Ez 22 - Chuj San Sebastian Bible

A smul chon̈b' Jerusalén

¹ 'Ix yaln pax Jehová 'ayn 'ixtic:

² Ach 'anma', b'eyc'ojlej chon̈b' Jerusalén, ax alni tas 'oj 'aj yuj smilm 'anma'il. Tza ch'oxn yil smasnil tas yajb'entac sb'o'o.

³ Al yab'i', to an Jehová in, an tzwal 'ixtc 'a 'a: Ach chon̈ab', milm ach cham 'anma', 'ix laj a b'o jun tzo'n̈ yechl comn dios, 'ix extn 'el a b'a yet'oc. Ax ticnec b'i'an, tzjaw wal sc'ul eco'.

⁴ Yuj a milm 'anma'il 'ix 'och a mul, 'ix laj a b'o jun tzo'n̈ yechl comn dios, 'ix extn 'el a b'a yu'uj. Atn yuj jun tzo'n̈ tic, tzjaw slajb' sc'ul eco'. 'Oj ach wac' sb'aj jun tzo'n̈ xo nacion̈, ax ach wa'n sb'uch eb' 'anma 'ay 'a sat lum lum tic.

⁵ A eb' nacion̈ 'ay 'a a la'nil yet' eb' 'ay 'a najat, 'oj ach stzetzc eb'; 'oj sb'uch eb' a b'i, yujto may stzol-l tas tza b'o'o.

⁶ Ax eb' syajlil chon̈ab', yaln̈ej tas yopiso eb', tzyac' eb' yip smilw 'anma'.

⁷ Tzchacl eb' 'anma chi smam snun. A eb' chuc chon̈b'al cajn 'ec' 'a scal eb', caw tz'ixtx eb' yuj eb'. Tz'ixtx eb' meb'a 'unn chamnc smam yet' eb' 'ix 'ix chamnc yichmil.

⁸ A 'in cajnub', may yel'ch 'a sat eb', matz yiclj eb' sc'ul 'iljelal to wic yaji.

⁹ An Jehová in, an tzwala, a 'a scal eb' cha, til wal eb' tz'a'n 'och 'es 'a yib'n̈ junc xo mach sec tzchami. 'Ay pax eb' tzlaj xit'c 'a jolmctac witz wa'oc yic tzya'n eb' 'emmquilal 'a jun tzo'n̈ yechl comn dios, caw yajb'entac tas tzlaj sb'o eb'.

¹⁰ 'Ay eb' tzlaj mulnc yet' yistzil smam, 'ay eb' tz'och 'a eb' 'ix 'ix 'aj yujl yel a a'.

¹¹ 'Ay eb' tzmuln yet' yistzil junc xo yit wincal, 'ay eb' tzmuln yet' yalib', 'ay eb' tzmuln yet' schab'l 'anab'.

¹² 'Ay eb' eyajlil tzchan tumin yic tzya'n 'och eb' chaml 'a yib'n̈ junc xo mach. 'Ay eb' tz'a'n q'uen tumn majnil 'a junc xo yit 'anma'il, palta niwn yune q'uen tumn chi tzc'an eb', tzya'n eb' sat sc'ojl 'ayin.

¹³ An Jehová Yajl in an tzwala, caw wal tzcot wowl yuj tas tzyij eb' 'a spatc eb' yit 'anma'il, yet' yuj smilwjumal eb'.

¹⁴ Tom 'oj stac' ste'wtzan sb'a eb' 'a wojltac yic 'oj in b'eyc'ojlanc eb'. A tas tox xwala, yowlal 'oj 'el'choc.

¹⁵ 'Oj sactzic can 'at eb' 'anma chi 'a jun tzo'n̈ xo nacion̈ yet' 'a junjn chon̈ab'. 'Ixta 'oj ach wutc ach in sacb'tzan yuj a tu'al.

¹⁶ Q'uixweltac 'oj ajcn 'a sat jun tzo'n̈ xo nacion̈, ax ojcan 'eli, to an Jehová in, cojn in ton Dios in, xchi Dios, xa chi 'a chon̈b' Jerusalén, xchi 'ayin.

Eb' israel tzecx syam sb'a

¹⁷ 'Ix yaln pax Jehová 'ayn 'ixtic:

¹⁸ Ach 'anma', a eb' et israelal tic, man̈x 'a tz'och eb' wu'uj, yujto lajn xoj eb' 'icha jac sc'ajl q'uen bronce, q'uen estaño, q'uen hierro, q'uen plomo tz'elt can 'a scal q'uen plata yic tz'och q'uen 'a yojl junc jorna, 'ixta eb'.

¹⁹ Yuj cha, an tzwal 'ixtc 'a eb': Ax tic, sc'ajl xoj tzex 'ajcn 'eli, yuj cha, 'oj wac' eyam e b'a 'a yol chon̈b' Jerusalén.

²⁰ 'Icha tzyac' junc mach tzsi'n syam sb'a q'uen plata, q'uen bronce, q'uen hierro, q'uen plomo yet' q'uen estaño, tzya'n 'och 'a yol jorna, tzya'n 'och sc'aq'uil sec tz'ulb'xi, 'ixta 'oj ex wutoc, 'oj wec eyam e b'a yuj yowl in c'ojol, ax ex wa'n 'ulb'xoc yet' yailal.

²¹ 'Oj wec eyam e b'a, ax wa'n 'och eyailal, 'oj ex wac' 'ulb'xoc, 'icha tz'aj yoch sc'a'l junc tas, 'ixta 'oj ex wutc yet' yowl in c'ojol.

²² 'Icha tz'aj yulb'x q'uen plata 'a scal c'ac', 'ixta 'oj eyaj eyulb'x yuj yailal 'a yol chon̈b' cha. 'Ixta to b'i'an, ax eyojcan 'eli, to an Jehová in, an tzwa'ch eyailal yuj yowl in c'ojol, xchi Dios, xa chi 'a eb', xchi 'ayin.

A smul eb' yajl 'a Jerusalén

²³ 'Ix yaln pax Jehová 'ayn 'ixtic:

²⁴ Ach 'anma', al 'a eb' et israelal cha, to man̈x wach'c slum eb', yujto man̈xtzac yac' n̈ab'; yuj yowl in c'ojol 'ixta tz'aj lu'um.

²⁵ A eb' 'aych yajlil 'a scal eb' 'anma cha, lajn wal eb' 'icha no león tz'el yaw sayn 'ec' schib'ej. A eb' cha, 'anma tzlaj smil eb', tzlaj yi'nc 'ec' eb' tas 'ay 'a eb' 'anma', til wal eb' 'ix 'ix tzcham yichmil yuj eb'.

²⁶ Ax eb' ya'mal 'och sti eb' 'anma 'a scal eb', ma'ix syiclj eb' in ley, may yel'ch xyutj eb' in cajnub', a tas wic yaji, may yel'ch 'a sat eb'; ma'ix schecltej 'el eb' 'aj 'ay tas wach' yet' tas maysch'olnil 'a sat ley, ma'ix syiclj eb' sc'ul 'iljelal wic yaji, may wel'ch xon jac 'a sat eb'.

²⁷ A eb' yajl cha, lajn eb' 'icha no 'ocs tzyam schib'ej, 'anma tzlaj smil eb', tzyi'n 'ec' eb' tas 'ay 'a eb' 'anma cha.

²⁸ Ax eb' tzcob' yalch sb'a in checb'oc 'a scal eb' chon̈ab', tzlaj sc'ub'c 'el eb' smul, 'icha tz'aj yoch tan̈ 'a yich junc n̈a, tzmacchj 'el cob' lum xamit yu'uj, 'ixta tzyutj eb' tzmacn sat eb' chon̈b' cha. Tzlaj cob' yalnc eb' to 'ay tas tzwac' yil eb', tznan chan̈ eb' tas tzyutj eb' ya'n 'es, tzcob' yalnc eb' 'ixtic: A Jehová Cajlil, a tz'a'n cal jun tzo'n̈ tic on̈, xchi cob' eb', palta wal yel, may tas tzwac' yal eb'.

²⁹ A eb' 'anma 'a jun chon̈b' cha, cojxn maysch'olnil tzb'o eb', tz'elc'w eb'; tz'ixtx eb' meb'a 'anma yuj eb', yet' eb' 'ay tas sc'a'l tz'och yu'uj, tz'ixtx pax eb' chuc chon̈b'al cajn 'a scal eb'.

³⁰ 'Ix cob' in sayc' 'a scal eb', lemb'il 'ay junc mach tztew to 'ayn yuj jun chon̈b' cha, sec matz in satli, palta may junc x'ilchj wu'uj.

³¹ Yuj wal cha, 'oj wa' cot yowl in c'ojl 'a yib'an̈. 'Oj wac' lajwc 'el eb' 'anma yuj in c'a'lc'ojlal. 'Ixta 'oj 'aj sjaw yailal 'a yib'n̈ eb' yuj sb'eyb'al cha, xchi Dios, xa chi 'a eb', xchi 'ayin.