Ez 25 - Chuj San Sebastian Bible

A tas tzalx 'a yib'n̈ eb' amonita

¹ 'Ix yaln pax Jehová 'ayn 'ixtic:

² Ach 'anma', meltzjan̈ 'at q'ueln 'a yib'n̈ schon̈b' eb' amonita, tzaln can 'el jun tzo'n̈ paxti tic 'a yib'n̈ eb'.

³ Al yab' eb' to an Jehová Yajl in, an tzwal 'ixtic: Ax tic, ton̈j xeya'l eyaw, ex tzewji yic xjuw 'ejm watut, yic 'ix 'ixtx 'el chon̈b' Israel, atn yic 'ix 'ijx'at eb' yin̈tl Judá 'a 'icha presoal.

⁴ Yuj cha, 'oj ex wac' 'a yol sc'ab' eb' 'anma 'oj cot 'a stojlal 'aj tzq'uel c'u. 'Oj yico'oc eb' e lu'um, ax sb'on eb' scamplamento yet' yatut 'a e lum cha. 'Oj smol chan̈ eb' sat smasnil eyawb'ente', a 'oj sc'ux eb', ax yu'n eb' e lech tzyac' e chiwo.

⁵ A chon̈b' Rabá, swalab' e no cameyo xoj 'oj 'ajoc, ax chon̈b' Amón, swalab' calnelu 'oj 'ajoc, sec 'oj eyojcoc 'eli, to an Jehová in, an 'ixta tzex wutej.

⁶ An tzwal 'ixtic: Ax tic, caw e po'jnac e c'ab', e te'n wal 'ejm eyoc, caw tzaljnac ex yic slajw 'el chon̈b' Israel.

⁷ Yuj cha, 'oj wi' chan̈ in c'ab', ax wa'n 'och eyailal. 'Oj ex wac' 'a yol sc'ab' jun tzo'n̈ xo nacion̈, sec 'oj 'ijxoc 'ec' smasnil tas 'ay 'ayx yuj eb'. Ax ex in satn 'el 'a scal jun tzo'n̈ xo chon̈ab', 'oj e lajw 'el 'a jun 'ejmn̈ej, sec 'oj eyojcoc 'eli, to an Jehová in, an 'ixta tzex wutej.

A tas tzalx 'a yib'n̈ Moab

⁸ An Jehová Yajl in, an tzwal 'ixtic: A eb' 'aj Moab yet' eb' 'aj Seir, tzyal eb' to a eb' 'aj Judá, lajn eb' yet' jun tzo'n̈ xo nacion̈.

⁹ Yuj cha, 'oj in jac jun b'e 'a smon̈jonal Moab, ax slajw 'el jun tzo'n̈ chon̈b' caw nib'jub'tac yilxi, atn chon̈b' Bet-jesimot, Baal-meón yet' Quiriataim.

¹⁰ 'Oj cot eb' 'anma 'a jun tzo'n̈ chon̈b' 'a stojlal 'aj tzq'uel c'u, ax yi'n 'ec' eb' slum eb' 'aj Amón. 'Oj wac' jun lum chi yico'oc eb', sec man̈x 'oj b'inaxc eb' amonita chi 'a scal jun tzo'n̈ xo nacion̈.

¹¹ An̈jtona', 'oj wa'ch yailal 'a yib'n̈ eb' 'aj Moab, sec 'oj yojcoc 'el eb', to an Jehová in, an 'ixta tzwutj eb'.

A tas tzalx 'a yib'n̈ Edom

¹² An Jehová Yajl in, an tzwal 'ixtic: Yujto 'ix 'ec' 'a yib'n̈ spacn sb'a eb' 'aj Edom 'a eb' yin̈tl Judá, yuj cha, caw 'ix 'och smul eb' 'a in sat, yujto spac sb'a eb'.

¹³ Yuj cha, an Yajl in tic, an tzwal 'ixtic: 'Oj wi' chan̈ in c'ab', ax wa'n 'och yailal 'a yib'n̈ eb' 'aj Edom. 'Oj in satl smasnil 'anma yet' no noc'. 'Oj 'el yich slajw 'el eb' 'a Temán masnto 'oj c'och 'a Dedán. 'Oj cham eb' 'anma chi yuj owal.

¹⁴ An Jehová in, an tzwala, to 'oj in c'anlb'oc eb' in chon̈b' israel yic tzin pacn in b'a 'a eb' 'aj Edom. 'Oj ya'ch eb' syailal eb' 'aj Edom 'icha wal yaj yowl in c'ojl 'a yib'n̈ eb', sec 'oj yojcoc 'el eb', to an tzin pac in b'a 'a eb'.

A tas tzalx 'a yib'n̈ eb' filisteo

¹⁵ An Jehová Yajl in, an tzwal 'ixtic: Yujto a eb' filisteo, ya'jnac eb' sgana spacn sb'a 'a eb' 'ajc'ojl yajch 'a 'a, atn eb' 'aj Judá, yujto 'ay xon schichnc'ojlal eb' chi 'a eb', yuj cha spacn sb'a eb'.

¹⁶ Yuj cha, tzwaln cani: To 'oj wi' chan̈ in c'ab', ax wa'n 'och syailal eb' filisteo cha, 'oj in satl eb' quereteo, yet' smasnil eb' 'ay 'a sti a mar.

¹⁷ Caw niwquil 'oj wutc in pacn in b'a 'a eb' yuj yowl in c'ojol, sec 'oj yojcoc 'el eb', to an Jehová in, to cojn in ton Dios in, xchi Dios.