Ez 26 - Chuj San Sebastian Bible

A tas tzalx 'el 'a yib'n̈ Tiro

¹ A 'a b'ab'l c'u yoch 'uj yic yuxlchil ab'il quijx cot 'icha presoal, ata 'ix yal Jehová 'ayn 'ixtic:

² Ach 'anma', a eb' 'aj Tiro, 'ix yal eb' 'ixtc 'a yib'n̈ chon̈b' Jerusalén: ¡A Jerusalén tox 'ix lajw 'ejmi! A 'a yic yalan̈, sb'e eb' chon̈wjum yaji, ata tztojcn eb' yic tz'ec' eb' yet' schon̈ cha, ax ticnec, tox xlajw 'ejm jun chon̈b' cha, yuj cha libre xo que'c ticnec yet' qui chon̈, 'oj cochc wal ricoal, xchi eb'.

³ Yuj cha, an Jehová Yajl in, an tzwal 'ixtic: Ach Tiro, a ticnec tox in 'och 'ajc'ojlal 'ayach. An tzwala ax yoch pax jun tzo'n̈ xo nacion̈ 'ajc'ojlal 'ayach, 'oj cot eb' 'aych 'icha sq'ue wan b'alb'noc yib'n̈ a mar yuj 'ic'.

⁴ 'Oj smac' 'ejm eb' 'anma chi smuroal a chon̈ab', ax sma'n lan̈chjoc eb' jun tzo'n̈ a torre. 'Oj lajwc cha, ax wa'n mesxoc 'el spococal, t'anmtac 'oj 'ajoc, 'icha yilx junc niwquil q'uen n̈el-li sat.

⁵ 'Oj can sjech'l jun chon̈b' chi 'a snan̈l a mar. Ata 'oj tacjoc schim eb' yamn chay. An tzwala to 'oj 'ijxoc 'ec' smasnil tas 'ay 'aych yuj jun tzo'n̈ xo nacion̈.

⁶ Ax eb' 'anma cajn 'a jun tzo'n̈ aldea 'ay 'a sti a mar cha, 'oj satl eb' smasnil yuj owal, sec 'oj yojcoc 'el eb', to an Jehová in.

⁷ An Jehová Yajl in, an tzwala: 'Oj wi' cot win Nabucodonosor 'a stojlal 'aj tzq'uel c'u, atn win sreyl Babilonia, win yel xo jeln 'a yib'n̈ jun tzo'n̈ xo eb' rey. 'Oj jawc win yac' owl et'oc. 'Oj yi' cot scaruaje, schej yet' pax smasnil eb' soldado winac.

⁸ 'Oj smil win smasnil 'anma 'ay 'a jun tzo'n̈ aldea 'ay 'a sti a mar; ax yoyn 'och win jun niwquil muro 'a spatc 'el chon̈ab'. 'Oj lajwc cha, ax sb'on win sb'achte'al 'aj 'oj 'ochoc, yic 'oj ya'nc owl cha, ax eb' soldado win smasnil, yet'n̈j eb' syamc'ab' tzmacn sat jul-lab'.

⁹ 'Oj sma' poj eb' smuroal jun chon̈b' chi yet' te niwc yib'te 'aych q'uen 'a sn̈i', ax sma'n 'ejm eb' jun tzo'n̈ torre yet' niwc almáguina.

¹⁰ Til wal no chej ajun yet' win rey cha, yuj cha, caw 'oj mucchjoc 'el jun chon̈b' chi yuj lum pococ 'oj ste' chan̈ no'. A yic 'oj 'och win sreyl Babilonia chi 'a spuertail chon̈ab' 'icha xoj yoch 'a yojl junc chon̈b' to jacwnacx smuroal. Tz'ib'x lum sb'ey setetal scaruaje winac, tz'ib'x pax smuroal jun chon̈b' cha.

¹¹ 'Oj stec' juwc no chej chi yoltc caye, ax stzu'x cham smasnil 'anma yet' espada. 'Oj ma'xoc 'ejm jun tzo'n̈ niwc 'oy 'aych yipnub'alc chon̈b' cha.

¹² Jantcn̈ej chon̈ 'ay 'a jun chon̈b' cha, c'uxn 'oj 'el'xoc 'ati, man̈x 'a tas 'oj canoc. 'Oj ma'x 'ejm smuroal, ax spoj 'ejm smasnil te n̈a wach' yilxi; ax q'uen q'ue'en, yet' ste'al, yet' pax lum lu'um, c'uxn 'oj xutxc can 'at 'a yojl a mar.

¹³ 'Ixta 'oj wutc in satn 'el jun tzo'n̈ sb'it eb' 'anma', man̈x 'a 'aj 'oj 'ab'xoc yoch b'it yet' arpa.

¹⁴ T'anmtac 'oj 'ajcn jun chon̈b' cha, lajn wal 'oj wutc can 'icha q'uen sam q'uen n̈el-li sat, man̈xtzac q'uib' sc'ultcal, ata 'oj yac' tacjoc eb' yamn chay schim, man̈x 'a b'a'n̈ 'oj b'o jun 'ejm xo.

¹⁵ An Jehová Yajl in, an tzwal 'ixtc 'a yib'n̈ Tiro: A eb' 'anma cajn 'a sti a mar, caw 'oj xiw eb' yab'n yel yaw slajw 'el eb' 'anma 'a chon̈b' Tiro, til wal eb' 'oj chamoc, 'ay pax eb' ton̈j 'oj lajwc cani.

¹⁶ Yuj cha, smasnil eb' rey cajn 'a sti a mar 'oj yactc can eb' sdespacho, ax yi'n 'el eb' spotil yet' jun tzo'n̈ spichl caw wach' yajch yelwnub'al, yet' wal xiwc'ojlal eb', ax yem wocn eb' 'a sat lu'um. 'A junjn rato, ax yib'x eb' yuj xiwlal, yujto tzyil eb' tas 'oj 'aj jun chon̈b' cha.

¹⁷ 'Oj sb'o eb' jun sb'it yic chamel, ax yaln eb' 'ixtic: Ach Tiro tas ach 'aj a lajw 'ejmi, ach sat 'ejm 'a et'l 'a sti a mar, caw wal b'inab'il ach, caw jeln eb' 'anma chi smasnil, caw tzxiw jun tzo'n̈ xo eb' chon̈b' cajn 'a sti a mar cha.

¹⁸ Ax ticnec, a jun tzo'n̈ chon̈b' 'ay 'a snan̈l a mar, caw wal tz'och eb' 'a xiwc'ojlal o'oj, yujto tzyil eb' tas tzach 'aji, caw wal tzxib'tj sb'a' eb' o'oj, 'oj xchic eb' 'a sb'it cha.

¹⁹ An Jehová Yajl in, an tzwal 'ixtic: 'Oj in satl jun chon̈b' cha, sictac 'oj 'ajcni, 'icha junc chon̈b' 'aj may xon mach cajjnac. 'Oj wac' pultz'joc cot a a chi 'a yib'an̈, ax smucchj can 'at 'a yich a'.

²⁰ 'Oj in julcn 'ejm 'aj 'ayc' eb' 'anma chamnc 'a pecti'. 'Oj in julcn 'ejm 'a xab'l yich lum lu'um, 'icha 'ajnc jun tzo'n̈ xo chon̈b' satnc 'el 'a jun 'ejmn̈ej. Man̈x 'a b'a'n̈ 'oj 'ochx chon̈b'al, man̈x 'a xon eb' 'anma 'oj cajnoc.

²¹ 'Oj lajwc can 'ejm 'a jun 'ejmn̈ej, 'ay xo smay yilx 'oj 'ajcn yuj owal. 'Ayt eb' 'anma 'oj cob' saync 'ec' 'aj 'ay, palta man̈x 'oj 'ilchjoc yuj eb'. An tzwala, xchi Dios 'ayin.