Ez 34 - Chuj San Sebastian Bible

Eb' yilmal chon̈b' Israel

¹ 'Ix yaln pax Jehová 'ayn 'ixtic:

² Ach 'anma', al 'a eb' yilmal chon̈b' Israel to an Jehová Yajl in, an tzwal 'a eb' 'ixtic: ¡'Ay, 'oltacx wal ex yilmal chon̈b' Israel! mun ax tze tan̈wj e b'a, man̈oc eb' chon̈b' tze tan̈wj 'icha stan̈wx no calnelu.

³ Ax tic, lajn ex 'icha eb' 'ilm calnelu maysch'olnil: Cojn yu'n eb' yim no calnelu cha, tzb'on eb' spichl yet' slanail no', tzlaj smilnc eb' schi no caw b'aq'uech, palta matz tan̈wj eb' no calnelu 'a 'icha stzolil.

⁴ Matz colwj eb' 'a no may yip, matz yil eb' no 'aych syab'il, matz yan̈tj eb' no lajwnac, yet' no wecchil. Matz sayc' eb' no tzsatcn 'ati, matz molb'tzej eb' no tzpuccn 'ati; a yic eb' ton̈j tzmac' eb' e no'.

⁵ A e no calnelu cha, ton̈j tzsatc' e no', yujto may yilmal e no', ax e no calte'al noc' tzchin e no'.

⁶ Ton̈j tzpucb't e no calnelu chi 'elc 'a jolmctac witz, tzlaj satcn 'at e no'. Toc 'ay mach tz'och 'il sayn 'ec' e no'. 'Icha eb' cha, 'ixta eyaj 'a eb' in chon̈ab'.

⁷ Yuj cha, ex 'icha 'ilm calnelu eyaj 'a in chon̈ab', 'ab'c wal tas tzwala:

⁸ An Jehová Yajl in, an tzwal 'ixtic: Eyu'uj lajn x'aj eb' in chon̈b' 'icha tzya' no calnelu tz'elc'x 'ati, ax no calte'al noc' tzlaj chinc no', yujto man̈x nanoc no yuj yilmal, mun xoj tztan̈wj sb'a eb' yilmal no chi sch'ocoj.

^9-10 Yuj cha, an Jehová Yajl in, an tzwal 'ixtic: Ax yilmal in chon̈b' eyaji, 'ab'tec tas tzwala: 'Oj wac' yowlal eb' in chon̈b' chi 'ayex; ax ex wi'n 'el 'a eyopiso, sec man̈x 'oj e tz'ac eyil in chon̈b' cha, yujto mun ax tze tan̈wj e b'a. 'Oj wi'cc eb' in chon̈b' 'a yol e c'ab', sec man̈x 'oj e wa 'a spatc eb'.

A jun 'ilm calnelu wach' snab'en

¹¹ An Jehová in, an tzwal 'ixtic: An wal 'oj in molb'tzoc pax eb' in chon̈b' tic, ax in tan̈wni eb'.

¹² 'Icha wal yoch junc 'ilm calnelu 'il yuj scalnelu satnc can 'ati, 'ixta woch 'il yuj eb' in chon̈ab'. 'Oj in molb'tzoc paxt eb' 'aj sactzicnac yajcn 'at cha, ax wi'n 'elt eb' 'a scal q'uic'q'uinl 'aj 'aycn 'ati.

¹³ An 'oj in molb'tzoc paxt eb' 'a scal jun tzo'n̈ nacion̈ 'aj sactzicnac yajcn 'at cha, ax wi'n 'at eb' jun 'ejm xo 'a sat slu'um. 'Oj c'ochx cajn eb' 'a lum jolmctac witz, ax laj yu'nc pax eb' a a 'a ch'olctac 'ay 'a yol smacb'en chon̈b' Israel, atn eb' lum 'aj cajn eb' chuc chon̈b'al.

¹⁴ 'Oj wi't eb' 'a lum lum caw 'ay syaxil sat, atn lum jolmctac witz wa'jnac 'a eb'. Ata 'oj wac' 'iljoc eb', ax wa'n tas caw wach' tzc'ux eb' ta'.

¹⁵ An Jehová Yajl in, an tzwala: To an 'oj in tan̈wc eb' in chon̈ab', ax wa'n 'iljoc eb' 'a sat slum cha.

¹⁶ 'Oj in sayc' eb' satnc can 'ati, ax in molb'tzan eb' sactzicnac yajcn 'at cha, 'oj wan̈tc eb' lajwnac, eb' wecchil, ax wa'n yip eb' may yip, palta 'oj in satl eb' yajl yaj 'a scal eb', atn eb' tzlaj 'ixtn eb' in chon̈ab'. Caw wach' 'oj wutc in tan̈wni eb' in chon̈b' cha.

^17-19 An Jehová in, an tzwala: A eb' in chon̈ab' lajn eb' 'icha no calnelu, mto 'icha no chiwo. A no chiwo cha, cojn tas wach' xlaj sc'uxu', ax tas xlaj yac' sobra, ton̈j xlaj stec' yet' yoc, xlaj yuc' a a caw wach', xlaj ste'cn tatb'oc eb' a yet' yoc cha. ¿Tom wach' tzc'ux no calnelu chi jun tzo'n̈ tas xlaj ste'cn 'ejm no chiwo cha? ¿tom wach' tzyu'j no calnelu chi a a ste'cn tatb'oc no chiwo cha?

²⁰ Yuj cha, an Jehová in, an tzwala: An 'oj in b'eyc'ojloc eb' yajl tz'ixtn eb' in chon̈ab'.

²¹ Ax yajl ex cha, tzlaj e tench e b'a 'a eb' 'emmquilal yeq'ui, najt tzc'ochcn eb' eyecn telwoc. 'Ay eb' tzlaj eyixtoc, tzlaj e pechn b'eyc'oc eb'.

²² Yuj cha, an 'oj in col eb' in chon̈b' chi 'ayex, man̈x 'oj in cha 'ixtxoc eb' eyu'uj, ax ex in b'eyc'ojlan junjn ex.

²³ An 'oj in sic' 'elt junc yilmal eb' in chon̈b' 'a scal eb' yin̈tl David, 'oj wac' yopiso stan̈wni eb' in chon̈b' 'icha tzyac' junc 'ilm calnelu.

²⁴ An Jehová in, an tzin 'och sDiosalc eb'; ax junc yin̈tl in checb' David, a 'oj 'och Yajlil 'a scal eb'.

²⁵ 'Oj in b'o jun in trato yet' eb', ax scan eb' 'a junc'ojlal wet'oc, ax wi'n 'el smasnil tas 'ay smay 'a sat lum lum tic, sec tzaljc'ojlal 'oj scajx eb' lu'um, ax sway eb' 'a junc'ojlal.

²⁶ 'Oj wac' in yaxilal 'a yib'n̈ eb' yic 'ayc' eb' 'a lum tzaln yic 'emmquilal, ax wa'n cot n̈ab' 'a sat lum lum chi 'a 'icha stiempoal.

²⁷ 'Oj ya'x te 'awb'ente sat, til wal sb'al lum lum chi 'oj yac'a', caw junc'ojlal 'oj can eb' 'anma chi 'a sat lu'um. A yic 'oj in coln 'elt eb' 'a yol sc'ab' eb' 'aj 'aych mosoal cha, 'aj to man̈ yico'oc sb'a eb', ax yojcan 'el eb' to an Jehová in, an tzin col eb'.

²⁸ A jun tzo'n̈ nacion̈ cha, man̈x b'a'n̈ 'oj yixtc eb' in chon̈b' tic, man̈x 'a pax no calte'al noc' 'oj chinc eb', junc'ojlal 'oj can eb' 'a sat slu'um, man̈x 'a tas 'oj xib'tn eb'.

²⁹ An 'oj wac' yaxb'oc sat lum slum eb' cha, sec man̈x b'a'n̈ tz'ixtx eb' yuj wejel, ax yactn eb' nacion̈ chi sb'uchn eb'.

³⁰ Atta 'oj yojcoc 'el eb', to an Jehová in, sDiosal in eb', cajn in 'ec' 'a scal eb', in chon̈b' pax eb', atn eb' yin̈tl can Israel.

³¹ A eb' in chon̈b' tic, eb' 'icha 'in calnelu yaji, tan̈b'il eb' wu'uj, wach' 'aj tzwac' wa eb', yujto sDiosal in eb'. An Jehová Yajl in, an tzwala, xchi Dios.