Ez 31 - Chuj San Sebastian Bible

Lajn faraón 'icha junc te c'ute'

¹ A 'a b'ab'l c'u yoch yoxl 'uj yic yuxlchil ab'il qui jaw 'icha presoal, 'ix yaln Jehová 'ayn 'ixtic:

² Ach 'anma', al 'ixtc 'a win faraón yet' 'a smasnil eb' soldado winac: ¿Mach wal junc tztac' qui lajb'tzan a b'inab'ilal yet'oc?

³ 'Oj ach in lajb'tzoc yet' junc te c'ute 'a Líbano. A te te cha, caw wach' yilx sc'ab' te', tzlaj yac' te yen̈l 'a eb' te yit tel 'a stz'ey cha, caw niwquil 'ajnc ste'il, 'ec'b'al stel 'a yib'n̈ jun tzo'n̈ xo te te cha.

⁴ Caw wach' sq'uib' te yuj n̈ab' yet' pax yuj yalil sat lum lum cha. Til wal a a tzpac' q'uet 'a yich te', ax a a chi tzlaj 'a'nc yaxb'oc jun tzo'n̈ xo te te 'a stz'ey cha.

⁵ Yujto caw 'ay a a chi 'a stz'ey te', yuj cha, caw niwquil x'aj stel te', 'ec'b'al x'aj stel te 'a yib'n̈ jun tzo'n̈ xo yit te'al; 'ix q'uib' eb' te sc'ab' cha, 'ix 'el wal jen̈n te'.

⁶ A smasnil no ch'ic, tzlaj c'och junjn c'aj no sb'o so 'a scal sc'ab' te', ax e no calte'al noc', tzlaj 'alj yune e no 'a yich te', til wal nacion̈ tztac' scan cajn 'a yen̈l te cha.

⁷ A jun te cha, 'ix q'uib'i, caw niwquil x'aj yet' sc'ab', yujto 'aych sch'an̈lyib' 'a 'aj tzb'ey eb' a a cha.

⁸ May junc te c'ute 'a scal yawb'ente Dios tztac' slajb'tzan sb'a yet'oc; may junc te taj lajn tz'aj sc'ab' yet' sc'ab' cha, may pax junc te castaño lajn xil yet'oc, may xon wal junc te te chi lajn swach'l yilx 'icha jun te cha.

⁹ A Dios xb'on jun te cha, man̈x jantcoc swach'l yilx yet' sc'ab'; ax eb' te 'awb'ente yic Dios 'a lum Edén, caw tzchichn 'och eb' te 'a 'a.

¹⁰ Yuj cha, a Jehová Cajlil a tzaln 'ixtic: Caw cob' niwquil x'aj sq'uib' stel jun te cha, 'ix 'ec' stel 'a jun tzo'n̈ xo yit te'al. Yujto niwquil x'aj ste'il, yuj cha, caw b'an̈quintac xyutj sb'a.

¹¹ Yuj sb'an̈quintacl cha, 'ix in satn 'eli; xwa'ch 'a yol sc'ab' jun win yajl chuc schon̈ab', ax win 'ix satn 'el 'a 'icha smoj tz'aj yuj smaysch'olnilal.

¹² A eb' 'anma caw tu 'a jun tzo'n̈ xo nacion̈, a eb' xwul ch'acnoc 'ejm lan̈njoc. C'uxn 'ix wecchj te sc'ab' chi yem 'a lum jolmctac witz, 'a lum pan̈ctac, 'a lum ch'olan, ton̈j sch'ac eb' jun te cha, 'ix cann̈j 'a yet'l cha. Ax eb' 'anma 'ayc' 'a yaln̈ yen̈l te cha, 'ix 'at eb' 'elc smasnil.

¹³ Smasnil junjn c'aj no ch'ic, 'ix can cajn e no 'a sc'ab' te te telwnac cha, smasnil no calte'al noc', xlaj can cajn e no ta'.

¹⁴ Man̈x 'a junc te te 'oj q'uib' 'icha jun tic, smasnil eb' te tzq'uib' 'a sti eb' a a cha, wach'xam 'aych yalil eb' te', palta man̈x 'a junc te 'oj 'ec' stel 'a eb' te yit tel cha. Smasnil eb' yajl 'a yolyib'n̈q'uinl to lajn snab'en 'icha jun te tic, 'ayx 'och chaml 'a yib'n̈ eb'. 'Oj cham eb' 'icha tz'aj scham eb' comn 'anma', ax s'atcn eb' 'a campusan.

¹⁵ An Jehová Yajl in, an tzwala: A yic xc'och jun te niwquil te chi 'a 'aj 'ay yet'l eb' chamnc cha, 'ix tacj chan̈ eb' a a 'ay 'a yol lum yuj cusc'ojlal, 'ix 'och wan sb'ey eb' a niwc a', 'ix wa'n cus eb' lum jolmctac witz yic Líbano, ax smasnil eb' te te', 'ix tacj chan̈ eb' te'.

¹⁶ A yic xc'an̈ yem lan̈njoc cha, caw 'ix xiw jun tzo'n̈ nacion̈ yab'ni, ax yic 'ix 'emch 'a 'aj 'ay yet'l eb' chamnac, ax eb' chamnc chi 'ayc' ta', 'ix yij eb' sniwnal sc'ojol, atn eb' lajn yet' eb' te 'awb'ente 'ay 'a Edén yet' eb' te yic Líbano.

¹⁷ An̈jtona', a eb' cob' cajn 'ec' 'a yaln̈ yen̈l jun te cha, eb' cob' xcolwj yet'oc, 'ix c'och pax eb' 'aj 'ay eb' chamnc cha, junxn̈ej 'ix 'aj eb' yet' eb' chamnc yuj owal.

¹⁸ May xon wal junc eb' te 'awb'ente yic Edén tztac' slajb'tzax yet' jun te tic. A jun te tic, caw wach' yilxi, caw niwquil pax ste'il, palta 'ix c'och pax 'a 'aj 'ay yet'l eb' chamnac. Junn̈j 'ix can yet' eb' te te yic Edén 'ayc' ta'. A tzyal 'el'ch jun tic, atn eb' 'anma matz ya'ch sc'ojl 'a Dios, eb' chamnc yuj owal. A yab'xil jun te tzwal tic, tzyal 'el'chi atn win faraón yet' eb' soldado, xchi Dios.