Ez 46 - Chuj San Sebastian Bible

A tas yowlal tzb'o win yajal*r* 'a yic 'ay q'uin̈

¹ An Jehová Yajl in, an tzwala: A jun puerta 'ay 'a sti 'amc' 'a yojl 'ochi, jun 'ay 'a stojlal 'aj tzq'uel c'u, macnn̈ej 'a yic 'ay munljel 'a waque c'ual, at 'a yic sc'ul 'iljelal yet' 'a yic tzpac' 'uj, atta tzjacwi.

² A win yajl cha, ata tz'och win 'a jun puerta 'ay 'a sti 'el 'amc' cha. A yic tz'ochcn win 'a sti jun puerta 'ay 'a stojlal 'aj tzq'uel c'u, tz'och wan lin̈n win 'a stz'ey jun smarcoal jun puerta cha. Ya' sb'a cha, ax eb' ya'mal 'och sti eb' 'anma', wan ya'n tz'a eb' no xajmb'al tzyac' winac yet' pax no yic junc'ojlal, axn cha, tz'em n̈ojnjoc win yal sb'a 'ayn 'a yol sti puerta cha, tzlajw cha, tz'elx 'a 'aj tz'och cha. Ax jun puerta cha, tzjacw cani, at 'a caw yem c'ul xo tzmacchj can paxi.

³ A 'a sc'ul 'iljelal yet' 'a yic tzpac' 'uj, yowlal tzwul yac' 'ejm sb'a smasnil 'anma 'ayn an Jehová in 'a sti puerta cha.

⁴ A jun tzo'n̈ xajmb'al 'oj yac' win yajl chi 'ayn 'a sc'ul 'iljelal, atn jun tzo'n̈ tic: Wacwn̈ quelm calnelu yet' jun mam calnelu, e no may spaltail.

⁵ Yowlal tz'ajx pax junc arroba harina ofrendail yet' no mam calnelu cha, ax pax 'a no quelm calnelu jun, yaln̈ej jantc tz'ajx yet' no', nan̈lschan̈l litro aceite tz'ajxi yet' junjn arroba harina.

⁶ Palta ax yic tzpac' 'uj, ata tz'ajx jun quelm wacx xajmb'alil, wacwn̈ quelm calnelu yet' jun mam calnelu, e no may spaltail.

⁷ Tz'ajx jun arroba harina ofrendail yet' no quelm wacx cha, 'ixta tz'ajx yet' no mam calnelu, ax pax yet' e no quelm calnelu cha, yaln̈ej jantc tz'ajxi, nan̈lschan̈l litro aceite yet' junjn arroba harina.

⁸ A yic tz'och win yajl cha, ata tz'och win 'a jun puerta 'a sti 'amc' 'a stojlal 'aj tzq'uel c'u, a paxta tz'elxi.

⁹ A yic tz'och eb' chon̈b' wul yac' 'emmquilal 'ayn an Jehová in tic 'a yic q'uin̈al, 'ixtc 'oj 'aj eb' yochi: A eb' 'anma 'oj 'och 'a jun puerta 'ay 'a stojlal norte, ata 'oj 'elx eb' 'a jun puerta 'ay 'a stojlal sur; ax eb' 'oj 'och 'a jun puerta 'ay 'a stojlal sur cha, ata 'oj 'elx eb' 'a jun puerta 'ay 'a stojlal norte. Matz tac' smeltzj eb' 'a spatic, palta to 'ixtc tz'elx eb' 'a yojltac.

¹⁰ A win yajl cha, yowlal tz'oxt win yet' eb' 'anma cha, ax yic tz'elx eb', yowlal tz'elx win yet' eb'.

¹¹ A 'a junjn q'uin̈, yowlal tz'ajx junjn arroba 'ixm harina ofrendail yet' junjn quelm wacax, yet' junjn mam calnelu, ax pax yet' no quelm calnelu jun, yaln̈ej jantc tz'ajxi. Nan̈lschan̈l litro aceite tz'ajx yet' junjn arroba harina.

¹² A yic tz'el 'a sc'ojl win yajl chi ya'n junc xajmb'al 'ayn an Jehová in, no xajmb'al tz'a'i, mto no xajmb'al yic junc'ojlal, tztac' sjacx jun puerta 'ay 'a stojlal 'aj tzq'uel c'u chi 'a winac, yic tzya'n win xajmb'al 'icha tzyac' 'a sc'ul 'iljelal. A yic tzlajw ya'n win xajmb'al cha, ata tz'el paxt 'a 'aj tz'och cha, tzlajw cha, tzmacx can pax jun puerta cha.

Jun tzo'n̈ ofrenda 'a junjn c'u

¹³ Ax 'a junjn sq'uin̈b'il 'a junjn c'u, yowlal tz'ajx tz'a junjn quelm calnelu xajmb'al-l 'a wojltac an Jehová in, no junjn ab'il sq'uinal, e no may spaltail.

¹⁴ An̈jtona 'a junjn sq'uin̈b'ial, tz'ajx pax tz'a chan̈e'oc libra 'ixm harina ofrendail 'a 'ayin, yet' pax junc litro aceite. A jun aceite cha, ton̈j tzsecx q'ue 'a yib'n̈ 'ixm harina cha. Ley tz'ajcn jun tic 'a smasnil tiempo.

¹⁵ A jun tzo'n̈ xajmb'al cha, yowlal tz'ajx 'a junjn sq'uin̈b'ial.

A tas yowlal tzb'o win yajl*r* yet' slu'um

¹⁶ An Jehová Yajl in, an tzwala: Toto a win yajl cha, tzsiyj win jac smacl lum chi 'a junc yunnal, toto 'ixta', a jun lum cha, tz'ochcn yico'oc eb' yin̈tl jun yunnal cha.

¹⁷ Palta toto a 'a junc schecb' win yajl cha, ata tzsiyj win jac smacl lum cha, tzyique'ej jun checb' chi jaye'oc ab'il, palta ax yic tzjaw jun ab'il yic tz'el junc tas 'a libre, ata tzyique'ej can pax win yajl chi lu'um, ax 'a eb' yunnal 'aj tzya'x cani.

¹⁸ A jun yajl cha, matz tac' sto'n 'ec' slum junc xo mach. A tas yic win yaji, a chi tzya'x can win 'a yunnal sec wach' may junc eb' 'a eb' in chon̈b' to tzcan 'a may slu'um, xchi Dios.

Jun tzo'n̈ scusnual yatut Dios

¹⁹ Xlajw cha, in yi'n 'och jun winc chi 'a yojl 'och sti puerta, 'a 'aj 'ay jun tzo'n̈ cuarto 'a stojlal norte, atn jun tzo'n̈ yic eb' ya'mal 'och sti eb' 'anma 'a Dios. 'Ix sch'oxn jun lugar 'ayin, a jun cha, ata 'ay 'a yich 'och jun cuarto 'a stojlal 'aj tz'em c'u.

²⁰ 'Ix yaln 'ayn 'ixtic: A 'a tic 'oj stz'an̈ eb' ya'mal 'och sti eb' 'anma no xajmb'al tz'ajx yuj ya'n lajwc mul yet' no yic stojl mul; ax sb'oln c'anb'c pax eb' 'ixm sat trigo tz'ajx ofrendail, sec wach' matz 'ijx 'el jun tzo'n̈ chi 'a 'aj 'ay jun 'amc' 'a sti 'eli, yujto 'ay smay syamx jun tzo'n̈ chi yuj eb' comn 'anma', xchi 'ayin.

²¹ In yi'n pax 'elt jun winc chi 'a 'aj 'ay jun 'amc' 'a sti 'elt cha, in ya'n b'eyc'oc 'a chan̈e yisquinyoal jun 'amc' cha, ax 'a junjn yisquinyoal cha, a paxta 'ay junjn cotc 'amac'.

²² A jun tzo'n̈ cotc 'amc' cha, lajnn̈ej yechl 'a schan̈il, junc'l metro spac'b'il, olajn̈e metro sat.

²³ A 'a spatc 'el jun tzo'n̈ 'amc' cha, ata oyn 'och jun muro nab'a q'uenn̈ej, ax 'a yich jun muro cha, ata 'ay yet'l 'aj tz'och c'ac'.

²⁴ Yuj cha, xyaln jun winc chi 'ayn 'ixtic: A eb' 'oj munljoc 'a yatut Dios, a 'a tic 'oj stz'an̈ eb' no xajmb'al 'oj yac' eb' chon̈ab', xchi.