Ez 27 - Chuj San Sebastian Bible

B'it yuj satnb'ilal 'el Tiro

¹ 'Ix yaln pax Jehová 'ayn 'ixtic:

² Ach 'anma', b'itnej jun b'it tic 'ixtc 'a yib'n̈ chon̈b' Tiro.

³ A jun chon̈b' cha, atn jun 'ay 'a sti a mar, jun 'aj wach' sjaw chon̈ yic jun tzo'n̈ xo nacion̈ 'ay 'a sti a mar cha. Al 'a 'a, to an Jehová in, an tzwal 'a 'ixtic: Ach Tiro, caw wal tzcob' a b'a'n̈ a b'a, yujto caw cob' wach' elxi.

⁴ At 'a spacl a mar tzc'och a mon̈jon, ax eb' 'anma', caw wal nib'jub'tac xyutj eb' sb'on a barco.

⁵ Smasnil stel 'ix 'ochi, atn te 'a'nte taj 'ix cot 'a lum jolm witz Senir, ax 'a Líbano xcot te c'ute x'och yoyloc ma'lab' 'ic'.

⁶ A te sma'lab'il a yic te barco cha, 'ix b'o te 'a te mach' 'ix cot 'a lum Basán; ax te q'uisis xcot 'a Chipre, a te x'och smacloc eb' te barco cha. A q'uen marfil, a 'aych pax yelwnub'loc.

⁷ A mantiado 'ay q'ue sma'lab'ilc 'ic', linon̈ej smasnil, a 'aych pax sbanderailc eb' te barco cha. Wach' yajch yelwnub'l sti', yujto ata b'ob'il 'a Egipto. Ax te nip 'ay q'ue yen̈loc eb' 'anma cha, nan̈l q'uic'mucnac, nan̈l pax chac yilxi, ata b'ob'il cot 'a chon̈b' Elisa.

⁸ A eb' winc tzma'n b'ey te barco chi yet' sma'lab'il cha, ata cajn eb' 'a chon̈b' Sidón yet' 'a chon̈b' Arvad, ax eb' ch'umn barco, atn eb' winc caw jeln 'ay 'a yol a chon̈ab'.

⁹ A eb' 'ichmtac winc 'aj Gebal, ajun eb' yet' eb' 'aj barco cha, toto 'ay tas tzjuw 'a junc barco cha, ax eb' 'ichmtac winc chi tzb'on pax muc'uc, yujto caw jeln eb'. Til wal eb' 'anma chi tzc'och manwjoc mto chon̈wjoc 'a jun chon̈b' cha.

¹⁰ Ax eb' 'aj Persia, eb' 'aj Lidia yet' eb' 'aj Libia, a eb' 'aych 'a soldadooc, a eb' tzach coln 'a owal. Tzolmtac yajch locn sq'uen xumpiln eb', yet' syamc'ab' eb' tzmacn sat jul-lab' yic owl 'a smuroal a chon̈ab'. Atn jun tzo'n̈ chi 'aych yelwnub'loc.

¹¹ A eb' winc 'aj Arvad, junn̈j xyutj sb'a eb' yet' eb' a soldado. 'Ix q'ue ch'ucn eb' 'a yib'n̈ a chon̈ab'. C'uxn 'ix yoy eb' jun muro chi smasnil. Ax eb' 'aj Gamad, a eb' xtan̈wni jun tzo'n̈ a torre. Xlaj slocnc 'och eb' jun tzo'n̈ smacl jul-lab' 'a sat jun muro cha, a chi x'och yelwnub'loc.

¹² Til wal tas 'ay 'ayach, yuj cha, a eb' 'aj Tarsis tzwulc' eb' manwjoc 'ayach, ax q'uen plata, q'uen hierro, q'uen estaño yet' q'uen plomo, a chi tzya'cn eb' stojloc tas tzmana.

¹³ An̈jtona eb' 'aj Grecia, eb' 'aj Tubal yet' eb' 'aj Mesec, tzwulc' eb' manwjoc 'ayach. Ax eb' meb'a 'anma', a jun tzo'n̈ yamc'ab' nab'a bronce, a chi tzya'cn eb' stojloc tas tzman cha.

¹⁴ A eb' 'aj Bet-togarma, tzwulc' eb' manwjoc 'ayach, ax no cawyu chej tzc'anx 'a owal, mto no mula yic 'icatz, a no tzya'cn eb' stojloc tas tzmana.

¹⁵ A eb' 'aj Rodas yet' eb' cajn 'a jun tzo'n̈ xo chon̈b' 'ay 'a sti a mar, tzwulc' eb' manwjoc 'ayach, ax q'uen marfil yet' ébano, a tzya'cn eb' stojloc tas tzman cha.

¹⁶ A eb' 'aj Edom, til wal tas tzwul sman eb' 'ayach: A tas tzya'cn eb' stojloc, atn q'uen granate, te nip jalb'il 'a te ch'al púrpura, te yelwnub'l pichul, te nip jalb'il 'a te lino ch'al, q'uen coral yet' q'uen rubí tz'och ton̈al.

¹⁷ 'Ixta pax eb' 'aj Judá yet' eb' israel, tzwulc' pax eb' manwjoc 'ayach. A tas tzya'cn eb' stojloc tas tzman cha, atn 'ixm trigo tz'el 'a Minit, 'ixm pan pastel, no yal chab', aceite yet' jun tzo'n̈ bálsamo.

¹⁸ Ax eb' 'aj Damasco, caw niwn tas tzwul sman eb' 'ayach. A tas tzya'cn eb' stojloc, atn jun tzo'n̈ yal uva tzb'o 'a chon̈b' Helbón, yet' pax jun tzo'n̈ laná tzcot 'a Sahar.

¹⁹ An̈jtona eb' 'aj Dan yet' eb' 'aj Javán 'a yol yic Uzal, tzwulc' eb' manwjoc 'ayach. A tas tzya'cn eb' stojloc tas tzman cha, atn q'uen hierro wach' yaj sb'o'i, te yalil mirra yet' te canela.

²⁰ At 'a Debán, atta tzyij cot eb' jun tzo'n̈ posmtac tzq'ue 'a sat no xila tz'u'um.

²¹ A smasnil eb' yajl yaj 'a chon̈b' Arabia yet' 'a chon̈b' Cedar, a tas xyac' eb' stojloc tas sman cha, atn no quelm calnelu, no mam calnelu yet' no mam chiwo.

²² Tzwulc' pax eb' 'aj Sabá yet' eb' 'aj Raama chon̈wjoc 'ayach. Tzmanwj pax eb', ax tas tzya'cn eb' stojloc tas tzman cha, atn jun tzo'n̈ perjuma caw wach', eb' q'uen q'uen wach' yilxi, yet' pax q'uen oro.

²³ A eb' 'aj Harán, eb' 'aj Cane, eb' 'aj Edén, eb' 'aj Sabá, eb' 'aj Asiria yet' smasnil eb' cajn 'a Media, tzchon̈wj eb', tzmanwj pax eb' 'ayach.

²⁴ Tzwulc' eb' schon̈ jun tzo'n̈ pichl caw wach' yilxi, te nip b'ob'il 'a te ch'al púrpura, te yelwnub'l pichul, an̈jtona yet' jun tzo'n̈ ch'al ch'umb'il 'och yip 'aj tzb'o 'elt alfombra.

²⁵ A eb' te niwc barco yic Tarsis, a eb' te tz'i'n cot chon̈, tzyi'n pax 'at eb' te'. Ach chon̈b' Tiro, lajn ach wal 'icha junc te barco caw 'al yaj yet' yicatz, 'ayc' 'a snan̈l a mar.

²⁶ A eb' tzach 'i'n b'ey 'a yib'n̈ a cha, caw najt tzach yij 'at eb' 'a yib'n̈ a mar, ax 'ic' tzcot 'a stojlal 'aj tzq'uel c'u, a 'oj a ma'n b'uychjoc 'a yib'n̈ a'.

²⁷ A yic 'oj a satl cha, a 'a ricoal yet' smasnil chon̈ 'ayc' 'ayach, 'oj atcn 'a yich a mar, yet' eb' tz'i'n b'ey te barco cha, eb' tzch'umni, eb' nipn barco, eb' chon̈wjum, eb' a soldado yet' smasnil eb' ton̈j 'ayc' et'oc.

²⁸ A yic 'oj 'el yaw s'atcn eb' munljum chi 'a yich a', ax eb' 'anma cajn 'a stitc a cha, caw 'oj xiw chan̈ eb' yab'n yel yaw eb'.

²⁹ A eb' tzma'n b'ey jun tzo'n̈ xo te barco, yet' eb' tzch'umn te', 'oj 'eltoc eb' 'a yol sbarco cha, ax yel-l eb' 'a sti a chi 'aj tacn̈ lu'um.

³⁰ Ax syamn 'och eb' yoc' o'oj, 'oj 'ab'xoc yoc' eb' 'a najat, caw ji'jmtac 'oj 'oc' eb', ax ya'n q'ue eb' pococ 'a sjolom, 'oj b'alb'noc 'ec' eb' 'a scal stan̈il c'ac'.

³¹ 'Oj sjoxl eb' xil sjolm, ax ya'n 'och eb' spichl n̈achtac yuj cusc'ojlal, caw wal 'oj 'oc' eb' si'mb'il o'oj.

³² Ax sb'itnan eb' jun b'it yic cusc'ojlal oj 'ixtic: ¿Toc 'ay junc xo chon̈b' 'ix satl 'a snan̈l a mar 'icha 'ix 'aj satl Tiro?

³³ A yic mantzac lajw 'el Tiro, xlaj yi'nc 'at te barco smasnil chon̈ 'ay 'a 'a, caw wal stzalj jun tzo'n̈ xo chon̈b' smanni. Ax eb' rey 'a jun tzo'n̈ xo nacion̈, caw 'ix 'och eb' ricoal yuj tas 'ay 'a jun chon̈b' cha.

³⁴ A yic xlajw 'el yuj a mar cha, c'uxn 'ix 'atcn smasnil chon̈ 'a yich a', yet' smasnil eb' munljum, c'uxn xlajw 'el eb' yet'oc.

³⁵ Smasnil eb' 'anma cajn 'a sti a mar, caw tzxiw eb' yab'n yab'xil, ax eb' rey 'a junjn chon̈ab', caw tzxiw chan̈ eb', checl yilx sat eb' yuj xiwlal.

³⁶ A smasnil eb' chon̈wjum tzcot 'a jun tzo'n̈ xo nacion̈, caw tzsat sc'ojl eb' yilni. Caw wal 'ay smay yilx x'aj slajw 'el 'a jun 'ejmn̈ej, 'oj schic eb', xchi Dios.