Ez 41 - Chuj San Sebastian Bible

¹ Xlajw cha, in yi'n pax 'och jun winc chi 'a yojl 'och sti yatut Dios cha, 'ix yechtan jun tzo'n̈ niwc marco, 'oxx metro spiml jun jun.

² A spuertail, o'e metro sat; ax jun tzo'n̈ smarcoal sti puerta cha, nan̈lyoxl metro spiml jun jun. Xlajw cha, 'ix yechtan jun yojl cha, junc'l metro scal, ax lajn̈e metro sat.

³ Xlajw cha, x'at 'a jun cuarto 'a yich 'ochi, xyechtan jun tzo'n̈ smacl snan̈l eb' cuarto cha, junjn metro spiml jun jun. Ax jun yol sti 'aj tzon̈ 'och cha, 'oxe metro sat, a 'a yol sti cha, ata 'aych pax smarcoal, nan̈l schan̈l metro spiml junjn marco cha.

⁴ 'Ix yechtan pax jun yojl 'och cha, lajn̈e metro junjn spac'b'il. Xlajw cha, xyaln 'ayn 'ixtic: A jun Lugar tic, cojn Dios 'ay yico', xchi 'ayin.

Jun tzo'n̈ xo cuarto

⁵ 'Ix yechtan pax jun winc chi spiml smuroal yatut Dios, 'ay 'oxe metro spimal. Ax 'a sat jun muro cha, ata quiln 'och jun tzo'n̈ cotc cuarto, cha'chb' metro spac'b'il jun jun.

⁶ A jun tzo'n̈ cuarto cha, 'oxe piso yajb't eb' 'a cha'an̈. Lajn̈schawinc cuarto 'ay 'a junjn piso. A 'aj tzque'ch jun b'ab'l piso cha, ata quiln 'och spatzb'il. Ata tzchaj 'elt schab'l piso cha. Ax 'aj tzq'ue'ch jun schab'l cha, ata quiln 'och jun tzo'n̈ xo patzab'. Ton̈j quiln 'och 'a sat smuroal yatut Dios, man̈ 'ayc' 'och 'a yojl jun muro cha. Ax 'a yib'n̈ cha, ata 'ay yoxl piso.

⁷ A jun tzo'n̈ cuarto oyn 'och 'a sat muro cha, 'ay jun sc'ochal 'a yojl 'a b'ab'l piso; tz'ec' 'a schab'l piso masnto tzq'ue'ch 'a yoxl piso cha. A jun tzo'n̈ cuarto 'a schab'l piso, lewnto yojl eb' 'a jun tzo'n̈ b'ab'l cha, ax jun tzo'n̈ 'ay 'a yoxl piso cha, lewnto eb' jab'x 'a yib'n̈ jun tzo'n̈ 'ay 'a schab'l piso cha.

⁸ 'Ix wiln jun yipnub'al yich 'aj b'achn q'ue jun tzo'n̈ cuarto 'a sat smuroal yatut Dios, a jun cha, 'oxe metro ste'il.

^9-10 A jun muro 'aj oyn 'och jun tzo'n̈ cuarto 'a smuroal yatut Dios, nan̈lyoxl metro spimal. 'Ixta pax scal jun tzo'n̈ cuarto cha, lajn yet' jun tzo'n̈ cuarto 'ay 'a yol 'och sti spuertail yatut Dios, a yamq'uil snan̈l jun tzo'n̈ scuarto eb' ya'mal 'och sti eb' 'anma 'a Dios, yet' yatut Dios cha, lajn̈e metro scal.

¹¹ A spuertail jun tzo'n̈ cuarto cha, ata 'aycn 'a sti 'aj tz'el'ch yamq'uil sti yatut Dios. 'Ay jun puerta chi 'a stojlal norte yet' junx 'a stojlal sur. Ax smuroal cha, nan̈lyoxl metro spimal. Lajn̈e metro sat yamq'uil.

Jun n̈a 'a stojal 'aj tz'em c'u

¹² A 'a stojlal 'aj tz'em c'u, ata 'ay junx n̈a 'a sti 'el jun 'amc' cha. A jun n̈a cha, 35 metro schiquin, 45 metro spac'b'il, nan̈lyoxl metro spiml smuroal.

A yechl yatut Dios 'a smasnil

¹³ Xlajw cha, xyechtan jun winc chi spac'b'il yatut Dios chi 'a smasnil; a spac'b'il cha, 50 metro. Ax jun 'amc' 'a spatc yatut Dios yet' junx n̈a 'ay 'a stojlal 'aj tz'em c'u, yet' pax smuroal, 50 metro jun tzo'n̈ chi 'a smasnil.

¹⁴ Ax 'a sat 'elt yatut Dios, yet' yamq'uil sti 'ay 'a stojlal 'aj tzq'uel c'u, 50 metro pax jun chi 'a smasnil.

¹⁵ 'Ix yechtan pax spac'b'il junx n̈a quiln 'och 'a spatquil smuroal yatut Dios, jun 'ay 'a yojltac junx 'amc' cha, yet' pax smuroal 'a junjn pac', 'ay 50 metro 'a smasnil.

A tas yaj yatut Dios sb'o'i

¹⁶ A chab' cuarto 'ay 'a yol yatut Dios yet' jun corredor 'a sti 'amac', 'a'nten̈ej 'aych 'a yich. Tzchaj 'at 'a yich masnto 'a 'aj 'ay swentnual, 'a'nte pax 'ay 'ejm 'a yojol. 'Ixtan̈ej yaj sb'o jun tzo'n̈ cuarto cha, 'a'nten̈ej 'aych 'a yox paq'uil. A jun tzo'n̈ wentnu cha, 'aych pax 'a'nte chi 'a smarcoal.

^17-18 A 'oxe cuarto cha, 'a'nten̈ej 'aych 'a yojl eb' yet' 'a smarcoal swentnual. Ax 'a eb' te 'a'nte cha, ata b'ob'il 'och yechl eb' querubín yet' yechl te palma. Stzol-l yajch eb' yechl chi 'a eb' te 'a'nte cha. A junjn querubín cha, cha'chb' sat eb',

^19-20 jun 'icha yilx sat 'anma', ax junx 'icha yilx sat no león. Q'ueln 'at junjn sat eb' chi 'a 'aj 'aych yechl te palma 'a stz'ey cha. 'Ichn̈jta yajch jun tzo'n̈ yechl chi 'a te 'a'nte 'aych 'a yich yatut Dios cha, tz'atn̈j 'a sat lu'um masnto tzq'ue'ch 'a jolm puerta.

²¹ A smarcoal yol sti puerta 'a yatut Dios cha, lajn eb' schab'il, chan̈ tzeln̈ yaj sb'o'i. Ax 'a yojltac 'elt jun cuarto to cojn Dios 'ay yico', ata 'ay jun tas lajn yilxi,

Jun yet'l xajmb'al nab'a 'a'nte'

²² 'icha yilx jun yet'l xajmb'al yic incienso; jun metro yaj spac'b'il, nan̈lschab'l metro ste'il; 'ay yisquinyoal, 'ay pax sb'achnub'al yalan̈, te 'aychn̈ej 'a smasnil. Xlajw wiln jun cha, xyaln jun winc chi 'ayn 'ixtic: Atn jun mexa tic 'ayc' 'a yojltac Jehová, xchi 'ayin.

Jun tzo'n̈ puerta

^23-24 A jun yatut Dios cha, yet' jun to yicn̈ej yaj sch'ocoj, cha'chb' yajch spuertail. A junjn puerta cha, chatc jen̈n pax yaj sb'o'i, a yic tzjacw junjn pac', tzecx scha sb'a yic junxn̈ej tz'ajcni.

²⁵ A 'a spuertail jun b'ab'l cuarto cha, ata b'ob'il 'och yechl jun tzo'n̈ querubín yet' yechl te palma, 'icha wal yajch jun tzo'n̈ yechl 'a smuroal yatut Dios; 'a yib'n̈ swentnual, yet' 'a jun jolm puerta 'a sti corredor, 'ixta yaj jun chi sb'o'i, te 'ay q'ue spatloc jun corredor cha.

²⁶ A 'a spac'b'il jun corredor cha, ata 'ay jun tzo'n̈ wentnu cotc sat, ax 'a smarcoal jun tzo'n̈ wentnu cha, ata b'ob'il 'och yechl te palma.*f6*