Ez 4 - Chuj San Sebastian Bible

Yaljnac Ezequiel*r* yuj owl 'a Jerusalén

¹ 'Ix yaln pax Jehová 'ixtc 'ayin: Ach 'anma', 'ij cot junc lum xamit, tza'n 'ejm 'a ojltac, tzlajw cha, tza b'on 'ejm yechl chon̈b' Jerusalén 'a yib'an̈.

² Tzoyn 'och yechl yamc'ab' yic owl 'a spatquil, tza'n 'och smuroal, tza'n 'och sb'achte'al 'a spatquil 'el cha, ax 'a yojltac 'elt cha, ata tza b'o camplamento tz'och oyn 'a 'a.

³ Tze'n cot junc q'uen sa'am, tza lin̈n chan̈ 'a a cal yet' jun chon̈b' cha, tzach 'och q'ueln 'a 'a, 'icha cab' to wan a'n owl yet'oc. Atn jun chi tz'och ch'oxnb'ilc 'a eb' et israelal.

⁴ Ach xo tic, 'oj ec' t'ocn a way 'a a surito 'a stz'ey chi yuj smul eb' chon̈b' israel, cojn 'a jun pac' chi 'aj tzach 'e'cn t'ocan, yujto 'ixta 'oj 'aj ab'n syal yuj smul eb' cha.

⁵ 'Icha sb'isl yab'lil xo smul eb', 'ixta sc'ul 'oj ab' syal yuj eb' spojjnac 'el sb'a 'a Judá, 390 c'u 'oj ab' syail, tzyal 'el'chi, junjn c'u 'a junjn ab'il.

⁶ A yic 'oj tz'acwc stiempoal jun chi o'oj, ax e'x t'ocn 'a a wach' c'ab', yuj smul eb' yin̈tl Judá. Chawinc c'u 'oj a canx t'ocn ta', tzyal 'el'chi junjn c'u 'a junjn ab'il.

⁷ Tzach meltzj 'at q'ueln 'a chon̈b' Jerusalén, tza piln 'oxt sc'ab' a camix, tzach paxtin 'at 'a yib'n̈ jun chon̈b' cha.

⁸ 'Icha to 'oj ach in jalcn yet' lasu, sec ma'oj stac' a meltzj 'a junx a mo'och, masnto 'oj tz'acwoc sc'ul ab'n syal cha.

⁹ Tze'n can cot jac tas 'oj a c'uxu', atn jac 'ixm trigo, 'ixm cebada, te sat 'awatut, te lenteja, te mijo yet' te centeno. Caln tzotj a'n 'ejm 'a yol junc chen. Atn chi 'oj a b'o a c'uxu', yic 'oj e'cn t'ocn 'a jun a moch cha. 390 c'u 'oj a c'ux jun tzo'n̈ cha.

¹⁰ Yechl tzotj tas tza c'ux 'a junjn c'u, tzechtej mel-loc libra tas tza c'ux 'a junjn c'u, checln̈ej pax yorail 'aj tzach wa'i.

¹¹ Ax 'a junjn c'u, mel-l litro a a tzoq'uej, checln̈ej pax yorail 'aj tzo'j a'.

¹² A 'ixm wal 'oj a wa cha, 'oj a b'o 'ixm 'a yarinail 'ixm cebada, ax a b'oln 'a stzac'ac'. A stza 'anma cha, a chi 'oj a c'atztzoc, q'ueln 'och eb' 'ayach, ax a b'on tas tza c'ux cha, xchi 'ayin.

¹³ Xlajw cha, xyaln pax Jehová 'ayn 'ixtic: A jun tzo'n̈ 'oj a c'ux cha, caw man̈ wach'c eb' 'a sat ley, palta 'oj a c'uxu', yic tza ch'oxn 'eli, to 'ixta tas 'oj sc'ux eb' et israelal yic 'oj in pechnc can 'at eb' 'a yol slugar jun tzo'n̈ xo nacion̈, xchi 'ayin.

¹⁴ 'Ix waln 'ixtc 'a 'a: Mamin Jehová, caw wal may 'aj tzin yam junc tas man̈ wach'c 'a yic 'unnal, may 'aj tzin chi no noc' mun tzchami, mto no noc' tzcham yuj yit noc'al, may xon 'aj tzin chi no chib'j man̈ wach'oc, xin chi 'a 'a.

¹⁵ Xlajw cha, xyaln 'ayn 'ixtic: A ticnec 'an, man̈ a c'a'c stza 'anma cha, a cab' stza no wacx tza c'atztzej yic tza b'on tas tza c'ux cha, xchi 'ayin.

¹⁶ 'Ix yaln pax 'ixtc 'ayin: Ach 'anma', a ticnec 'oj wac' lajwc 'ejm tas tzc'ux eb' 'aj Jerusalén. Yechl xoj 'oj 'aj tas 'oj sc'ux eb', scal syailal eb' 'oj laj sc'ux jac tas; yechl xoj 'oj yutc eb' yu'n a', 'oj yuc' eb' a 'a scal xiwc'ojlal.

¹⁷ Sec ax yic 'oj lajwc 'ejm tas tzc'ux eb' cha, yet' yal eb' tzyuq'uej, toxn̈ej 'oj laj yilch sb'a junjn eb', yujto 'oj laj xiw junjn eb' 'a 'a. 'Ixta 'oj 'aj sc'un lajw 'ejm eb' yuj smul cha, xchi 'ayin.