Ez 43 - Chuj San Sebastian Bible

A stzictznil Dios 'a yatut

¹ Xlajw cha, in yi'n pax 'at jun winc chi 'a jun puerta 'ay 'a stojlal 'aj tzq'uel c'u;

² ax xwilni, 'ix jaw tzicn̈joc stzictznil qui Diosal 'ayin, ata xcot 'a stojlal 'aj tzq'uel c'u, lajn wal sc'an̈ 'icha sc'an̈ a 'elmal a'. Caw wal 'ix sacb'el sat lum yuj stzictznil cha.

³ A jun xwil cha, lajn wal yilx 'icha jun wiljnac yic wul ya'nc Dios lajwc 'el chon̈b' Jerusalén, 'icha pax jun wiljnac 'a sti a niwn a Quebar. Cojn wal yic xwiln cha, in 'em n̈ojnjoc 'a sat lu'um.

⁴ A stzictznil Jehová, ata x'oxt 'a yol sti jun puerta 'ay 'a stojlal 'aj tzq'uel c'u.

⁵ Ax Yespíritu Jehová in 'i'n 'ati, in yi'n 'och 'a 'aj 'ay junx 'amc' 'a yojl 'och cha. Ax xwilni, b'ut'jnacx 'el yol yatut Dios yuj stzictznial.

⁶ Xwiln paxi to lin̈n pax 'ec' jun winc chi 'a in tz'ey, xwab'n yawj 'elt Dios 'a yol yatut cha,

⁷ xyaln 'ayn 'ixtic: Ach 'anma', atn wal jun lugar tic 'aj 'ay in despacho. Atn 'a tic 'oj in can cajn 'a e cal ax israel ex tic 'a jun 'ejmn̈ej. Man̈x b'a'n̈ 'oj spatquilc can 'el eb' et chon̈b' chi in b'i, man̈x 'oj ya'ch eb' smul sb'on chan̈ munamento 'a yib'n̈ yet'l eb' xi'lb'a 'a stz'ey watut, atn 'aj tzmucx eb' sreyl eb'.

⁸ Man̈x 'oj sb'o eb' sreyl israel chi sdespacho chi 'a stz'ey watut, yujto 'a a yic yalan̈, cojn jun muro 'aycn 'a snan̈l watut yet' sdespacho eb'. 'Ixta pax yaj spuertail watut yet' spuertail yic eb' cha. Caw man̈x 'a yel'ch xyutj can eb' in b'i, yujto til wal tas yajb'entac sb'ojnac eb'; yuj wal cha, scot wowl 'a eb', 'ix wa'n cham eb'.

⁹ Ax ticnec, toto tzyactj can eb' jun stenmtacl cha, ax yactn eb' smucn eb' sreyl chi 'a stz'ey watut, toto 'ixta', 'oj waj cajn 'a scal eb' 'a jun 'ejmn̈ej.

¹⁰ Ach 'anma', a ticnec al yab' smasnil eb' israel yuj tas 'ix el tic, ch'ox yil eb' yechl watut yet' tas yaj sb'o'i, sec 'oj yec q'uixwc sb'a eb' yuj smul.

¹¹ Toto 'oj q'uixwc chan̈ eb' yuj tas xlaj sb'o cha, to 'ixta', tza ch'ox yil eb' tas yaj watut sb'o'i, tastc 'ay 'a yojol, chajtl pax yilx smac 'aj tzon̈ 'ochi yet' 'aj tzon̈ 'el paxta, yet' pax jantc yechl 'a smasnil. Tzaln yab' eb' jun tzo'n̈ ley tas tz'aj yoch 'emmquilal 'a watut tic. B'o yechl chi yil eb', tza tz'ib'n pax smasnil jun tzo'n̈ ley cha, sec 'oj stac' syiclni eb'.

¹² Atn sleyl watut tic: Smasnil lum lum oyn 'och 'a spatc 'el lum tzaln to wicn̈ej yaji, jun 'ejmn̈ej to wic yaj lu'um, xchi Dios 'ayin.

A jun yet'l xajmb'al

¹³ A yechl jun yet'l xajmb'al 'ay 'a yatut Dios, 'ix 'echtax yet' jun 'echtab' xc'anx 'a b'ab'el. A 'a spatc 'el cha, ata b'ob'il jun zanja, nan̈l metro xab'l yich, nan̈l metro pax sat, ax 'a yojltac 'el cha, ata tzeln chan̈ jun yune muro, 25 centímetro 'ay cha'an̈.

^14-17 A jun yet'l xajmb'al cha, b'achn q'ue 'a yib'n̈ jun sb'achnub'al yalan̈, 'oxc'aj yaj sb'o'i, lajn yaj spac'b'il chi 'a schan̈il. A jun b'ab'l 'a yaln̈ cha, wajxque metro junjn spac'b'il, jun metro pax ste'il. Ax jun schab'il, uque metro junjn spac'b'il, chab' metro ste'il. Oyn 'och pax jun stitac 25 centímetros 'ay cha'an̈. An̈jtona jun yox c'ajil cha, waque metro junjn spac'b'il, chab' metro pax ste'il. Ax 'a junjn schiquin, ata 'aych junjn tas 'icha yilx sch'ac wacax. A 'a yib'n̈ jun yox c'ajil cha, ata tz'ajx tz'a no xajmb'al. Ax sc'ochal 'aj tzon̈ q'ue'i, ata scan a stojlal 'aj tzq'uel c'u.

X'och yopso jun yet'l xajmb'al

¹⁸ Xlajw cha, xyaln pax Jehová 'ayn 'ixtic: A yic 'oj c'och stiempoal sb'o jun yet'l xajmb'al 'icha tz'aj eln tic, yowal 'oj yiclxc jun tzo'n̈ sleyl tic: 'Oj 'ajxoc tz'a junc no noc' xajmb'al-l 'a yib'an̈, ax stzicx 'och schic'l no 'a yib'n̈ chi smasnil.

¹⁹ An Jehová in, an tzwal 'ixtic: A eb' ya'mal 'och sti eb' 'anma', atn eb' yin̈tl can win Sadoc, eb' tzin 'a'n servil, a eb' tz'a'n tz'a junc no quelm wacx xajmb'al-l 'ayn yuj ya'n lajwc mul.

²⁰ Tzlajw cha, tze'n cot jac chic' cha, tza tzicn 'och 'a sch'ac jun yet'l xajmb'al chi 'a junjn yisquinyoal, atn jun 'ay 'a snan̈l cha. Tza tzicn 'och pax 'a jun 'icha smuroal cha, atn jun b'echn chan̈ 'a stitc cha. 'Ixta wal 'oj otc a sacb'tzan can yuj mul.

²¹ Tzlajw cha, tza'n 'ijxoc cot no quelm wacx tz'ajx yuj mul cha, tza'n 'ajxoc tz'a no 'a sti 'el watut, 'a 'aj 'ay yet'ul.

²² Ax 'a junx c'u, tza'n 'ajxoc tz'a junc no quelm chiwo yuj ya'n lajwc mul, junc no may spaltail. 'Ixta 'oj 'aj sacb'tzan eb' ya'mal 'och sti eb' 'anma jun yet'l xajmb'al chi yet' no noc' cha, 'icha tz'aj no quelm wacx tzb'ab'lj cha.

²³ A yic 'oj lajwc ya'n eb' jun tzo'n̈ cha, ax a'n 'ijxoc cot junc xo no quelm wacax yet' jun mam calnelu, e no may spaltail.

²⁴ Tza'n 'ajxoc tz'a 'a wojltac an Jehová in, tzac' ya'ch eb' ya'mal 'och sti eb' 'anma chi yatz'mil e no', tzlajw cha, tzya'n eb' tz'a 'a wojltac.

²⁵ Uque c'u 'oj ya'n̈j tz'a eb' no xajmb'al cha, 'oxtcwan̈ yajx tz'a no 'a junjn c'u, jun quelm chiwo, jun quelm wacax yet' jun mam calnelu, e no may spaltail.

²⁶ A 'a yol uque c'u cha, 'oj ya'n̈j tz'a eb' no xajmb'al tz'ajx tz'a yuj ya'nc lajwc mul, sec 'ixta 'oj 'aj yochcn jun yet'l xajmb'al chi 'a yopiso.

²⁷ Ax 'a swajxquil c'u cha, ata 'oj 'el yich ya'n tz'a eb' ya'mal 'och sti eb' 'anma e xajmb'al tz'ajx tz'a'oc yet' e xajmb'al yic junc'ojlal. 'Ixta to b'i'an, ax ex in chan pax wico'oc. An Jehová in, an tzwala, xchi Dios.