Ez 38 - Chuj San Sebastian Bible

A tas alb'il 'a yib'n̈ win Gog

¹ 'Ix yaln pax Jehová 'ayn 'ixtic:

² Ach 'anma', a ticnec 'ixc q'ueln 'a yib'n̈ chon̈b' Magog, tzaln jun tzo'n̈ paxti tic 'ixtc 'a yib'n̈ win Gog, win sat yajl 'a Mesec yet' 'a Tubal.

³ Al 'a winac, chajtlto an Jehová in, an tzwal 'ixtic: Ach Gog, sat yajl aj 'a Mesec yet' 'a Tubal, palta an tzwala, to 'ajc'ojl xo wajch 'ayach.

⁴ 'Oj wa'ch junc q'uen 'icha ch'oc 'a yaln̈ a ti', ax ach in to'n meltzjoc. 'Oj ach wi' cot 'a tic yet' smasnil eb' a soldado 'ay q'ue 'a yib'n̈ chej, eb' to yet'n̈j syamc'ab' yic owal, eb' soldado yet' yespada, eb' 'et'jnac syamc'ab' tzmacn sat jul-lab', yet' pax smasnil jun tzo'n̈ xo yamc'ab' yic owal.

⁵ A 'a scal eb' cha, ata 'aych eb' soldado yic Persia, eb' yic Etiopía yet' eb' yic Libia. A jun c'aj eb' soldado cha, yet'n̈j eb' syamc'ab' tzmacn sat jul-lab', q'uen xumpiln c'oxb'il yuj eb'.

⁶ A pax ta ajun eb' soldado yic Gomer, eb' yic Bet-togarma, atn eb' yic jun tzo'n̈ chon̈b' 'ay 'a stojlal norte, man̈x b'ischjb'enoc eb' soldado eb' chon̈b' chi 'aych et'oc.

⁷ 'Ac' lista a b'a yet' a yamc'ab' yic owal yet' smasnil eb' a soldado tza c'anlb'ej.

⁸ A yic niwn xo tiempo tox x'eq'ui, ax a nan cha'an̈ to 'oj ac' owl yet' chon̈b' Israel, atn jun chon̈b' niwn tiempo cannc can 'a sictacl yuj owal. Palta a 'a jun tiempoal cha, meltzjnacx eb' 'anma sactzicnac yajcn 'at 'a scal jun tzo'n̈ xo nacion̈, cajn xo 'ec' eb' 'a slum chi 'a junc'ojlal.

⁹ 'Icha wal junc niwquil q'uic' 'asn 'aych yalil, 'aych pax yic'al, 'ixta wal 'oj aj a c'och 'a jun nacion̈ cha, ax oyn jun chon̈b' chi yet' eb' a soldado, yet' pax smasnil 'anma ajun et'oc.

¹⁰ An Jehová in, an tzwal 'ixtic: Caw tu tas 'oj a nib'c a b'o 'a jun tiempoal cha.

¹¹ 'Oj cob' al 'ixtic: 'Oj 'at wac' owl yet' jun tzo'n̈ 'anma 'a jun tzo'n̈ chon̈b' may smuroal, may spuertail schon̈ab', may pax yijul, caw cob' tzaljc'ojlal yaj eb', palta may 'aj wach' scoln sb'a eb'.

¹² 'Oj in toc'c' smasnil tas 'ay 'a eb', ax wica'ani; 'oj wac' owl yet' jun tzo'n̈ chon̈b' tot b'onc paxi, atn jun tzo'n̈ 'anma tot meltzjnac 'a scal jun tzo'n̈ xo nacion̈. A eb' cha, til wal scajb'en noc' eb', til wal jun tzo'n̈ xo tas 'a eb', atn eb' cajn 'a 'aj tzjeltz'mej sb'a b'e yic jun tzo'n̈ niwc chon̈b' yic yolyib'n̈q'uinl tic, 'oj a chioc.

¹³ Ax eb' 'anma yic chon̈b' Sabá, eb' yic Dedán yet' eb' chon̈wjum yic chon̈b' Tarsis yet' jun tzo'n̈ xo eb' 'a junc xo chon̈b'al, 'oj sc'anb'nc eb' 'aych 'ixtic: ¿Tom achn̈ej tzwul ec' tas 'ay 'a eb' 'anma tic, yuj cha, xa molb'tzan eb' a soldado tic yet' smasnil 'anma ajun et'oc, yic tzwul elc'noc q'uen plata, q'uen oro, no cajb'en noc' yet' jun tzo'n̈ xo tas yic tzach 'och ricoal yu'uj? 'oj schic eb', xchi Dios, xa chi 'a 'a.

¹⁴ Yuj cha, ach 'anma', al 'a Gog cha, to an Jehová in, an tzwal 'ixtic: A yic caw wal tzaljc'ojlal xo yaj pax in chon̈b' Israel, ax a nan chan̈ a'n owl yet' eb'.

¹⁵ 'Oj a cot 'a a lugar caw najat, atn 'a stojlal norte, caw niwn a soldado, til wal eb' 'ay q'ue 'a yib'n̈ chej, man̈x yalnb'ilc 'anma ajun et'oc.

¹⁶ 'Oj cob' ac' owl yet'oc, caw 'oj och oyn 'a in chon̈ab', 'icha tzyac' 'asn tz'och oyn 'a lum jolmctac witz. A 'a jun tiempoal cha, 'oj ach wi' cot 'a sat in lum cha, sec 'oj yil jun tzo'n̈ xo nacion̈ tas 'oj ach wutc ach in satn 'eli, ax yojcan 'el eb' to cojn in ton Dios in.

¹⁷ An Jehová in, an tzwala: Ach ton tic waljnac oj 'a eb' in checb' 'a yic pecti', yic spaxtin can 'el eb' 'a scal eb' in chon̈b' israel cha; najtl ya'jnac eb' yaln 'el o'oj, to an 'oj ach wi' cot ac' owl yet' eb' in chon̈ab'.

Yailal 'a yib'n̈ Gog

¹⁸ An Jehová in, an tzwal 'ixtic: A yic 'oj jawc Gog wul yac' owl 'a chon̈b' Israel, caw 'oj cot yowl in c'ojl 'a yib'n̈ win Gog cha.

¹⁹ Yuj cha, ax wa'n cot jun niwquil quixcab' 'a in chon̈b' cha.

²⁰ Ax smasnil no chay 'a yojl a mar, no ch'ic tz'ec' jen̈n̈oc 'a satcha'an̈, no calte'al noc', no tzjuc sb'a 'a sat lu'um, yet' eb' 'anma', caw 'oj 'ib'xoc chan̈ eb' yuj xiwlal 'a wojltac. Ax laj scot c'acp 'a eb' lum jolmctac witz, 'a eb' lum tzalctac. 'Oj laj cot q'uen niwc tenm 'a pac'an, ax laj slan̈chj 'ejm eb' chon̈b' yet' smuroal.

^21-22 An 'oj wa' cot smasnil yailal 'oj xib'tnoc win Gog yet' eb' soldado. 'Oj wa' cot yab'il 'a yib'an̈, chamel yet' owal. Ax wa'n cot niwc sacb'at 'a yib'n̈ yet' eb' soldado yet' eb' yic jun tzo'n̈ xo nacion̈ ajun yet'oc. 'Oj cot pax 'ic'n̈ab', c'ac' yet' azufre 'a yib'n̈ eb', ax laj smil-lan sb'a eb' soldado chi yet' yespada.

²³ 'Ixta wal 'oj wutc in ch'oxn in poder yet' in jelnal 'a sat jun tzo'n̈ nacion̈ 'oj 'ilnoc jun cha. 'Ixta to b'i'an, ax yojcan 'el eb' to an Jehová in, to cojn in ton Dios in, xchi Dios.