Ez 40 - Chuj San Sebastian Bible

Yab'xil yatut Dios

^1-2 A 'a yic 25 ab'il xo quijx cot 'icha presoal 'a Babilonia, 'a lajn̈e yoch b'ab'l 'uj, 'a yic schan̈lajn̈il xo ab'il yajx ganar chon̈b' Jerusalén, 'ix 'ochx spoder Jehová 'ayin. Ax Yespíritu 'ix 'a'n wila', 'icha to in yij 'at 'a Jerusalén cha. Axta in c'och yuj 'a sjolm jun tzalan. Ax xwilni, ata 'ay jun chon̈b' 'a stojlal sur, til wal n̈a 'a jun chon̈b' cha.

³ A 'aj in yij 'at cha, ata xwil jun winac, caw tzictznil yilx 'icha q'uen bronce. Lin̈n 'elt 'a sti spuertail jun n̈a, yamb'il jun ch'an̈ lum yu'uj, to nab'a lino. Ax 'a junx sc'ab', ata yamb'il jun te 'aj yu'uj, te tz'echtan junc tas.

⁴ 'Ix jaw jun winc chi 'ayin, 'ix yaln 'ayn 'ixtic: Ach 'anma', tzcham wal 'a maclni tas 'oj wal 'ayach, yet' tas 'oj in ch'ox ela'. A Dios ach 'i'n cot 'a tic yic tzin ch'oxn el jun tzo'n̈ tic, tzlajw elni, ax aln yab' eb' et israelal smasnil tas 'oj el tic, xchi 'ayin.

Spuertail yatut Dios

⁵ A 'a spatc 'el yatut Dios, ata oyn 'och smuroal. Ax te 'aj yet' jun winc cha, 'oxe metro yoc te'. Xlajw cha, xyechtan win jun muro cha, 'oxe metro spimal, 'oxe pax metro ste'il.

⁶ Xlajw cha, xc'och 'a yol sti jun puerta 'ay 'a stojlal 'aj tzq'uel c'u, xq'ue 'a sc'ochal yol sti puerta, 'ix yechtan jun yojl 'och cha, 'ay oxe metro yajchi.

⁷ A 'a yojl 'och sti puerta cha, ata 'ay jun niwquil 'amac', ax 'a stitc jun 'amc' cha, ata tzoln 'och jun tzo'n̈ cotc cuarto yic eb' tan̈m puerta. A junjn cuarto cha, 'oxx metro spac'b'il, 'oxx metro pax schiquin, nan̈l yoxxil metro scal jun jun. Ax 'a yojl 'och cha, ata 'ay junx puerta, q'uelc'mb'a yaj yet' yatut Dios cha, 'oxe metro sat.

^8-9 'Ix yechtan jun winc chi jun corredor 'aj 'ay jun puerta cha, 'ay chan̈e metro sat. Ax 'a junjn spac'b'il cha, ata 'ay junjn niwc marco, junjn metro spimal.

¹⁰ A 'a yojl 'och jun puerta 'ay 'a stojlal 'aj tzq'uel c'u, 'a sti yamq'uil cha, ata 'ay 'oxx cuarto lajnn̈ej yechl eb', lajn yaj eb' sb'o'i, 'ixta pax jun tzo'n̈ smacl snan̈l eb' cuarto cha, lajnn̈ej pax yechl eb'.

¹¹ Xlajw cha, 'ix yechtan jun winc chi jun puerta cha: O'e metro sat, ax 'a yojl 'ochch cha, nan̈l yucl metro yajchi.

¹² A 'a yojltac 'elt jun tzo'n̈ cuarto cha, ata b'ob'il chan̈ junjn cotc muro nan̈l metro spimal, nan̈l metro pax ste'il. Ax jun tzo'n̈ cuarto cha, 'oxx metro spac'b'il, 'ixta pax schiquin.

¹³ Xyechtan pax jun winc chi spac'b'il jun n̈a cha, schaj cot yechtan 'a yojl jun cuarto 'a yich 'ochi, masnto 'a yich 'och junx cuarto cha, a chab' cuarto cha, q'uelc'mb'a yaj eb', 'ay nan̈lyoxlajn̈il metro scal jun puerta chi yet' junx puerta cha.

¹⁴ 'Ix yechtan pax jun corredor q'ueln 'och 'a yatut Dios, lajn̈e metro junjn spac'b'il cha.

¹⁵ Ax snajtil scal jun puerta 'a sti 'elta, yet' junx puerta 'a yojl 'och cha, 'ay 25 metro snajtil scal eb'.

¹⁶ A jun tzo'n̈ cuarto 'a yojl 'och cha, 'ay swentnual junjn eb', 'ay 'a yojltac 'elta, 'ay pax 'a schiquin, atn jun tzo'n̈ oyn 'och 'a jun 'amc' 'a yojl cha, tzolmtac pax yajch smacl snan̈al, axta 'aych yechl te palma.

Jun 'amc' 'a sti 'el yatut Dios

¹⁷ Xlajw cha, in yi'n pax 'el jun winc chi 'a 'aj 'ay jun 'amc' 'a sti 'och cha. A jun 'amc' cha, latz'b'il 'ejm q'uen 'a 'a, ax 'a stitc cha, ata oyn 'och lajn̈schawinc cotc cuarto.

¹⁸ A jun 'amc' 'aj latz'b'il 'ejm q'uen q'uen cha, tzc'och to 'a stz'ey yol sti junjn puerta cha. A spac'b'il yet' schiquin, lajnn̈ej yechel.

¹⁹ 'Ix yechtan pax jun winc chi snajtil scal jun puerta 'a sti 'el chi yet' junx puerta 'a yojl 'och cha, atn jun 'ay 'a stojlal 'aj tzq'uel c'u, yet' jun 'ay 'a stojlal norte, 'ay 50 metro scal chab' puerta cha.

Jun puerta 'a stojlal norte

²⁰ A jun puerta 'ay 'a stojlal norte 'a sti 'elt jun 'amc' 'ay 'a spatc 'elt yatut Dios cha, xyechtej pax jun winc cha, xyechtej spac'b'il, schiquin yet' jun scorredoral yol sti cha.

²¹ A 'a junjn spac'b'il jun corredor cha, ata 'aych 'oxx xo cuarto, ax 'a yojltac 'elt jun tzo'n̈ cuarto cha, ata 'aych smacl snan̈l jun tzo'n̈ cuarto cha, ax yojl 'och cha, lajn yechl yet' yic jun b'ab'l puerta, 25 metro spac'b'il, nan̈lyoxlajn̈il metro schiquin.

²² A sjolm wentnu yet' jun tzo'n̈ wentnu cha, lajn yaj sb'o eb', ax 'a smarcoal, ata 'aych yechl te palma, lajnn̈ej pax yechl yet' yic te puerta 'ay 'a stojlal 'aj tzq'uel c'u. An̈jtona', 'ay pax sc'ochal 'aj tzon̈ q'ue'i, uque yaj sb'achquixtaquil.

²³ A jun puerta 'ay 'a stojlal norte, q'uelc'mb'a yaj yet' jun puerta 'ay 'a yojl 'och cha. Ax jun winc cha, xyechtej scal chab' puerta cha, 'ay 50 metro scal eb'. Lajn yaj yet' jun 'ay 'a stojlal 'aj tzq'uel c'u.

Jun puerta 'a stojlal sur

²⁴ Xlajw cha, in yi'n 'at jun winc chi 'a stojlal sur. A pax ta 'ay junx puerta. 'Ix yechtan smarcoal yet' jolm puerta cha, lajn yechl yet' jun tzo'n̈ b'ab'l puerta.

²⁵ A 'a yojl 'och cha, 'ay swentnual yet' smarcoal, 'ichan̈ej wal yic jun tzo'n̈ b'ab'l cha, a snajtil scal, 25 metro, nan̈lyoxlajn̈il metro sat.

²⁶ An̈jtona', 'ay pax jun sc'ochal, uque sb'achquixtaquil, ax smarcoal, ata 'ay 'a yojl 'och cha, 'aych pax yechl te palma 'a junjn spac'b'il.

²⁷ A jun puerta 'ay 'a stojlal sur, q'uelc'mb'a yaj yet' junx puerta 'ay 'a sti 'amc' 'a yojl 'och cha. 'Ix yechtan pax jun winc chi snajtil scal chab' puerta cha, 50 metro scal eb'.

Jun 'amc' 'a yojl 'och sti puerta

²⁸ In yi'n pax 'och 'a yol 'och sti puerta, 'a 'aj 'ay jun yamq'uil sti yatut Dios 'a stojlal sur. Syamn 'och yechtan jun puerta cha, lajnn̈ej yechl yet' jun tzo'n̈ xo puerta tox xyechtej cha.

^29-30 A jun tzo'n̈ cuarto cha, sjolm wentnu, yet' smacl snan̈al, lajnn̈ej yechl yet' yic jun tzo'n̈ b'ab'l cha. A jun n̈a cha, 'ay swentnul 'a yojl 'och 'aj 'ay yamq'uil yol sti cha, a snajtil scal, 25 metro, nan̈lyoxlajn̈il metro sat.

³¹ A 'a yojl 'el sti puerta cha, ata 'aych pax jun tzo'n̈ niwc marco, 'aych pax yechl te palma 'a 'a. A jun puerta cha, 'ay pax jun sc'ochal 'aj tzon̈ q'ue'i, wajxque sb'achquixtaquil.

Junx 'amc' 'a yojl 'och sti puerta

³² In yi'n pax 'och 'a 'aj 'ay jun yamq'uil yol sti puerta 'a stojlal 'aj tzq'uel c'u, 'ix yechtan jun yojl 'och cha, lajnn̈ej yechl yet' jun tzo'n̈ b'ab'l cha.

³³ 'Ay jun tzo'n̈ cuarto 'a yojl 'och cha, 'ay swentnual, smacl snan̈l, sjolm puerta yet' yic swentnual, lajnn̈ej yechl yet' yic jun tzo'n̈ b'ab'l cha. A snajtil scal 'ay 25 metro, nan̈lyoxlajn̈il metro sat.

³⁴ A jun tzo'n̈ niwc marco 'a yol 'el sti puerta cha, 'aych yechl te palma 'a junjn spac'b'il eb'. A jun puerta cha, 'ay jun sc'ochal 'aj tzon̈ q'ue'i, wajxque sb'achquixtaquil.

Junx 'amc' 'a yol sti puerta

³⁵ In yi'n pax 'at 'a yol sti jun puerta 'ay 'a stojlal norte, 'ix yechtan jun winc chi jun puerta cha, lajnn̈ej yechl yet' jun tzo'n̈ xo puerta xyechtej 'a b'ab'el.

³⁶ 'Ay scuartoal, smacl snan̈al, swentnual, jolm puerta yet' jolm wentnu. 'Ay pax swentnual jun yojl 'och sti cha, a snajtil scal 'ay 25 metro, nan̈lyoxlajn̈il metro sat.

³⁷ A jun corredor 'a yol 'el sti puerta cha, 'ay pax smarcoal. A 'a sat jun tzo'n̈ marco cha, ata 'aych yechl te palma 'a junjn spac'b'il. A jun puerta cha, 'ay pax sc'ochal, wajxque sb'achquixtacl 'aj tzon̈ q'ue'i.

Jun tzo'n̈ cuarto

³⁸ A 'a yojl 'och sti junjn puerta cha, ata 'ay junjn cuarto 'a sti corredor, ata tzb'icx 'el no noc' tz'ajx xajmb'alil.

³⁹ Ax 'a yojl 'och cha, ata 'ay chan̈e niwc mexa, cha'chb' 'a junjn pac'. A 'a yib'n̈ te mexa chi tzmilx no xajmb'al tz'ajx tz'a'oc yet' no tz'och stojloc mul.

⁴⁰ A 'a yol 'el sti puerta 'a stojlal norte, ata 'ay pax chan̈e xo mexa, cha'chb' 'a junjn pac' 'a 'aj tzq'ue'ch jun sc'ochal cha.

⁴¹ Tzyal 'el'chi, chan̈e mexa 'a sti 'el puerta, chan̈e pax 'a yol 'och sti cha, wajxque jun tzo'n̈ mexa chi 'a smasnil. A 'a yib'n̈ jun tzo'n̈ mexa chi tzmilx no xajmb'al cha.

^42-43 A chan̈e mexa 'aj tzmilx no xajmb'al-l tz'a cha, tzeyb'il q'uen 'ay q'ue 'a sat, 'ay 75 centímetro spac'b'il, 75 centímetro schiquin, ax 50 centímetro ste'il, atn 'a yib'n̈ jun tzo'n̈ mexa chi tzq'ue schib'jal no xajmb'al. Ax 'a yojl 'och jun cuarto cha, ata tzoln 'och jun tzo'n̈ slocnub'al no chib'j cha, a jun tzo'n̈ mexa cha, tzeln chan̈ stitc eb', wajxque centímetro yajch 'a yojl stitc cha, atn 'a yib'n̈ chi tzq'ue jun tzo'n̈ harina tz'ajx ofrendail, yet' jun tzo'n̈ yamc'ab' tzc'anxi, yic tzmilx no xajmb'al cha.

⁴⁴ Ax 'a yol 'elt sti jun puerta 'a yojl 'och cha, 'a 'aj 'ay jun yamq'uil sti cha, ata 'ay chab'x cuarto. Jun 'ay 'a stz'ey puerta 'a stojlal norte q'ueln 'at 'a stojlal sur; ax junx 'ay 'a stz'ey puerta 'a stojlal sur q'ueln 'at 'a stojlal norte.

⁴⁵ Xlajw cha, xyaln jun winc chi 'ayn 'ixtic: A jun cuarto q'ueln 'at 'a stojlal sur, yic eb' ya'mal 'och sti eb' 'anma 'a Dios, atn eb' tz'a'w servil 'a yatut Dios.

⁴⁶ Ax jun cuarto q'ueln 'at 'a stojlal norte, yic eb' ya'mal 'och sti eb' 'anma', eb' tzn̈usn no xajmb'al, atn eb' yin̈tl can Sadoc, yet' eb' yin̈tl can pax Leví, cojn eb' tztac' ya'n servil Jehová, xchi 'ayin.

Junx 'amc' 'a yojl 'ochi

⁴⁷ 'Ix yechtan pax jun winc chi jun 'amc' 'a yojl 'och cha. A jun cha, lajn spac'b'il 'a schan̈il, 50 metro junjn pac'. Ax jun yet'l xajmb'al, ata 'ay 'a yojltac yatut Dios.

⁴⁸ In yi'n 'at jun winc chi 'a yol sti scorredoral yatut Dios, xyechtan jun tzo'n̈ yib'n̈ yol sti puerta cha, nan̈lyoxl metro sat, nan̈lschab'l metro spiml pax junjn smarcoal cha, uque metro slewnal sat spuertail.

⁴⁹ A jun yol sti puerta cha, lajn̈e metro yajch 'a yojl cha, waque metro sat, ax jun sc'ochal sti 'elt 'a stz'ey junjn marco yic yol sti cha, a pax ta 'aych junjn q'uen yipnub'oc, junjn 'a junjn pac'.