Ez 24 - Chuj San Sebastian Bible

Jun chen 'ay q'ue 'a yib'n̈ c'ac'

¹ A 'a slajn̈il c'u yoch slajn̈il 'uj yic sb'aln̈il ab'il quijx cot 'icha presoal, ata 'ix yal Jehová 'ayn 'ixtic:

² Ach 'anma', tz'ib'j cani tas c'ul ticnec, yujto a 'a jun c'u tic 'ix syamch win sreyl Babilonia yac' owl 'a Jerusalén.

³ Alcn 'el jun 'ab'x tic 'a ch'oxnb'ilal, tzaln 'a jun chon̈b' tenmtac tic 'ixtic: 'Ixtc wal xyutj Jehová Cajlil yaln 'ayin: 'Ac' q'ue junc chen 'a yib'n̈ c'ac', tza'n 'ejm a 'a yojol.

⁴ Tza'n 'ejm no chib'j 'a yojol, no caw nab'a chib'ej, no sb'a'chil xub' yet' no sb'a'chil squelab', tz'em pax no sb'acl caw wach', tzcotc tzu'x 'at no'.

⁵ A junc no calnelu caw wal b'aq'uech, a tzej 'ati; tza'n 'och sc'atztzil yaln̈ jun chen cha, sec wach' tz'aj staj sb'a'al, masnto tztaj q'uen b'ac cha.

⁶ An Jehová Yajl in, an tzwal 'ixtic: ¡'Ay, 'oltac wal jun chon̈b' tic, caw milm 'anma'! Lajn wal 'icha junc chen c'uxmtac, a yic tzb'icx 'eli, matz 'el jun sc'uxmtacl cha, xin chi. Ach xo tic, junjnal tzotj e'n q'uet no chib'j cha, man̈ a si'loc.

⁷ Yujto a jun chon̈b' cha, b'on̈xnac 'el yuj chic', man̈oc 'a sat lum tz'emi sec matz tup 'ejm 'a scal pococ. Palta to yib'n̈ q'uen tz'ejm can chic' cha.

⁸ 'Oj cann̈j jun chic' chi 'a yib'n̈ q'uen cha, ma'oj stac' sc'ub'x 'eli. Yuj ton wal cha, tzcot yowl in c'ojol, tzwa'n spac.

⁹ An Jehová Yajl in, an tzwal 'ixtic: ¡'Ay, 'oltac wal jun chon̈b' tic! caw wal milm 'anma'. Yuj cha, 'icha to 'oj wa'ch wal jun niwquil c'ac' 'a yalan̈.

¹⁰ 'Ij cot nan̈loc c'atzitz, tza'n 'och sc'aq'uil, tza'n pax scalc sb'a. Wach' tz'aj tztaj no chib'j cha, masnto tztup 'ejm yalil, sec 'oj tz'a eb' q'uen b'ac cha.

¹¹ Tzlajw cha, tza'n pax q'ue jun chen chi 'a yib'n̈ stzac'ac', palta man̈x 'a tas tz'em 'a yojol, sec 'oj 'ulb'xoc 'elt slumal chi stz'a'i, ax sacb' can pax jun chen cha. 'Ixta 'oj 'aj yel jun sc'uxmtacl cha.

¹² Nab'an̈ej xcob' wixtc in b'a in b'icn 'el jun chen cha, wach'xam xcob' wac' q'ue 'a yib'n̈ c'ac', palta ma'ix 'el xon sc'uxmtacl cha.

¹³ Ach Jerusalén, xin nib'j ach in sacb'tzej yuj tas maysch'olnil tza b'o'o, palta ma'ix yal a c'ojl 'ix a sacb'tzej a b'a. Man̈x 'oj a b'o'i, masnto 'oj wi'l yowl in c'ojl 'a eb'an̈.

¹⁴ An Jehová in, an tzwala, xc'och stiempoal wa'n 'och a yailal, man̈x 'oj wi'ch wa'an, man̈x 'oj 'o'ch in c'ojl 'ayach, man̈x 'oj ach in na'. 'Oj wa'ch a yailal yuj tas tz'el a b'oni, yujto an Jehová Yajl in, an tzach in b'eyc'ojlej, xchi Dios, xa chi, xchi 'ayin.

Schamlil yistzil Ezequiel

¹⁵ 'Ix yaln pax Jehová 'ayn 'ixtic:

¹⁶ Ach 'anma', jun wal rato ax wi'n 'ec' sq'uinl 'ix estzil caw wal chamc'ojlb'il o'oj. Palta man̈ a na', man̈ ach 'oc' yu'uj, may cab' yal a sat tz'el yu'uj.

¹⁷ Tza c'ultac 'ab'j syail, palta man̈ a ch'oxl a cusc'ojlal chi 'icha tzyac' eb' 'anma yuj mach tzcham 'a 'a. Man̈ e'l sc'oxl a jolom, man̈ e'l a xan̈ab', man̈ a mac a sat yic tza ch'oxn 'el a cusc'ojlal, man̈ a c'ux jun tzo'n̈ tas tzc'uxx yuj cusc'ojlal, xchi 'ayin.

¹⁸ In paxtin 'a eb' 'anma chi 'a sq'uin̈b'il cha, ax 'a yemc'ual 'ix cham 'ix wistzil; a 'a jun sq'uin̈b'il cha, xin b'on 'icha 'ix 'aj yalx 'ayin.

¹⁹ Ax smasnil eb' 'anma 'a chon̈b' tic, 'ix yal eb' 'ayn 'ixtic: Al 'ayon̈ tas tzyal 'el'ch jun tzo'n̈ tza ch'ox tic, xchi eb'.

²⁰ Yuj cha, xwaln 'ixtc 'a eb'. A Jehová a 'ix aln 'ayn 'ixtic:

²¹ Al 'a eb' et israelal, to an Jehová in, an 'oj wac' juwc 'el watut, atn jun caw nib'b'il yilxi, nib'b'il pax eyu'uj. Tze b'an̈ e b'a yu'uj, 'icha to a 'aych eyipoc. An̈jtona eb' eyunnal yet' eb' eyisl xcancn eyuj 'a Jerusalén, 'oj cham pax eb' yuj owal, xchi.

²² Ax xo tic, 'oj e b'o 'icha xwutj in ch'oxn 'ayx tic; man̈ e mac e sat yic tze ch'oxn 'el e cusc'ojlal cha, man̈ e c'ux tas tzc'uxxi yic 'ay chaml tz'ochi.

²³ Man̈ eyi'l sc'oxl e jolom, man̈ eyi'l e xan̈ab', man̈ e ch'oxl e cusc'ojlal cha, man̈ ex 'oc'oc. Mun 'oj c'un 'el eyip yuj jun tzo'n̈ e mul cha, ax scus chan̈ e c'ojl junjn ex.

²⁴ An Ezequiel in tic, an tzin 'och ch'oxnb'ilal 'ayex, smasnil jun tzo'n̈ tzin b'o tic, a 'oj e b'o pax ax tic. A yic 'oj ujc jun tzo'n̈ tic, ax eyojcan 'eli, to a Jehová Cajlil, a 'ixta tzex 'utni, xin chi 'a eb'.

²⁵ 'Ix yaln pax Dios 'ayn 'ixtic: Ach 'anma', a ticnec 'oj wi'l jun tas 'aych yipc sc'ojl eb' et israelal tic. Atn watut caw wach' yilxi, caw tzalj eb' yet'oc, yel xo wal nib'b'il yuj eb'. Ax in satn 'el pax yunnal eb'.

²⁶ A 'a jun c'ul cha, ata 'ay junc mach 'oj cot 'eloc, ax wul yalnc ab' jun 'ab'x cha.

²⁷ A 'a jun c'u cha, ata 'oj stac' a paxtin paxi, sec 'oj stac' a c'umn a b'a yet' win 'oj cot 'elc cha, 'oj jacwc can pax a ti', sec tzach 'och ch'oxnb'ilal 'a eb' in chon̈b' tic, ax in yojcan 'el eb', to an Jehová in, to cojn in ton Dios in, xchi 'ayin.