Ez 28 - Chuj San Sebastian Bible

A tas tzalx 'a yib'n̈ sreyl Tiro

¹ 'Ix yaln pax Jehová 'ayn 'ixtic:

² Ach 'anma', al jun tzo'n̈ tic yab' win sreyl Tiro: To an Jehová Yajl in, an tzwal 'ixtic: Caw wal tzcob' a b'an̈ a b'a yet' a nab'en, tzaln 'ixtic: An tic dios in, 'ay wopiso 'a yib'n̈ a mar tic, an tzwac' yajlil 'a eb' chon̈b' tic 'icha junc dios, xcob' a chioc. Palta 'anma achn̈ej, man̈ ach diosoc, wach'xam tzcob' a na'a to jeln ach 'a yib'n̈ junc dios, palta may tas tztac' o'oj.

³ ¿Tom jeln ach to 'a yib'n̈ Daniel a nani? ¿Tom ojc junc tas c'ultac yaji?

⁴ A yuj cob' a jelnal cha, yet' yuj a nab'en, xa molb'tzan smasnil a ricoal, til wal q'uen oro yet' q'uen plata xa mol 'a yol a caxa.

⁵ Yuj sjelnal a nab'en 'a yib'n̈ chon̈, yuj cha, ach 'och ricoal, ax a ricoal chi tzach 'a'n 'och b'an̈quinal.

⁶ Yuj jun a nab'en cha, tzwaln an Jehová Yajl in 'ixtic: Tzcob' a na yet' a nab'en to lajn ach wet'oc.

⁷ Yuj cha, 'oj wi' cot eb' chuc chon̈b'al 'ayach, atn eb' may xon sniwnc'ojlal. 'Oj yic' q'uet eb' yespada yic tzach stzu'n eb', ax satn 'el eb' a b'inab'ilal yet' smasnil tas wach' yilx 'ix 'ilchj oj yuj sjelnal a nab'en.

⁸ 'Oj ach smil eb' may sniwnc'ojlal cha, ax ach sjuln can 'at eb' 'a xab'l yich a mar.

⁹ ¿Tom 'oj stac' aln to 'a sat eb' tzach miln cha, to dios ach? Ach tic man̈ ach diosoc, 'anma achn̈ej, toc 'ayt el'ch 'a sat eb' tzach miln cha.

¹⁰ An Jehová in, an tzwala to yol sc'ab' eb' chuc chon̈b'al 'aj 'oj a chami, 'icha tz'aj scham eb' 'anma tu sb'eyb'al, xchi Dios, xa chi 'a win sreyl Tiro cha, xchi 'ayin.

B'it yuj schamlil win sreyl Tiro

¹¹ 'Ix yaln Jehová 'ayn 'ixtic:

¹² Ach 'anma', b'itnej junc b'it yic chaml tic 'a yib'n̈ win sreyl Tiro, to an Jehová in, an tzwal 'ixtic: Ach tic, caw wal jeln ach, caw 'ay a nab'en, caw wach' pax elxi.

¹³ A 'a scal te 'awb'ente 'a Edén, ata 'e'nc ach cajan, ax jun tzo'n̈ q'uen wach' yilxi, a eb' 'aych yelwnub'loc a pichul, atn eb' q'uen tic: Q'uen rubí, q'uen crisólito, q'uen jade, q'uen topacio, q'uen cornalina, q'uen jaspe, q'uen zafiro, q'uen granate yet' q'uen esmeralda. Ax tas yamjnac jun tzo'n̈ q'uen cha, nab'a oro. A jun tzo'n̈ tic lista xon yaj eb' yictax ach in b'on cani.

¹⁴ Ach querube, an wa'jnacch 'och 'a opiso stan̈malc jun lum tzaln to wicn̈ej yaji, ax 'a scal jun tzo'n̈ q'uen q'uen tzictzni yilxi, ata ach b'eyq'ui.

¹⁵ Yictax a pitzw cha'an̈, caw wach'n̈j 'a b'eyb'al masnto 'ix jelmj a nab'en yuj maysch'olnil.

¹⁶ Yujto caw xniwtj a chon̈, yuj cha, 'ix niwtj 'och pax maysch'olnil 'ayach, 'ix a'n 'och a mul. Atn yuj cha, ach wi'n 'el 'a wojltac, xwi'n 'ec' opiso yic tan̈wjumal cha. Ach wa'n pechxoc 'el 'a lum tzaln yic 'emmquilal, yet' 'a scal eb' q'uen q'uen tzictzni yilx cha.

¹⁷ Yuj wal swach'l elxi, yuj cha, xa b'an̈n a b'a, yuj pax snib'jub'tacl elx cha, yuj cha, 'ix 'ixtx 'el a jelnal. An wal ach in jul 'ejm 'a sat lu'um, yic ach wa'n 'och ch'oxnb'ilal 'a eb' rey.

¹⁸ Til wal 'anma xextj yet' tas xlaj a mana, yet' pax tas xlaj a chon̈o, xextn 'el pax jun tzo'n̈ yet'l a diosal. Yuj cha, 'ix wa'n 'elt jun c'ac' tzach 'a'n tz'a'oc, cojxn a tan̈il tzyil eb' 'anma 'a sat lu'um.

¹⁹ Ax smasnil mach 'ojtnac ach, caw tzxiw chan̈ eb' ach yilni, 'ay xoj smay elxi. Yuj cha, man̈x 'a b'a'n̈ 'oj a checlj pax chan̈ ach sreyl Tiro, xchi Dios, xa chi 'a 'a, xchi Dios 'ayin.

A tas tzalx 'a yib'n̈ Sidón

²⁰ 'Ix yaln pax Jehová 'ayn 'ixtic:

²¹ Ach 'anma', 'ixc q'ueln 'a yib'n̈ chon̈b' Sidón, tzaln 'el can jun tzo'n̈ paxti tic 'a yib'an̈.

²² Al 'ixtc 'a 'a: To an Jehová in, an tzwal 'ixtic: An tzwal 'aych ach Sidón to tzin 'och 'ajc'ojlal 'ayach. O'oj ax in yi'n chan̈ jun tzo'n̈ xo chon̈b' yuj tas 'oj ach wutoc, ax yojcan 'el eb' to an ton Jehová in, to cojn in ton Dios in, a yic 'oj in b'eyc'ojlanc eb', ax scheclj chan̈ in poder 'a scal eb'.

²³ 'Oj wa' cot yab'il 'a yib'n̈ eb' 'anma', ax sb'ey chic' 'a yol caye. Til wal 'aj 'oj cot eb' 'a'm owl cha, ax scham eb' 'anma chi smasnil. 'Ixta to b'i'an, ax yojcan 'el eb' to an ton Jehová in.

²⁴ Man̈x 'oj yab' eb' yin̈tl Israel syail yuj eb' nacion̈ 'a sla'nil cha, atn eb' 'icha q'uix yajch 'a eb' yuj schichnc'ojlal. 'Ixta to b'i'an ax yojcan 'el eb' to an Jehová Yajl in, xchi Dios, xa chi 'a 'a.

²⁵ An Jehová in, an tzwal 'ixtic: 'Oj in molb'tzoc cot pax eb' israel sactzicnac yajcn 'at 'a jun tzo'n̈ xo nacion̈, ax in ch'oxn in wach'c'ojlal 'a eb' 'a sat jun tzo'n̈ nacion̈ cha. A eb' israel cha, 'oj scajx eb' slum chi jun 'ejm xo, atn lum wa'jnac 'a win in checb' Jacob.

²⁶ Caw tzaljc'ojlal 'oj canx eb' 'a yol schon̈ab', may tas 'oj sna eb'. 'Oj sb'ox chan̈ eb' yatut, ax laj ya'nc pax 'ejm eb' yawb'ente'. An 'oj wa'ch syailal smasnil eb' tzchichn 'och 'a eb', ax yojcan 'el eb' to an Jehová in, sDiosal in eb', xchi 'ayin.