Ez 23 - Chuj San Sebastian Bible

A Samaria yet' Jerusalén

¹ 'Ix yaln Jehová 'ayn 'ixtic:

² Ach 'anma', 'ay jun 'ab'x 'oj wal ab'i'. A 'a jun 'el 'ay chawn̈ 'ix snul'j sb'a, junn̈j snun eb'.

³ A chawn̈ 'ix tic, caw cob's to eb', xya'n 'och sb'a eb' 'ajmulal 'a Egipto; ata xyac' eb' yamxoc yim, 'ix 'e'cn scob'sal eb' chi ta'.

⁴ A 'ix b'ab'el, Ahola sb'i 'ix, tzyal 'el'chi, atn chon̈b' Samaria; ax 'ix schab'il, Aholiba sb'i 'ix, tzyal 'el'chi, atn chon̈b' Jerusalén. 'Ix wica'an eb', 'ix laj 'alj wunnal yet' eb' 'ix.

⁵ A 'ix Ahola cha, xya'ch 'ix smul 'a yol in c'ab', sb'o 'ix 'ajmulal yet' ewin soldado 'aj Asiria.

⁶ A jun tzo'n̈ winc cha, linon̈ej spichl eb' 'aychi. 'Ay eb' gobernador 'a scal eb', 'ay eb' scapitan̈il eb' soldado, quelmtac wincn̈ej eb'. Caw nib'jub'tac yilx eb', 'ayn̈j q'ue eb' 'a yib'n̈ chej smasnil.

⁷ A eb' caw wach' yilx 'a scal eb' 'aj Asiria cha, a yet' eb' sb'o 'ix 'ajmulal. Xya'n 'och 'ix snab'en 'a jun tzo'n̈ sdiosal eb', xya'n 'ejm sb'a 'ix 'a 'a.

⁸ Atxo yic 'ayc' 'ix 'a Egipto, xya'n 'och sb'a 'ix 'ajmulal, ma'ix yactj can 'ix sb'oni. Yujto cob's 'unn to, xlaj way ewin yet'oc, xlaj syamnc ewin yim, 'ix 'ochcn 'ix 'ajmulal.

⁹ Yuj cha, 'ix wa'n 'ix 'a yol sc'ab' ewin tzchamc'ojlan cha, atn ewin 'aj Asiria, yujto snib'j 'och 'ix ewinac.

¹⁰ Ax x'aji, sjitn 'el ewin 'ix, xyi'n 'ec' ewin eb' yune 'ix cha. 'Ix stzu'n cham ewin 'ix yet' yespada. 'Ixta xyutj ewin ya'n 'och yailal 'a yib'n̈ 'ix. 'Ix puc yab'xil 'ix 'a scal smasnil eb' 'ix 'ix.

¹¹ C'uxn xyil 'ix Aholiba smasnil tas sb'o 'ix snul'j 'ix cha, palta yel xo wal x'ec' 'ix 'a yib'n̈ sb'on 'ajmulal 'a 'ix snul'j cha.

¹² An̈jtona', xya'ch sb'a 'ix 'a yol sc'ab' eb' 'aj Asiria cha, caw wach' yilx eb' yet' spichul. 'Ay eb' gobernador, 'ay scapitan̈il eb' soldado, 'a'm owl eb' smasnil, nib'jub'tac pax yilx eb', 'ay q'ue eb' 'a yib'n̈ chej smasnil.

¹³ 'Ix wilni, to 'ix ya'ch pax 'ix smul 'a yol in c'ab' 'icha 'ix nul'jab'il cha.

¹⁴ Palta yel xo wal x'ec' 'ix 'a yib'n̈ ya'n 'och sb'a 'ajmulal: 'Ix 'och q'ueln 'ix 'a yechl jun tzo'n̈ winc tz'ib'b'il 'och 'a yich n̈a, atn eb' caldeo. Caw wach' yilx eb' yet' spichul,

¹⁵ 'aych jun tzo'n̈ cincha 'a snan̈l eb' yic yopiso cha. A sc'oxl sjolm eb' 'ay q'ue'i, tz'ib'quintac yilxi, 'icha yilx eb' scapitan̈il eb' soldado 'aj Babilonia, 'ixta yilx eb', caldeo eb' smasnil.

¹⁶ A yic xyiln 'och 'ix yechl jun tzo'n̈ eb' winc cha, 'ix snib'n 'och 'ix eb', yuj cha, 'ix ya'n 'at 'ix schecb' 'a ewin 'a Babilonia cha.

¹⁷ Xlajw cha, 'ix jaw ewin 'aj Babilonia chi 'a 'ix, xway ewin yet' 'ix, xya'n wal 'ix sgana yet' ewinac, masnto xyoch'b' ewin yuj 'ix.

¹⁸ 'Ixta 'ix yutj sch'oxn 'el sb'a, to tzya'ch can sb'a 'ajmulal 'a sat 'anma', 'ix sch'oxn 'ilxoc sq'uixwelal. 'Ix yoch'b' wiln 'ix yet' sb'eyb'al, 'icha xwac' yet' 'ix nul'jab'il cha.

¹⁹ Palta yel xo wal x'ec' 'ix 'a yib'n̈ yoch 'ajmulal, yujto sna cot 'ix, tas xcot 'a 'unnal yic sb'on 'ajmulal 'a Egipto.

²⁰ 'Ix ya'ch 'ix snab'en 'a ewin 'aj Egipto cha, yic tzya'n 'ix sgana yet' ewinac, yujto caw 'ay yip ewin 'icha no b'uru mto 'icha no cawyu chej.

²¹ Yuj cha, xwaln 'ixtc 'a 'ix: Ach Aholiba, xa na coti to a yic cob's 'ach 'unin, 'ix ac' a gana a b'on 'ajmulal yet' eb' 'aj Egipto yic syamn ewin em.

²² Yuj cha, an Jehová Yajl in, an tzwal 'aych 'ixtic: A wal eb' xa nib'j 'och cha, ax ticnec xyoch'b' eb' o'oj, an 'oj wa'ch eb' 'ajc'ojlal 'ayach,

²³ atn eb' 'aj Babilonia, eb' caldeo smasnil, eb' 'aj Pecod, eb' 'aj Soa, eb' 'aj Coa yet' smasnil eb' 'aj Asiria. Caw quelmtac eb' smasnil, caw wach' yilx eb'. 'Ayn̈j pax yopiso eb', 'ay eb' gobernador, 'ay eb' scapitan̈il eb' soldado, 'a'm owl wal eb' si'mb'il, 'ayn̈j q'ue eb' 'a yib'n̈ chej.

²⁴ 'Oj jawc eb' 'aych yet' scaruaje, scareta yet' eb' soldado eb'. A eb' soldado cha, caw niwn syamc'ab' eb' yet'i, 'ay q'ue sq'uen xumpiln eb', yet' eb' syamc'ab' tzmacn sat jul-lab'. 'Oj 'och oyn eb' 'ayach, ax ach wa'n 'a yol sc'ab' eb', yic 'oj ach sb'eyc'ojlanc eb' yet' sley.

²⁵ Ax wa'n cot wal yowl in c'ojl 'a eb'an̈, 'oj wac' yi'l eb' a n̈i', a chiquin, ax eb' 'anma 'oj canoc, 'oj tzu'xoc cham eb' yet' q'uen espada. 'Oj stoc'c' eb' smasnil eb' 'anma', ax 'a slajub', ax ach sn̈usntz'a eb'.

²⁶ 'Oj yi'l eb' a pichul, ax sto'n 'ec' eb' jun tzo'n̈ q'uen wach' yilx 'aych 'ayach.

²⁷ 'Oj wac' 'och wan a nib'n 'ajmulal, man̈x 'oj a na cot 'ajmulal a b'ojnac 'a Egipto, man̈x 'oj a na cot pax ewin 'aj Egipto cha.

²⁸ Yujto an Jehová in, an tzwala: 'Oj ach wac' 'a yol sc'ab' eb' 'anma xyoch'b' o'oj, atn eb' man̈xtzac a nib'j ela'.

²⁹ 'Oj ach schacl eb', ax yi'n 'ec' eb' smasnil tas tzej 'a a munljel, caw 'oj elcn jitn yuj eb'; c'uxn 'oj checljoc a niwnal xac' tzaljb'oc a c'ojl a b'on 'ajmulal chi yet'oc.

³⁰ 'Ixta wal 'oj aj yuj jun tzo'n̈ cha, yujto 'ix a'ch a b'a 'ajmulal yet' jun tzo'n̈ xo nacion̈, 'ix a'n 'ejm a b'a 'a sdiosal eb'.

³¹ A sb'eyb'al 'ix a nul'j chi 'ix e'aj, yuj cha, 'icha to junn̈j vaso 'oj wac' eyu'lab'oc, tzyal 'el'chi to 'oj wa'ch a yailal, 'icha 'ix wutj wa'n 'och syailal 'ix a nul'j cha.

³² An Jehová Yajl in, an tzwal 'ixtic: A tas xyu'j 'ix a nul'j cha, a pax 'oj wac' oc' ach tic. A jun vaso 'oj a c'an cha, caw niwquil, xab' pax yich. Ata 'oj b'ut'joc 'ejm sb'uchwal paxti eb' nacion̈ 'ayach.

³³ A jun vaso cha, b'ut'n yet' tas tu'. 'Oj oyb'oc 'a jolm yu'uj, ax ya'n ab' syail, atn jun svaso a nul'j Samaria sc'anjnac.

³⁴ 'Oj oc' smasnil tas 'ay 'a yojl jun vaso cha. A yic 'oj lajwc o'n sb'al cha, ax a ma'n pojoc, ax a c'uchn lajwc em.

³⁵ Yuj cha, an Jehová in, an tzwal 'ixtic: Yujto 'ix ac' sat a c'ojl 'ayin, in a patquilj can 'eli, yuj cha, 'oj wac' ab' syal yuj ajmulal cha, xchi Dios 'a yib'n̈ Jerusalén.

Syailal Samaria yet' Jerusalén

³⁶ 'Ix yaln Jehová 'ayn 'ixtic: Ach 'anma', al yab' 'ix Ahola yet' 'ix Aholiba, to 'oj yab' eb' syal yuj jantcn̈ej tas yajb'entac sb'o'o.

³⁷ Yujto sb'o eb' 'ajmulal 'a yol in c'ab', milm 'anma eb'. 'Ix yac' 'ejm sb'a eb' 'a jun tzo'n̈ yechl comn dios. 'Ix ya'n eb' jun tzo'n̈ yune xajmb'alil, 'ix yac' tz'a eb' 'ix jun tzo'n̈ wunnal chi yet'oc.

^38-39 Man̈ cojnoc jun tzo'n̈ cha, palta 'ix yixtj 'el eb' in cajnub', ma'ix syiclj pax eb' sc'ul 'iljelal. 'Ay jun c'ual to a yune eb' xyac' xajmb'al-l 'a jun tzo'n̈ sdiosal, a 'a jun c'u cha, ata 'ix 'och eb' 'a yol in cajnub', 'ixta xyutj eb' yixtn can 'eli. Atn wal jun tzo'n̈ chi sb'ojnac eb' 'a yol watut cha.

⁴⁰ 'Ix ya'n 'at eb' schecb' 'a eb' winc 'ay 'a najat, sec tzjaw ewin 'a eb' 'ix. A yic xjaw ewinac, 'ix 'achn eb' 'ix, xya'n 'och eb' 'ix yan̈l yol sat, xya'n 'och eb' 'ix jun tzo'n̈ q'uen wach' yilx 'a 'a, sec tzchamc'ojlax eb' 'ix yuj ewinac.

⁴¹ Xlajw cha, x'em wocn eb' 'ix 'a sti sch'at, wach'x pax yaj sb'o jun te mexa yet' tas tzc'uxxi. A 'a sat mexa cha, ata xyac' 'ejm eb' 'ix jun incienso yet' jun aceite to wic yaji.

⁴² 'Ay pax nan̈l eb' 'anma xchan sq'uin̈l jun chi yet' eb' 'ix, til wal yel yaw eb', atn eb' comn winc 'u'm 'an̈ xlaj cot 'a lum cusltac lu'um. 'Ix ya'ch ewin jun tzo'n̈ q'uen brazalete 'a sc'ab' eb' 'ix, xya'n q'ue ewin jun tzo'n̈ corona wach' yilx 'a sjolm eb' 'ix.

⁴³ 'Ix waln 'ixtic: Ya' cab' ewin sgana yet' eb' 'ix, yujto chichm xo eb' 'ix yuj yajmulal cha, xin chi.

⁴⁴ Yujto 'ix jaw ewin wayc yet' eb' 'ix, 'icha tzyac' junc 'ix 'ajmul 'ix, 'ixta 'ix 'aj ewin sjaw 'a 'ix Ahola yet' 'a 'ix Aholiba, xya'n 'och sb'a eb' 'ix 'ajmulal.

⁴⁵ Palta 'oj b'eyc'ojlaxc eb' 'ix yuj ewin winc tojl snab'en. 'Oj b'eyc'ojlaxc eb' 'ix yuj yajmulal, ax sb'eyc'ojlax eb' 'ix yuj smilm 'anma'il, yujto niwn 'anma xcham yuj eb'.

⁴⁶ Yuj cha, an Jehová Yajl in, an tzwal 'ixtic: Cot cab' somnjoc eb' chon̈b' yac' owl yet' eb' 'ix. 'Oj 'och eb' 'ix 'a xiwc'ojlal, ax yelc'x 'at tas 'ay 'a eb'.

⁴⁷ Ax eb' 'anma cha, a eb' 'oj julq'uenan eb' 'ix. 'Oj tzu'x cham eb' yet' q'uen espada, ax smilx pax yune eb' chi yet'oc. Tzlajw cha, ax sn̈usx can yatut eb'.

⁴⁸ 'Ixta wal 'oj wutc in satn 'el 'ajmulal 'a sat lum lum tic, ax xib'tn sb'a smasnil eb' 'ix 'ix, man̈x comnoc 'oj sb'o eb' 'ajmulal.

⁴⁹ A chawn̈ eb' 'ix 'ix cha, 'oj wac' stup lajwc eb' smul yuj yajmulal, yujto xyac' pax 'ejm sb'a eb' 'a jun tzo'n̈ yechl comn dios. Ax snachj 'el eyuj ax chab' chon̈b'al ex cha, to an Jehová Yajl in, an 'ixta tzex wutej, xchi Dios 'ayin.