Ez 45 - Chuj San Sebastian Bible

A lum lum yicn̈ej Jehová yaji

¹ A yic 'oj 'och suerte 'a yib'n̈ lum lum cha, yic tzpojx 'ec' lum 'a eb' yin̈tl Israel, yowlal tze pojcn 'el jun c'ajoc lum wico'oc an Jehová in. A jun lum cha, nan̈lyoxlajn̈il kilómetro yoc lu'um, lajn̈e kilómetro pax sat; wic tz'ajcn jun cha.

² A 'a jun lum cha, ata tz'echtax can 'elt slumal watut, 250 metro tz'aj 'a jun jun spac'b'il. Ax 'a junjn spac'b'il cha, tzcan jun 25 metro sat coln tz'ajcni, tz'och oyn 'a spac'b'il chi schan̈il.

³ A 'a jun lum tzpojx can 'el wico'oc cha, ata tz'echtax can 'el junc'aj xo lum caw wicn̈ej tz'aji. A jun cha, nan̈lyoxlajn̈il kilómetro yoc, o'e kilómetro sat. Atn 'a jun lum cha, ata 'oj b'o watut to wicn̈ej tz'aji.

⁴ A junc'aj lum lum cha, yicn̈ej eb' ya'mal 'och sti eb' 'anma tz'aj lu'um, atn eb' 'oj 'a'wc servil 'a watut. A 'a jun lum cha, ata 'oj sb'o eb' yatut, yujto yicn̈ej sb'a yet' watut cha.

⁵ An̈jtona', tz'echtax can pax 'elt junc'aj xo lu'um, nan̈lyoxlajn̈il kilómetro yoc, ax o'e kilómetro sat. A jun lum cha, yic jun tzo'n̈ xo eb' levita tzin 'a'n servil 'a watut, ata 'oj sb'o eb' schon̈b' 'aj 'oj 'aj cajan.

⁶ Ax 'a slajub', tz'echtax can pax lum 'aj 'oj b'o schon̈b' eb' yit israelal eb' cha, a lum cha, 'oj can 'a stz'ey lum wicn̈ej yaj cha. Nan̈lyolajn̈il kilómetro yoc, nan̈lyoxl kilómetro sat, yicn̈ej eb' israel jun lum cha.

A jun c'aj lum yic win yajal

^7-8 A 'a spac'b'il lum wicn̈ej cha yet' lum yic eb' israel cha, ata 'ay chac'aj lum lum yic win syajlil chon̈b' chi 'oj 'ajoc. Junc'aj lum tzcan 'a stojlal 'aj tz'em c'u tzc'och 'a sti a Mar Mediterráneo, junc'aj xo lum 'a stojlal 'aj tzq'uel c'u tzjaw 'a sti a Jordán. A jun lum cha lajn yechl yet' yic junjn c'aj eb' yin̈tl israel tzcha'aj. A lum slum win yajl cha, 'oj b'eyn̈j lum 'a eb' yunnal yic wach' man̈x 'oj yi'cc eb' slum eb' yit chon̈ab', sec wach' tzcan junjn 'in̈tal eb' yet' slum 'a tzaljc'ojlal.

Ley 'a win yajal

⁹ An Jehová in, an tzwala: Ex yajl chon̈b' Israel, colb'l xo wal eyixtn eb' 'anma cha. B'ocyaj eb' 'anma 'a swach'il, tojl cab'n̈ej tzeyutj e b'eyc'ojlan eb'. 'Actjec eyi'n 'ec' slum eb' in chon̈ab'.

¹⁰ Tz'acn cab'n̈ej eyechtab' tze c'anlb'ej.

¹¹ A eyechtab' tze c'anlb'ej 'a tas sat yaji, a cab' tzeyac' 'echtanc pax tas yalil yaji. A jun 'echtab' homer sb'i, 'ay chab' ciente litro a tz'em 'a yojol, a tz'a'n pax yechl jun tzo'n̈ xo cotc 'echtab'. 'Ay jun bato sb'i, chab'schawinc litro a tz'em 'a yojol, ax jun efa sb'i, a tz'echtan tas sat yaji, palta lajn yojl yet' jun bato sb'i cha.

¹² 'Ixta pax tz'aj yechtax yal-l jun tzo'n̈ tz'och 'a libra: A junc'l gera, lajn yal-l yet' jun siclo sb'i, ax 60 siclo, lajn pax yal-l yet' jun tzcuch mina.

¹³ An Jehová in, an tzwala. A eyofrenda 'oj eyac'a', 'ixtc 'oj eyutc eya'ni: Wacc'aj tzeyutj eyechtan 'el jun efa 'a e trigo yet' 'a e cebada, ax jun swacc'ajil chi tzeyac' eyofrendaoc.

¹⁴ An̈jtona', 'ixta pax tzeyutj e pojn 'el eyaceite, lajn̈c'aj tzeyutj e pojn 'el junc homer, ax jun slajn̈c'ajil chi tzeyac' eyofrendaoc.

¹⁵ Ax pax 'a e no calnelu, a 'a cha'chb' ciente e no', ata tzeyij can 'el junjnoc no caw b'aq'uech, e no caw yax 'aj tzwa 'a sat lum lum yic chon̈b' Israel. Atn jun stzol-l tic tas tz'aj yijx 'el ofrenda 'a tas tzc'uxxi, no xajmb'al tz'a'i, no yic junc'ojlal yet' no tz'ajx stojloc mul.

¹⁶ Smasnil eb' israel, yowlal tzyac' eb' jun tzo'n̈ ofrenda tic 'a win syajlil eb' cha.

¹⁷ Ax win yajl cha, a win tz'och 'ajcuentail ya'n tz'a no xajmb'al tz'a'i, 'ixm harina, yal uva tz'ajx ofrendail 'a yic tzpac' 'uj, 'a yic sc'ul 'iljelal, 'a yic tzjaw junjn q'uin̈ 'a chon̈b' Israel. A pax win 'oj 'a'nc no xajmb'al yic stojl mul, yet' yofrendail 'ixm trigo, no xajmb'al tz'a'i, yet' no xajmb'al yic junc'ojlal, sec tz'ajx niwnc'ojlal smul eb' israel cha.

¹⁸ An Jehová Yajl in, an tzwal 'ixtic: A 'a b'ab'l c'u yic jun b'ab'l 'uj, yowlal tzeyac' junc no quelm wacx xajmb'alil, junc no may spaltail, yic tzsacb'tzax can watut yuj maysch'olnil b'onc 'a 'a.

¹⁹ Ax win ya'mal 'och sti eb' 'anma 'ayin, tzyij cot win jac schic'l no xajmb'al tz'ajx stojloc mul, tzsucn 'och win jun chic' chi 'a smarcoal yol sti spuertail watut, tzya'n pax 'och win 'a chan̈e schicn yet'l xajmb'al, yet' 'a smarcoal puerta 'a sti 'amc' 'a yojl 'ochi.

²⁰ An̈jtona', 'ixta pax tz'aj sacb'tzax watut 'a yic uque yoch jun 'uj cha, yuj eb' 'anma man̈ sc'anc sc'ojl tz'och smul, eb' matz yil yoch smul.

Quin̈ yic snanb'il cot*r* yel eb' israel 'a libre

²¹ A 'a chan̈lajn̈e yoch b'ab'l 'uj cha, ata tze na uque'oc c'u q'uin̈ yic snanb'il cot eyelt 'a libre, cojn 'ixm pan may yich tze waj 'a uque c'u cha.

²² A 'a jun b'ab'l c'u cha, ata 'oj yac' win yajl chi jun no quelm wacx xajmb'al-l yuj smul yet' pax yuj smul eb' chon̈b' cha.

²³ A 'a yol uque c'u q'uin̈ cha, tz'ajxn̈ej tz'a no xajmb'al 'a wojltac an Jehová in. 'A junjn c'u, tz'ajx tz'a ucwn̈ quelm wacax yet' ucwn̈ no mam calnelu, e no may spaltail. An̈jtona', junjn no mam chiwo tz'ajx xajmb'al-l 'ayn 'a junjn c'u chi yuj stojloc mul.

²⁴ Ax yet' junjn no quelm wacx cha, yet' pax junjn no mam calnelu, yowlal tz'ajx junc arroba 'ixm trigo ofrendail yet' junjn no'; yowlal tz'ajx pax nan̈lschan̈chn̈il litro aceite yet' junjn no'.

Q'uin̈ chinama

²⁵ An̈jtona pax q'uin̈ chinama, uque c'u pax tznax jun q'uin̈ chi 'a schan̈lajn̈il c'u yoch yucl 'uj. A win yajl cha, a win 'oj 'a'noc tz'a no xajmb'al chi 'a junjn c'u, no xajmb'al yic stojl mul, no tz'ajx tz'a smasnil, no yic junc'ojlal, yet' 'ixm trigo yet' yaceiteal, lajnn̈ej sb'isl jun tzo'n̈ chi 'icha yic q'uin̈ yic snanb'il cot eyelt 'a libre.