Ez 42 - Chuj San Sebastian Bible

Jun tzo'n̈ cuarto*r* quiln 'och 'a yatut Dios

^1-2 Xlajw cha, in yi'n 'el jun winc chi 'a sti 'el jun 'amc' 'ay 'a stojlal norte, in yi'n 'och 'a yojl jun tzo'n̈ cuarto 'ay 'a sti 'amc' 'a yojltac jun n̈a tzcan 'a stojlal norte cha, atn jun quiln 'och 'a spatc 'el yatut Dios cha. A jun tzo'n̈ cuarto chi 'a smasnil, 50 metro spac'b'il, ax 25 metro schiquin.

³ A 'a jun spac'b'il cha, ata tzcan jun 'amc' yic yojl 'ochi, lajn̈e metro sat. Ax 'a jun pac' xo, ata 'ay pax junx 'amc' latz'b'il 'ejm q'uen 'a 'a, atn jun 'ay 'a sti 'elta. A 'a jun 'amc' cha, ata oyn 'och jun tzo'n̈ cuarto q'uelc'mb'a yaj yet' pax jun tzo'n̈ xo 'oxe piso yaj sb'o cha.

⁴ A 'a yojltac jun tzo'n̈ cuarto cha, ata 'ay junx 'amc' cha, o'e metro sat, 50 metro scal, a jun cha, tz'och 'a yojl 'och cha. Ax spuertail jun tzo'n̈ cuarto cha, ata q'ueln 'at eb' 'a stojlal norte.

⁵ A jun tzo'n̈ cuarto 'ay 'a yoxl piso cha, cotc yojl eb' 'a yib'n̈ junx piso 'aycn 'a yaln̈ cha, yujto may spatzb'il yaln̈ eb'.

⁶ May pax yipnub' eb' 'aych 'icha jun tzo'n̈ xo cuarto 'ay 'a sti 'amc' 'a yojl 'och cha, yujto cotc xoj tz'aj yel'ch eb' 'ay 'a yib'n̈ cha.

^7-8 A spac'b'il jun tzo'n̈ cuarto 'a sti 'el 'amc' cha, 25 metro 'a smasnil. Ax 'a yojltac 'elt jun cuarto cha, ata 'ay pax jun yune muro tzeln cha'an̈, 25 metro yoc. A jun 'amc' chi 'a smasnil, 'ay 50 metro.

⁹ A jun tzo'n̈ cuarto 'a b'ab'l piso 'a yaln̈ cha, ata tzon̈ 'och 'a jun 'amc' 'ay 'a yol sti jun puerta 'a stojlal 'aj tzq'uel c'u,

¹⁰ 'a 'aj tz'el'ch jun muro 'a sti 'amc' 'a sti 'el cha. Ax 'a sti 'el jun 'amc' 'ay 'a stojlal sur, jun q'uelc'mb'a yaj yet' jun n̈a 'ay 'a stojlal 'aj tz'em c'u, jun quiln 'och 'a spatquil 'el smuroal yatut Dios, ata 'ay pax jun tzo'n̈ xo cuarto.

¹¹ Lajn yaj sb'o jun tzo'n̈ cuarto chi yet' jun tzo'n̈ cuarto 'ay 'a sti 'el 'amc' 'a stojlal norte, lajn pax yaj sb'o 'aj tzon̈ 'ochi, yet' 'aj tzon̈ 'elxi, yet' pax yamq'uil yol sti cha.

¹² 'Ixta pax yaj jun puerta 'aj tzon̈ 'ochi yic tzon̈ c'och 'a jun tzo'n̈ cuarto 'ay 'a stojlal sur. A 'a sti 'och puerta cha, ata tzchaj 'el jun 'amc' yic jun tzo'n̈ cuarto cha, masnto tzchaj sb'a yet' jun muro yic junx puerta 'ay 'a stojlal 'aj tzq'uel c'u.

¹³ 'Ix yaln jun winc chi 'ayn 'ixtic: A jun tzo'n̈ cuarto 'ay 'a sti 'amc' 'a stojlal sur, yet' jun tzo'n̈ xo 'ay 'a stojlal norte, yicn̈ej eb' ya'mal 'och sti eb' 'anma 'a Dios yaji. Atn eb' tz'a'n servil Jehová, ata tzc'ux eb' jun tzo'n̈ xajmb'al tz'ajx 'a Dios. A pax ta tzmol eb' jun tzo'n̈ xajmb'al mto jun tzo'n̈ ofrenda tz'ajx yuj yajx lajwc mul, mto yuj stojloc mul cha. A jun tzo'n̈ cuarto cha, to yic Dios yaji.

¹⁴ A yic tz'och eb' ya'mal 'och sti eb' 'anma 'a yol yatut Dios, matz tac' scomn 'elt eb' 'a sti 'elt cha, mto b'eyc'oc 'a sti 'el 'amc' chi yet' spichl yic yopiso. Toto tz'elt eb', yowlal tzjelcn 'el eb' spichl 'a yojl 'och cha, chucx spichl eb' tzya'chi yic tz'elt eb' 'a scal eb' 'anma', xchi 'ayin.

A yechl spatquil 'el yatut Dios

¹⁵ Ax yic xlajw yechtan jun winc chi yojl yatut Dios, in yi'n pax 'el 'a junx puerta 'ay 'a stojlal 'aj tzq'uel c'u, syamn 'och yechtan smasnil spatc 'el yatut Dios cha.

^16-19 Xyechtan pax schan̈paq'uil spatquil 'el yatut Dios cha, 250 metro 'a junjn spac'b'il cha.

²⁰ 'Ix yechtej jun winc chi schan̈paq'uil sti slumal yatut Dios. Ax 'a sti 'el cha, ata oyn 'och smuroal, 250 metro jun muro chi 'a junjn pac'. Atn jun chi 'aych smacloc snan̈l jun lugar to yic Dios yaji yet' jun tzo'n̈ xo tas comn yaji.