Ez 37 - Chuj San Sebastian Bible

A jun tzo'n̈ tacn̈ b'ac

¹ 'Ix 'ochx spoder Jehová 'ayin, ax Yespíritu 'ix 'a'n wila', 'icha to in yij 'at 'a jun pan̈n 'a'lic 'a 'aj tzicn 'at jun tzo'n̈ tacn̈ b'ac.

² In yi'n b'ey 'a jun 'a'lic cha; caw b'ut'jnac 'el jun pan̈n chi yuj jun tzo'n̈ sb'acl 'anma', palta tacn̈n̈ej eb' smasnil.

³ Yuj cha, xyaln Jehová 'ayn 'ixtic: Ach 'anma', ¿tzam stac' spitzw pax jun tzo'n̈ b'ac tic jun 'ejm xo? xchi 'ayin. In ta'w 'ixtc 'a 'a: Mamin Jehová, ach Wajlil, cojn ach ojtac, xin chi.

⁴ Xlajw cha, xyaln pax 'ixtic: Al 'a jun tzo'n̈ tacn̈ b'ac tic to tzchaj yab' eb' in paxti'.

⁵ Al 'a eb' to an Jehová Yajl in, an tzwal 'ixtc 'a eb': A ticnec, 'oj wa'x 'och eyic', ax e pitzw paxi.

⁶ 'Oj wecx e cha e b'a, ax wa'n pitzwc 'och e chib'jal. 'Oj pitzwc pax 'och stz'umal e niwnal cha, ax wa'n pax 'och eyic' yic tzex pitzw paxi. 'Ixta to b'i'an, ax eyojcan 'eli to an Jehová in, to cojn in ton Dios in, xchi Dios, xa chi 'a eb', xchi 'ayin.

⁷ 'Ix waln 'a eb' 'icha xyutj yaln 'ayn cha, ax xwab'ni, 'ay jun tas 'ix c'an̈i, ticni to quixcab' jun cha, ax jun tzo'n̈ b'ac cha, xlaj schan pax sb'a eb'.

⁸ Ax xwilni, 'ay jun tzo'n̈ yanch'il jun tzo'n̈ b'ac chi cheln 'at 'a yib'an̈, cojn cha, 'ix pitzw 'och schib'jal eb', 'ix 'och pax stz'umal sniwnal eb' cha, palta mant 'a yic' eb'.

⁹ Xlajw cha, xyaln Jehová 'ayn 'ixtic: Ach 'anma', al 'ixtc 'a 'ic' 'ay 'a yolyib'n̈q'uinl tic. To an Jehová Yajl in, an tzwal 'ixtic: Ach 'ic' cotan̈, 'ochn̈ 'a jun tzo'n̈ niwnal milb'il cham tic yic tzpitzw pax eb', xchi Dios, xa chi 'a 'a, xchi 'ayin.

¹⁰ A yic xwaln 'a 'ic' 'icha xyutj Dios yaln 'ayn cha, 'ix 'och yic' eb' tacn̈ b'ac cha, 'ix pitzw pax eb', cojn cha, 'ix q'ue lin̈n eb' smasnil. Caw wal man̈x b'ischjb'enoc eb'.

¹¹ Xlajw cha, xyaln 'ayn 'ixtic: Ach 'anma', a jun tzo'n̈ tacn̈ b'ac 'ix 'el cha, tzyal cot yuj eb' et israelal, yujto tzlaj yal eb' 'ixtic: An̈ec tic, 'icha to tacjnacx qui b'aquil, man̈x 'a tas 'aych yipc qui c'ojol, lajwnacn̈ xo 'eli, xchi eb'.

¹² Yuj cha, al yab' eb' in chon̈ab', to an Jehová in, an tzwal 'a eb' 'ixtic: Ex in chon̈ab', 'icha to mucb'ilx 'a scal jun tzo'n̈ xo nacion̈, palta an 'oj ex in col 'elt 'a 'aj 'ayx 'ec' cha. 'Oj lajwc cha, ax ex wi'n pax meltzjoc 'a e chon̈ab'.

¹³ A yic 'oj ex in colnc 'elt cha, ax eyojcan 'el e masnil to an ton Jehová in, to cojn in ton Dios in.

¹⁴ An tzwala, to 'oj wa'x 'och Wespíritu 'ayex, 'icha to 'oj e pitzw paxi; ax wa'n e cajx e lum chi jun 'ejm xo. 'Ixta to b'i'an, ax eyojcan 'eli to a tas 'aj tzwa'cn in ti an Jehová in, yowlal tzwac' 'el'choc, xchi Dios.

Junxn̈ej x'aj Israel yet' Judá

¹⁵ 'Ix yaln pax Jehová 'ayn 'ixtic:

¹⁶ Ach 'anma', say chab'oc te te', ax a tz'ib'n eb' te'. A te b'ab'el, 'ixtc tzotj a tz'ib'ni: Te yic eb' yin̈tl Judá yet' eb' israel yitb'eym sb'a yet'oc, xchi. Ax te schab'il, 'ixtc pax tzotj a tz'ib'ni: Te yic yin̈tl Efraín, win yunnal José yet' eb' israel yitb'eym sb'a yet'oc, xchi junx cha.

¹⁷ Tzlajw cha, tza'n scha sb'a eb' te 'a yol a c'ab', junxn̈ej tzotj 'a yamn te'.

¹⁸ Ax yic 'oj sc'anb'n eb' et chon̈b' 'aych 'ixtic: Al 'ayon̈ tas tzyal 'el'ch jun tic, toto xchi eb',

¹⁹ tzaln 'a eb' 'ixtic: A Jehová 'ix aln 'ayin, to tzwij cot te te yic yin̈tl Efraín yet' eb' israel junn̈j yaj yet'oc, tzwa'n scha sb'a te yet' te yic eb' yin̈tl Judá sec junxn̈ej tz'aj te schab'l 'a yol in c'ab', xa chi 'a eb'.

²⁰ A chab' te te tza tz'ib'j cha, tzej chan̈ te schab'l yil eb' 'anma cha. Tzlajw cha, junxn̈ej tzotj a yamn te 'a yol a c'ab' yil eb'.

²¹ Tzlajw cha, tzaln 'a eb' 'ixtic: 'Ixtc wal xyutj Jehová Cajlil yaln 'ayex: Ex israel, an 'oj ex wi'x 'elt 'a scal jun tzo'n̈ nacion̈ 'aj c'ochnc ex; 'oj ex in molb'tzoc, ax ex wi'n 'at 'a e lum jun 'ejm xo.

²² Junxn̈ej nacion̈al 'oj ex wutc 'a jolmctac witz yic Israel, junxn̈ej e reyl 'oj eya'n cuenta. Man̈x chab'oc nacion̈al 'oj eyaji, palta to junxn̈ej.

²³ Man̈x 'oj 'och e mul eyaln e b'a 'a jun tzo'n̈ yechl comn dios, man̈x 'oj e b'o tas yajb'entac, man̈x 'oj e comn b'oc maysch'olnil. An xo 'oj ex in col-l 'a scal maysch'olnil cha, ax wi'n 'el e mul 'aych 'a eyib'an̈, 'oj eyochx in chon̈b'oc, ax wochx e Diosaloc.

²⁴ Ax jun yin̈tl in checb' David, a 'oj 'och e reyloc. A 'oj e tan̈wni e masnil, sec wach' 'oj eyutc eyiclni in checnb'il yet' in ley.

²⁵ 'Oj e cajx lum lum wa'jnac 'a win in checb' Jacob, atn lum 'aj 'e'nc cajn eb' e mam eyicham. A pax lum 'oj e cajx yet' eb' eyunnal yet' eb' eyin̈tl b'aq'uin̈, ax junc yin̈tl in checb' David, a 'oj 'och eyajloc 'a jun 'ejmn̈ej.

²⁶ 'Oj in b'o in trato eyet' 'a jun 'ejmn̈ej, ax e can 'a tzaljc'ojlal 'a jun lugar cha. 'Oj wac' q'uib' e b'isl 'a smasnil tiempo, ax wa'n b'ox watut 'aj 'oj waj cajn 'a e cal.

²⁷ 'Oj in can cajn 'a e cal, 'oj woch e Diosaloc, ax e yochx in chon̈b'oc.

²⁸ A yic 'oj can jun watut chi 'a e cal 'a jun 'ejmn̈ej, atta 'oj nachjoc 'el yuj jun tzo'n̈ xo nacion̈ to sic'b'ilx 'el wuj wico'oc, xchi Dios.