yet' q'ue'en. Caw wal b'ut'jnac 'el jun chon̈b' tic yuj maysch'olnil.

²⁴ Yuj cha, 'oj wi' cot eb' 'anma yel xo maysch'olnil 'a jun tzo'n̈ xo nacion̈, ax yica'an eb' jun tzo'n̈ tas 'ay 'a jun nacion̈ tic. 'Ixta 'oj 'aj wi'n 'ejm eb' tzb'an̈ sb'a yet' tas 'ay 'a 'a; man̈x 'a yel'ch 'oj 'ajcn jun tzo'n̈ 'aj tzyal sb'a eb' cha.

²⁵ A yic 'oj jawc jun xiwc'ojlal chi 'a yib'n̈ eb', 'oj cob' sayc' eb' junc'ojlal, palta ma'oj 'ilchjoc yuj eb'.

²⁶ B'elb'ni sjaw yailal 'a yib'n̈ 'anma'; 'ixta pax sjaw yab'xil xiwc'ojlal. 'Oj cob' sayc' eb' junc win in checb' 'aj tzc'anb'j sb'a, palta ma'oj 'ilchjoc yuj eb'. Man̈x 'a pax eb' ya'mal 'och sti eb' 'anma 'oj 'a'n cuyxoc in checnb'il, man̈x 'a pax eb' 'ichmtac winc 'oj 'a'nc snab'en eb'.

²⁷ A win rey yet' eb' 'aych yajlil yet'oc, 'oj 'och eb' 'a cusc'ojlal, ax eb' 'anma smasnil, 'oj laj 'ib'xoc eb' yuj xiwlal. 'Oj wa'ch syailal eb' yuj smul cha. 'Icha wal xyutj eb' yixtn eb' yit 'anma'il, 'ixta pax 'oj wutc eb'. 'Ixta to b'i'an, ax in yojcan 'el eb', to an ton Jehová in, to cojn in ton Dios in, xchi Dios 'ayin.